ᓇᒻᒥᓂᕐᒥᓂ ᐃᖅᑲᓇᐃᔭᖅᑐᑦ ᐃᓄᐃᑦ ᓂᐅᕕᕈᓐᓇᖅᐳᑦ ᐃᒻᒥᒃᑯᑦ ᐃᓱᒪᖅᓲᑕᐅᔪᒥᒃ ᓇᓪᓕᐅᒃᑯᒫᖃᕈᑎᒥᒃ ᐅᕙᑦᑎᓐᓂᑦ. ᕿᓚᒻᒥᐅᓂᖅᐹᖑᔪᓐᓇᖅᑐᖅ ᑕᐃᒪ ᓂᐅᕕᐊᕆᔪᓐᓇᑕᓐᓂ ᐊᑕᐅᓯᕐᒧᑦ ᑕᖅᑭᒧᑦ. ᐱᒋᐊᓐᖓᐅᑎᓂᒃ ᐱᓕᐅᓯᐊᒃᓴᖃᖅᑐᒍᑦ ᒪᓕᒃᑐᓂᒃ ᖃᓄᖅ ᐊᒥᓲᑎᒋᔪᓂᒃ ᓇᓪᓕᐅᒃᑯᒫᖃᕈᑎᓂᒃ ᑐᒃᓯᕋᕈᓐᓇᑕᓐᓂᒃ, ᐊᒻᒪ ᖃᓄᐃᑦᑐᓂᒃ ᓇᓪᓕᐅᒃᑯᒫᖃᕈᑎᓂᒃ ᐊᖏᕈᑎᒋᔭᑦᑎᓐᓂᒃ. ᑐᒃᓯᕋᖃᑦᑕᕆᐊᖃᖅᐳᑎᑦ ᓄᑖᓐᖑᖅᑎᒐᓱᐊᕐᓗᒍ ᓇᓪᓕᐅᒃᑯᒫᖃᕈᑏᑦ ᐊᕐᕌᒍᑕᒫᑦ. ᐊᖏᖅᑕᐅᑉᐸᑦ, ᓴᐳᔾᔭᐅᓯᒪᓕᕋᔭᖅᐳᑎᑦ ᐊᒻᒪ ᐱᓕᐅᓯᐊᒃᓴᖅᑖᕈᓐᓇᖅᓯᓗᑎᑦ ᐃᖅᑲᓇᐃᔭᖅᑎᑦ ᓇᓪᓕᐅᒃᑯᒫᖏᓐᓄᑦ ᒪᓕᒐᒃᑯᑦ.
ᑕᒪᐃᑕᑲᓴᒃ ᐃᖅᑲᓇᐃᔭᖅᑎᑦ ᐱᑎᑕᐅᑦᑕᐅᑎᒋᕙᒻᒪᑕ ᓇᓪᓕᐅᒃᑯᒫᖃᕈᑎᓂᒃ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᒃᑯᑎᒍᑦ ᓄᓇᑦᓯᐊᕐᒧᑦ ᐊᒻᒪ ᓄᓇᕗᒻᒧᑦ ᐃᖅᑲᓇᐃᔭᖅᑎᑦᑎᔨᒥᒍᑦ. ᐋᓐᓂᕋᐃᑉᐸᑕ ᐃᖅᑲᓇᐃᔭᕐᓗᑎᒃ, ᐅᕝᕙᓘᓐᓃᑦ ᖃᓂᒻᒪᒐᐃᑉᐸᑕ ᑕᐃᒪᐃᑎᑕᐅᓗᑎᒃ ᐃᖅᑲᓇᐃᔮᒥᓐᓄᑦ, ᐱᑕᖃᖅᑎᑦᑎᓲᖑᕗᒍᑦ ᐱᓕᐅᓯᐊᒃᓴᓂᒃ ᑕᒪᒃᑯᓄᖓ. ᐃᓄᐃᑦ ᐱᑎᑕᐅᕙᓐᖏᑦᑐᑦ ᓇᓪᓕᐅᒃᑯᒫᖃᕈᑎᓂᒃ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᓄᑦ ᓂᐅᕕᕈᓐᓇᖅᐳᑦ ᐃᒻᒥᒃᑯᑦ ᐃᓱᒪᖅᓲᑕᐅᔪᒥᒃ ᓇᓪᓕᐅᒃᑯᒫᖃᕈᑎᒥᒃ, ᐱᔾᔪᑎᒋᔪᓐᓇᖅᑕᖏᓐᓂᒃ ᐊᔾᔨᓴᐃᓐᓇᖏᓐᓂᒃ ᐱᓕᐅᓯᐊᒃᓴᓂᒃ ᐱᕙᑦᑕᖏᑕ ᐊᓯᒥ ᐃᖅᑲᓇᐃᔭᖅᑎᑦ.
ᖃᐅᔨᒪᕕᑦ ᐊᑖᒍᑦ ᐃᖅᑲᓇᐃᔭᖅᑏᑦ ᓇᓪᓕᐅᒃᑯᒫᖏᓐᓄᑦ ᐱᖁᔭᑦ ᐃᖅᑲᖅᑐᐃᕕᒃᑎᒍᑦ ᐊᑭᓖᔭᕆᐊᖃᖅᑎᑕᐅᔪᓐᓇᖅᑐᑎᑦ ᐊᑭᓕᖅᑕᐅᙱᑦᑐᓄᑦ ᖃᐅᔨᒋᐊᖅᑕᐅᓂᒃᑯᑦ ᐊᑭᓕᒃᓴᖏᑦ ᑳᓐᑐᓛᖃᖅᑎᑕᑎᑦ ᐃᓚᖓᒍᓪᓗ ᑳᓐᑐᓛᖃᖅᑎᑕᑎᑦ? ᐱᖁᔭᖅ ᐅᖃᖅᓯᒪᔪᖅ ᑲᑐᔾᔨᓗᓯ ᐊᑐᓂᖅᓱᕐᓗᓯᓗ ᐃᖅᑲᖅᑐᐃᕕᒃᑎᒍᑦ ᐊᑭᓖᔭᕆᐊᖃᖅᑎᑦᑐᓐᓇᖅᑖᓯ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᒃᑯᑦ ᓇᓕᐊᑐᐃᓐᓇᐃᑦ ᖃᐅᔨᒋᐊᖅᑕᐅᓂᒃᑯᑦ ᐊᑭᓕᒃᓴᓂᒃ ᐊᒃᑐᐊᔪᓂᒃ ᑳᓐᑐᓛᖏᓐᓄᑦ.
ᓄᓇᒥᐅᑕᓕᕆᔨᑦ ᐊᖑᓇᓱᒃᑎᑦ ᐃᓅᕗᑦ ᐊᖑᓇᓱᒃᑎᐅᓪᓗᑎᒃ, ᐃᖃᓗᒐᓱᒃᑎᐅᓪᓗᑎᒃ, ᑲᑎᖅᓱᐃᔨᐅᓪᓗᑎᒃ, ᐅᕝᕙᓘᓐᓃᑦ ᑮᔭᖃᑦᑕᒃᑎᐅᓪᓗᑎᒃ. ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᐱᓕᕆᖃᑎᖃᓲᖑᕗᑦ ᓄᓇᑦᓯᐊᑉ ᒐᕙᒪᖏᓐᓂᒃ ᐊᒻᒪ ᓄᓇᕗᒻᒥ ᐱᓕᕆᐊᖑᖁᓪᓗᒍ ᓄᓇᒥᐅᑕᓕᕆᔨᑦ ᐊᖑᓇᓱᒃᑎᖏᑕ ᐱᓕᕆᐊᖓ.