ᐃᖅᑲᓇᐃᔭᕐᓂᖅ ᐊᑦᑕᕐᓇᖅᑕᐃᓕᒪᓗᓂ ᑭᒃᑯᓕᒫᑦ ᐱᓕᕆᐊᒃᓴᕆᔭᖓᑦ, ᐊᒻᒪ ᐊᑐᓂ ᐃᖅᑲᓇᐃᔭᖅᑎ ᐱᔪᓐᓇᐅᑎᖃᖅᖢᓂ ᐊᑦᑕᕐᓇᙱᑦᑐᒥᒃ ᐃᖅᑲᓇᐃᔭᕐᕕᖃᕐᓗᓂ. ᑐᑭᓯᐅᒪᓂᖅ ᐱᔪᓐᓇᐅᑎᓂᒃ ᐊᒻᒪ ᐱᓕᕆᐊᒃᓴᖏᓐᓂᒃ ᐊᑐᓂ ᐃᖅᑲᓇᐃᔭᖅᑎᐅᑉ ᑐᙵᕕᓪᓚᕆᐅᓪᓗᓂ ᐃᓚᒋᔭᐅᔪᖅ ᐃᖅᑲᓇᐃᔭᕐᕕᖕᒥ ᐊᑦᑕᕐᓇᖅᑕᐃᓕᒪᓂᕐᒧᑦ ᐃᓕᓂᓐᓂᐊᕐᓂᕐᒥ.
3 ᐃᖅᑲᓇᐃᔭᖅᑏᑦ ᐱᔪᓐᓇᐅᑎᖏᑦ
ᐱᓕᕆᓯᒋᐊᖅᑳᖅᑎᓐᓇᒋᒃ ᐱᓕᕆᐊᒃᓴᖏᓐᓂᒃ, ᑭᒃᑯᓕᒫᑦ ᑐᑭᓯᐊᓪᓗᐊᖅᑐᑦ ᐱᖓᓱᓂᒃ ᑐᙵᕕᐅᔪᓂᒃ ᐱᔪᓐᓇᐅᑎᓂᒃ.
- ᐱᔪᓐᓇᐅᑎᖃᕐᓂᖅ ᖃᐅᔨᒪᓂᕐᒧᑦ – ᐱᔪᓐᓇᐅᑎᖃᖅᑐᑎᑦ ᖃᐅᔨᒪᓗᑎᑦ ᖃᓄᖅ ᐃᖅᑲᓇᐃᔮᑦ ᐱᓕᕆᐊᕆᔪᓐᓇᕐᒪᖔᑦ ᐊᑦᑕᕐᓇᙱᑦᑐᒃᑯᑦ. ᐱᓕᕆᓯᒋᐊᖅᑳᖅᑎᓐᓇᒋᑦ, ᐊᖓᔪᖅᑳᑦ ᐃᓕᓐᓂᐊᖅᑎᑦᑎᓪᓗᐊᖅᑐᖅ ᐅᑯᓂᖓ:
- ᑭᓱᑦ ᐅᓗᕆᐊᓇᕈᓐᓇᖅᐸᑦ ᐃᖅᑲᓇᐃᔭᕐᕕᒋᔭᕐᓂ.
- ᑭᓱᓕᕆᔭᕆᐊᖃᕐᒪᖔᖅᐱᑦ ᐊᑦᑕᕐᓇᙱᓪᓚᑦᑖᖅᑐᒥᒃ ᐃᖅᑲᓇᐃᔭᖁᓪᓗᑎᑦ.
- ᓇᒥ ᓇᓂᔭᐅᔪᓐᓇᕐᒪᖔᑦ ᑐᐊᕕᕐᓇᖅᑐᓕᕆᔾᔪᑏᑦ ᓱᓇᒃᑯᑖᑦ.
- ᖃᓄᐃᓕᐅᕆᐊᖃᕐᒪᖔᑦ ᑐᐊᕕᕐᓇᖅᑐᖃᖅᑎᓪᓗᒍ.
- ᖃᓄᖅ ᐅᖃᐅᓯᕆᔭᕆᐊᖃᕐᒪᖔᑕ ᐋᓐᓂᕐᓃᑦ ᐅᕝᕙᓘᓐᓃᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᐃᓱᒫᓘᑕᐅᔪᑦ.
- ᖃᓄᖅ ᑐᒃᓯᕋᕈᓐᓇᕐᒪᖔᖅᐱᑦ ᐅᕝᕙᓘᓐᓃᑦ ᐃᓚᐅᓗᑎᑦ ᓈᒻᒪᒃᑐᓂᒃ ᐃᓕᓐᓂᐊᒐᒃᓴᕆᔭᕐᓂᒃ ᐱᓕᕆᐊᕆᔪᓐᓇᖁᓪᓗᒍ ᐃᖅᑲᓇᐃᔮᑦ ᐊᑦᑕᕐᓇᙱᑦᑐᒃᑯᑦ.
- ᐱᔪᓐᓇᐅᑎᖃᕐᓂᖅ ᐃᓚᐅᓂᕐᒧᑦ – ᐱᔪᓐᓇᐅᑎᖃᖅᑐᑎᑦ ᐃᓚᐅᓗᑎᑦ ᐃᖅᑲᓇᐃᔮᕐᓂ ᐃᖅᑲᓇᐃᔭᕐᕖᑦ ᐊᑦᑕᕐᓇᖁᓇᒍ. ᐃᒪᐃᓕᖓᑐᐃᓐᓇᕆᐊᓕᒃ:
- ᑐᓴᖅᑎᑦᑎᓂᖅ ᐃᓱᒫᓘᑎᓂᒃ ᐊᑦᑕᕐᓇᖅᑕᐃᓕᒪᓂᖏᓐᓄᑦ ᐃᓕᖕᓄᑦ ᐃᖅᑲᓇᐃᔭᖃᑎᖕᓄᓪᓘᓐᓃᑦ ᓇᓗᓇᐃᔭᐃᓂᕐᓘᓐᓃᑦ ᑭᓱᑐᐃᓐᓇᒥᒃ ᐊᑦᑕᕐᓇᖅᑐᓂᒃ ᐊᒻᒪ ᐃᒪᓐᓈᖅᑐᐃᔾᔪᑏᑦ ᖃᓄᖅ ᐊᑦᑕᕐᓇᙱᓐᓂᖅᓴᐅᔪᓐᓇᕐᒪᖔᑦ. ᓲᕐᓗ ᖁᐊᓴᑕᐃᓐᓇᐅᔭᖅᐸᑦ ᓯᕗᓂᐊᓂ ᒪᔪᕋᐅᑏᑦ, ᐱᔪᓐᓇᐅᑎᖃᖅᑎᑦ ᑐᑭᓯᑎᓪᓗᒍ ᐊᖓᔪᖅᑳᑦ ᐊᒻᒪ ᐃᒪᓐᓈᖅᑑᑎᓕᐅᕐᓗᑎᑦ ᐊᑦᑕᕐᓇᙱᓐᓂᖅᓴᐅᖁᓪᓗᒍ, ᓯᐊᕋᖅᑕᖃᖅᑎᓪᓗᒍ ᐹᑉ ᓴᓂᐊᓂ ᐊᔪᕐᓇᙱᓪᓗᓂ ᐃᓄᐃᑦ ᐃᓪᓕᕆᓯᐊᕐᔪᒃᐸᒡᓗᑎᒃ ᓯᑯᐊᖅᓯᒪᔪᒧᑦ.
- ᓇᖕᒥᓂᖃᖅᑏᑦ 20-ᓂᒃ ᑐᖔᓂᓘᓐᓃᑦ ᐃᖅᑲᓇᐃᔭᖅᑎᓕᖕᓂ, ᐊᑦᑕᕐᓇᖅᑕᐃᓕᒪᓂᕐᒧᑦ ᑭᒡᒐᖅᑐᐃᔨᙳᕈᓐᓇᖅᑐᑎᑦ.
- ᓇᖕᒥᓂᖃᖅᑏᑦ ᐅᖓᑖᓂ 20-ᓂᒃ ᐃᖅᑲᓇᐃᔭᖅᑎᓕᖕᓄᑦ, ᐱᔪᓐᓇᐅᑎᖃᖅᑐᑎᑦ ᐃᓚᐅᖃᑕᐅᓕᕐᓗᑎᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᑲᑎᒪᔨᐊᓛᓂ (ᑕᐅᔭᐅᒐᔪᒃᑐᑦ ᐃᖅᑲᓇᐃᔭᕐᕕᖕᒥᑦ ᐋᓐᓂᐊᖃᖅᑕᐃᓕᒪᓂᕐᒥᑦ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ (OHS) ᑲᑎᒪᔨᐊᓛᑦ ᐅᕝᕙᓘᓐᓃᑦ JOSH ᑲᑎᒪᔨᐊᓛᑦ).
- ᐱᔪᓐᓇᐅᑎᖃᕐᓂᖅ ᐋᒃᑳᕈᓐᓇᓂᕐᒧᑦ – ᐱᔪᓐᓇᐅᑎᖃᖅᑐᑎᑦ ᐋᒃᑳᕐᓂᕐᒧᑦ ᐱᓕᕆᐊᒃᓴᒧᑦ ᐊᑦᑕᕐᓇᕈᓂ ᐃᓕᖕᓄᑦ ᐃᖅᑲᓇᐃᔭᖃᑎᖕᓄᓪᓗ.
- ᐊᑦᑕᕐᓇᖅᑐᒦᖅᑰᔨᒍᕕᑦ ᐅᕝᕙᓘᓐᓃᑦ ᐃᓕᓐᓂᐊᑦᑎᐊᖅᑎᑕᐅᓯᒪᙱᒃᑯᕕᑦ ᐱᓕᕆᐊᒃᓴᒥᒃ ᐊᑦᑕᕐᓇᙱᑦᑐᒃᑯᒃ, ᐱᔪᓐᓇᐅᑎᖃᖅᐳᑎᑦ ᓄᖅᑲᐅᑎᓗᒍ ᐱᓕᕆᐊᑦ ᐊᒻᒪ ᑐᑭᓯᑎᓪᓗᒍ ᐊᖓᔪᖅᑳᑦ ᐃᓱᒫᓘᑎᖕᓂᒃ.
- ᐱᓕᕆᔭᑦ ᐊᔾᔨᐅᙱᑦᑐᒧᑦ ᐅᓗᕆᐊᓇᖅᑐᒨᖅᑎᑦᑎᒍᓂ ᐃᓕᖕᓂᒃ (ᓲᕐᓗ ᐃᖅᑲᓇᐃᔭᕐᕕᖕᒥ ᐅᓗᕆᐊᓇᕈᓐᓇᖅᑐᑦ ᐃᓚᒋᔭᐅᙱᓪᓗᓂ ᖃᐅᑕᒫᖅᓯᐅᑎᖕᓄᑦ ᐱᓕᕆᐊᒃᓴᕐᓄᑦ ᐊᒻᒪᓗ/ᐅᕝᕙᓘᓐᓃᑦ ᐃᓕᓐᓂᐊᖅᓯᒪᙱᒃᑯᕕᑦ ᐊᐅᓚᑦᑎᓂᕐᒥᒃ), ᐱᔪᓐᓇᐅᑎᖃᖅᐳᑎᑦ ᐋᒃᑳᕈᓐᓇᓂᕐᒧᑦ ᑕᒪᑐᒥᖓ ᐱᓕᕆᐊᒃᓴᒥᒃ, ᑐᑭᓯᑎᓪᓗᒍᓗ ᐊᖓᔪᖅᑳᑦ ᐃᕐᖐᓐᓇᖅ.
- ᐱᒻᒪᕆᐅᕗᖅ ᒪᓕᒡᓗᒋᑦ ᐋᖅᑭᒋᐊᕆᓂᕐᒧᑦ ᒪᓕᒃᑕᐅᕙᓪᓕᐊᕙᒃᑐᑦ ᐊᖏᙱᓐᓂᕐᒧᑦ ᐊᑦᑕᕐᓇᖅᑕᒥᒃ ᐱᓕᕆᐊᒃᓴᒥᒃ.
ᓴᓇᔨᐅᑉ ᐱᔭᒃᓴᕆᔭᖏᑦ
ᑭᒃᑯᓕᒫᑦ ᐱᓕᕆᐊᒃᓴᓖᑦ ᐃᖅᑲᓇᐃᔭᕐᕕᖕᒥ ᐊᑦᑕᕐᓇᖅᑕᐃᓕᒪᓂᕐᒧᑦ. ᐃᖅᑲᓇᐃᔭᕐᕖᑦ ᐊᖓᔪᖅᑳᓪᓗ ᐱᓕᕆᐊᒃᓴᖃᖃᑎᒌᒃᑲᓗᐊᖅᑎᓪᓗᒋᑦ ᐊᑦᑕᕐᓇᖅᑕᐃᓕᒪᖁᓪᓗᒋᑦ ᐃᖅᑲᓇᐃᔭᖅᑎᓕᒫᖏᑦ, ᐱᒻᒪᕆᐅᕗᖅ ᐊᑐᓂ ᐃᖅᑲᓇᐃᔭᖅᑎ ᐱᓕᕆᐊᖃᓪᓚᑦᑖᕐᓗᓂ ᐋᖅᑭᐅᒪᑎᑦᑎᓂᕐᒥᒃ ᐊᑦᑕᕐᓇᙱᑦᑐᒥᒃ ᐊᒻᒪ ᖃᓄᐃᙱᑦᑎᐊᕐᓇᖅᑐᒥᒃ ᐃᖅᑲᓇᐃᔭᕐᕕᖕᒥᒃ.
ᐃᓕᓐᓂᐊᑎᑦᑎᓂᖅ ᐊᒻᒪ ᐃᓕᓐᓂᐊᕐᓂᓕᕆᓂᕐᒧᑦ
ᐃᖅᑲᓇᐃᔭᕐᕕᒃᐱᑦ ᐊᒻᒪ ᐊᖓᔪᖅᑳᕕᑦ ᐱᓕᕆᐊᒃᓴᕆᔭᖓ ᐊᑐᐃᓐᓇᐅᑎᑦᑎᓗᑎᒃ ᐃᓕᖕᓄᑦ ᐃᓕᓐᓂᐊᒐᒃᓴᓗᒃᑖᓂᒃ ᐃᓕᓐᓂᐊᕆᐊᖃᖅᑕᕐᓂᒃ ᑐᑭᓯᐊᖁᓪᓗᑎᑦ ᖃᓄᖅ ᐃᖅᑲᓇᐃᔮᑦ ᐱᓕᕆᔪᓐᓇᕐᒪᖔᖅᐱᐅᒃ ᐊᑦᑕᕐᓇᙱᑦᑐᒃᑯᑦ. ᑕᑯᑎᑦᑎᔭᕆᐊᓖᑦ ᖃᓄᖅ ᐱᓕᕆᔪᓐᓇᕐᒪᖔᖅᐱᒋᑦ ᐱᓕᕆᐊᒃᓴᓗᒃᑖᑦ ᑎᓕᔭᐅᔾᔪᑎᒋᓯᒪᔭᑎᑦ ᐊᑦᑕᕐᓇᙱᑦᑐᒃᑯ. ᐱᓕᕆᐊᒃᓴᕆᔭᑦ ᒪᓕᒡᓗᒋᑦ ᒪᓕᒃᑕᐅᔭᕆᐊᓖᑦ ᐊᖓᔪᖅᑳᕕᑦ ᑐᓴᖅᑎᑦᑎᔾᔪᑎᒋᓯᒪᔭᖏᑦ. ᑐᑭᓯᐊᑦᑎᐊᓪᓗᐊᖅᑕᑎᑦ ᐱᓕᕆᐊᒃᓴᑎᑦ ᓈᒻᒪᒃᑐᒥᒃ ᐅᓂᒃᑳᕈᓐᓇᖅᓗᒋᑦ ᐊᖓᔪᖅᑳᕐᓄᑦ.
ᓇᓗᕈᔪᒃᑯᕕᑦ, ᐃᓕᓐᓂᐊᖅᑎᑕᐅᔪᒪᓗᑎᑦ
ᐱᒻᒪᕆᐅᔪᖅ ᐊᑐᓂ ᐃᖅᑲᓇᐃᔭᖅᑎ ᑐᑭᓯᐊᓗᓂ ᖃᓄᖅ ᐱᓕᕆᐊᒃᓴᓗᒃᑖᑦ ᐱᓕᕆᔭᕆᐊᖃᕐᒪᖔᑕ ᑎᓕᓯᔾᔪᑕᐅᓯᒪᔪᑦ ᐱᓕᕆᐊᖑᖁᓪᓗᒋᑦ ᐊᑦᑕᕐᓇᙱᑦᑐᒃᑯᑦ. ᐳᐃᒍᕐᓯᒪᓕᕈᕕᓪᓘᓐᓃᑦ ᐃᓕᓐᓂᐊᖅᑎᑕᐅᕌᓂᒃᓯᒪᙱᒃᑯᕕᓪᓘᓐᓃᑦ ᐱᓕᕆᐊᕆᖁᓪᓗᒍ ᐃᖅᑲᓇᐃᔮᑦ, ᑲᑉᐱᐊᓱᖃᑦᑕᙱᓪᓗᑎᑦ ᐊᐱᕆᔭᕆᐊᒃᓴᖅ. ᐊᖓᔪᖅᑳᑦ ᖃᐅᔨᒪᙱᑐᐃᓐᓇᕆᐊᓕᒃ ᐃᓕᓐᓂᐊᒃᑲᓐᓂᕆᐊᖃᕐᓂᕐᓂᑦ. ᐃᒃᐱᒍᓱᒃᑯᕕᑦ ᐃᕝᕕᑦ ᐊᓰᓪᓘᓐᓃᑦ ᐃᖅᑲᓇᐃᔭᖃᑎᒋᔭᑦ ᐃᓕᓐᓂᐊᒃᑲᓐᓂᕆᐊᖃᕐᓂᖓᓂᒃ ᐃᖅᑲᓇᐃᔮᑦ ᐊᑦᑕᕐᓇᙱᑦᑐᒃᑯᑦ ᐱᓕᕆᐊᖑᖁᓪᓗᒍ, ᐅᖃᐅᑎᓗᒍ ᐊᖓᔪᖅᑳᑦ. ᐱᓕᕆᑦᑕᐃᓕᒋᑦ ᖃᓄᑐᐃᓐᓇᖅ ᐱᓕᕆᐊᒃᓴᕐᓂᒃ ᑭᓯᐊᓂᓕ ᐃᓕᓐᓂᐊᖅᑎᑕᐅᑦᑎᐊᕌᓂᒃᑯᕕᑦ.
ᒪᓕᒡᓗᒋᑦ ᐊᑐᖅᑕᐅᔭᕆᐊᖃᕐᑐᑦ
ᐱᓕᕆᔾᔪᓰᑦ ᐊᑐᐃᓪᓚᐅᕗᑦ ᑭᒃᑯᓕᒫᑦ ᑐᑭᓯᐊᓪᓚᑦᑖᖁᓪᓗᒋᑦ ᖃᓄᖅ ᐱᓕᕆᐊᒃᓴᑦ ᐱᓕᕆᐊᖑᑦᑎᐊᕆᐊᖃᕐᒪᖔᑕ. ᐱᓕᕆᔾᔪᓰᑦ “ᐊᑦᑕᕐᓇᖅᑕᐃᓕᒪᓂᖃᙱᑦᑐᑦ” ᑕᐃᒎᓯᖏᓐᓂ ᓱᓕ ᒪᓕᒃᑕᐅᔪᒃᓴᖁᑎᖃᕆᐊᓖᑦ ᐱᓕᕆᐊᒃᓴᑦ ᐱᔭᕇᖅᑕᐅᖏᓐᓇᐅᔭᖁᓪᓗᒋᑦ ᐊᑦᑕᕐᓇᙱᑦᑐᒃᑯᑦ. ᖃᐅᔨᒃᑲᓐᓂᕈᒪᒍᕕᑦ ᐊᒻᒪ ᐊᑐᓕᕐᓗᒋᑦ ᐊᑕᖏᕐᓗᒋᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᒪᓕᒐᐃᑦ ᐱᓕᕆᔾᔪᓰᓪᓗ ᖃᐅᔨᒪᔭᕆᐊᖃᖅᑕᑎᑦ ᐱᓕᕆᐊᕆᖁᓪᓗᒍ ᐃᖅᑲᓇᐃᔮᑦ. ᑕᒪᓇ ᐱᖃᓯᐅᔾᔨᔪᖅ ᐃᓘᓐᓇᑎᒃ ᐱᖁᑏᑦ ᐊᒻᒪ ᓇᖕᒥᓂᖅ ᐋᓐᓂᖅᐃᓕᔾᔪᑏᑦ (PPE) ᐊᑑᑎᖃᑦᑎᐊᕐᓗᑎᒃ. ᐃᒃᐱᒍᓱᓚᐅᖅᓯᒪᒍᕕᑦ ᐱᓕᕆᔾᔪᓯᖅ ᓴᐳᔾᔨᓯᒪᖅᑰᔨᙱᓐᓂᖓᓂᒃ ᐊᑦᑕᕐᓇᖅᑕᐃᓕᒪᓂᖏᓐᓂᒃ ᐃᖅᑲᓇᐃᔭᖅᑏᑦ, ᐱᔪᓐᓇᐅᑎᖃᖅᑐᑎᑦ ᐃᒪᓐᓈᖅᑑᑎᓕᐅᕐᓗᑎᑦ ᐱᓕᕆᔾᔪᓯᖅ ᐊᑦᑕᕐᓇᙱᓐᓂᖅᓴᐅᖁᓪᓗᒍ.
ᐅᖃᐅᓯᕆᕙᒡᓗᒋᑦ ᖃᓄᐃᓪᓕᓃᑦ, ᐊᑦᑕᕐᓇᖅᑐᑦ ᖃᓄᐃᓕᖓᓃᑦ, ᐊᒻᒪ ᐊᑦᑕᕐᓇᖅᑐᑦ ᐃᖅᑲᓇᐃᔮᒥ ᐱᐅᓯᐅᕙᒃᑐᑦ
ᑕᑯᓯᒪᒍᕕᑦ ᐅᕝᕙᓘᓐᓃᑦ ᐃᓚᐅᓯᒪᒍᕕᑦ ᖃᓄᐃᓪᓕᓂᕐᒥ, ᐃᖅᑲᓇᐃᔭᕐᕕᖕᒥ ᖃᓄᐃᓕᖓᓃᑦ ᐊᑦᑕᕐᓇᖅᓯᒍᑎᒃ, ᑕᑯᒍᕕᑦ ᐊᑦᑕᕐᓇᖅᑐᒥᒃ ᐃᖅᑲᓇᐃᔭᕐᕕᖕᒥ ᐱᐅᓯᐅᕙᒃᑐᒥᒃ, ᐅᕝᕙᓘᓐᓃᑦ ᐱᖁᑎ ᓱᕋᒃᓯᒪᒍᓂ ᐊᑦᑕᕐᓇᙱᓪᓗᓂ ᐊᑐᖅᑕᐅᔪᓐᓇᙱᒃᑯᓂ, ᐅᖃᐅᓯᕆᑲᐅᑎᒋᓗᒋᑦ ᐊᖓᔪᖅᑳᕐᓄᑦ ᐃᕐᖐᓐᓇᖅ.
ᖃᐅᔨᒪᓗᒋᑦ ᐃᖅᑲᓇᔭᕐᕕᖕᓂ ᑐᐊᕕᕐᓇᖅᑐᓕᕆᔾᔪᑎᓄᑦ ᐸᕐᓇᐅᑏᑦ
ᐃᖅᑲᓇᐃᔭᕐᕖᑦ ᑭᒃᑯᓕᒫᓂᒃ ᖃᐅᔨᒪᑎᑦᑎᔭᕆᐊᓖᑦ ᖃᓄᐃᓕᐅᕆᐊᖃᕐᒪᖔᑦ ᑐᐊᕕᕐᓇᖅᑐᖃᖅᑎᓪᓗᒍ; ᐃᑭᑦᑐᖃᓕᖅᑎᓪᓗᒍ ᖁᖁᐊᕈᑎᐅᒐᓗᐊᕈᓂ, ᐆᒻᒪᖅᑯᑏᑦ ᐊᔪᓕᕈᑎᒃ, ᐅᕝᕙᓘᓐᓃᑦ ᐊᓯᖏᑦ ᖃᓄᐃᓪᓕᓃᑦ. ᐃᖅᑲᓇᐃᔭᕐᕖᑦ ᐃᓘᓐᓇᑎᒃ ᐃᖅᑲᓇᐃᔭᖅᑎᓂᒃ ᓱᖏᐅᑎᓯᒪᓪᓚᑦᑖᖅᑎᑦᑎᔭᕆᐊᓖᑦ ᑐᐊᕕᕐᓇᖅᑐᓕᕆᓂᕐᒧᑦ ᐸᕐᓇᐅᑎᓂᒃ, ᐊᒻᒪ ᑐᓂᓯᓯᒪᓗᑎᒃ ᐊᔾᔨᖓᓂᒃ ᑕᑯᔭᐅᓴᕋᐃᓪᓗᑎᒃ ᐊᑐᓂ ᐃᖅᑲᓇᐃᔭᖅᑎᓄᑦ.