ᐃᖅᑲᓇᐃᔭᕐᕖᑦ, ᐊᑕᐅᓯᕐᒥᒃ ᐃᖅᑲᓇᐃᔭᖅᑏᑦ ᑐᑭᓯᔭᕆᐊᖃᕈᑎᒃ, ᐃᒪᐃᑦᑑᔪᖅ ᑭᒃᑯᓕᒫᑦ ᐱᓕᕆᐊᒃᓴᓖᑦ ᐃᖅᑲᓇᐃᔭᕐᕕᖕᒥ ᐊᑦᑕᕐᓇᖅᑕᐃᓕᒪᓂᕐᒥᒃ. ᐃᑲᔪᕐᓗᒋᑦ ᐃᖅᑲᓇᐃᔭᖅᑎᑎᑦ ᑐᑭᓯᓗᑎᒃ ᐱᔪᓐᓇᐅᑎᖏᓐᓂᒃ ᐱᓕᕆᐊᒃᓴᖏᓐᓂᓪᓗ ᖃᐅᔨᑎᑦᑎᓂᒃᑯᑦ ᐅᖃᐅᓯᐅᔪᒥᒃ ᐃᖅᑲᓇᐃᔭᕐᕕᔅᓯᓐᓄᑦ. ᐊᔭᐅᖅᑐᐃᓐᓇᐅᔭᕐᓗᒋᑦ ᐃᖅᑲᓇᐃᔭᖅᑏᑦ ᐊᐱᕆᖁᓗᒋᑦ ᐊᐱᖅᑯᑎᓂᒃ ᐊᒻᒪ ᐃᒪᓐᓈᖅᑑᑎᓕᐅᕐᓗᑎᒃ.
ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ (WSCC) ᐃᑲᔫᑎᓕᖕᓂᒃ ᑕᑯᔭᒃᓴᓖᑦ ᖃᐅᔨᒪᔾᔪᑎᑕᖃᖅᖢᓂᓗ ᐃᑲᔪᕈᓐᓇᖅᑐᑦ ᐊᑐᕐᓗᑎᑦ ᐃᑲᔪᖁᓪᓗᒋᑦ ᑎᑎᕋᐅᔭᖅᓯᒪᔪᑦ ᐃᖅᑲᓇᐃᔭᖅᑏᑦ ᐱᔪᓐᓇᐅᑎᖏᑦ ᐊᑐᖅᑕᐅᑎᓪᓗᒋᑦ ᐅᑭᐅᖅᑕᖅᑐᒥ ᐃᖅᑲᓇᐃᔭᕐᕕᐅᒐᔪᒃᑐᓂ.
ᒪᓕᒋᐊᓕᒃ 1 - ᓂᕕᙵᖅᓯᓂᖅ ᐊᑭᓐᓇᕐᒥᐅᑕᓂᒃ ᑎᑎᕋᕐᕕᔅᓯᓐᓂ.
ᐅᓄᖅᑐᓕᐅᕐᓗᒋᑦ ᐊᑐᐃᓐᓇᐅᔪᑦ ᐃᖅᑲᓇᐃᔭᖅᑏᑦ ᐱᔪᓐᓇᐅᑎᖏᑦ ᐊᑭᓐᓇᕐᒥᐅᑕᑦ ᐊᒻᒪ ᓂᕕᙵᕐᓗᒋᑦ ᑎᑎᕋᕐᕕᔅᓯ ᑐᑭᓯᒋᐊᕈᑎᓂᒃ ᓂᕕᙵᖅᓯᕕᖕᒥ. ᑐᒃᓯᕋᕈᓐᓇᕐᒥᔪᑎᑦ ᐋᖅᑭᒃᓱᖅᓯᒪᔪᓂᒃ ᐅᓄᖅᑐᓕᐅᖅᓯᒪᔪᓂᒃ ᑎᑎᖅᑲᖁᑎᓂᒃ ᑖᒃᑯᓇᙵᑦ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᓂᑦ (WSCC).
ᒪᓕᒋᐊᓕᒃ 2 - ᐃᓚᓕᐅᑎᓗᒋᑦ ᐃᖅᑲᓇᐃᔭᖅᑏᑦ ᐱᔪᓐᓇᐅᑎᖏᓐᓄᑦ ᑕᑯᓐᓇᙳᐊᒐᐃᑦ ᐃᖅᑲᓇᐃᔭᕐᕕᔅᓯᓐᓂ ᐃᓗᐊᒍ ᑐᓴᐅᒪᖃᑎᒌᒍᑎᔅᓯᒍᑦ.
ᐊᑕᐅᓯᕐᒥᒃ ᐃᖅᑲᓇᐃᔭᖅᑏᑦ ᐱᔪᓐᓇᐅᑎᖏᓐᓄᑦ ᑕᑯᓐᓇᙳᐊᒐᖅᑕᓕᒃ ᐊᑐᓂ ᐱᖓᓱᓄᑦ ᐃᖅᑲᓇᐃᔭᖅᑏᑦ ᐱᔪᓐᓇᐅᑎᖏᓐᓄᑦ. ᑕᑯᔭᐅᔪᓐᓇᖅᑐᑦ ᐅᖃᓕᒫᒐᕋᓛᑦᑎᓐᓂ. ᐊᑐᓕᖁᔨᓯᒪᔪᒍᑦ ᑐᕌᒐᖃᕐᓗᑎᒃ ᐊᑕᐅᓯᕐᒥᒃ ᐃᖅᑲᓇᐃᔭᖅᑏᑦ ᐱᔪᓐᓇᐅᑎᖏᓐᓄᑦ ᐊᑐᓂ ᑐᓴᐅᒪᖃᑎᒌᒍᑎᓂᑦ ᓇᒃᓯᐅᑎᔭᕐᓂ. ᑕᒪᒃᑯᐊ ᑕᑯᓐᓇᙳᐊᒐᐃᑦ ᓴᖅᑭᔮᖅᑎᑦᑎᔪᑦ ᖃᓄᖅ ᐊᑐᖅᑕᐅᔪᓐᓇᕐᒪᖔᑕ ᑕᒪᒃᑯᐊ ᐃᖅᑲᓇᐃᔭᖅᑏᑦ ᐱᔪᓐᓇᐅᑎᖏᑦ ᐃᖅᑲᓇᐃᔭᕐᕕᖕᒥ. ᓈᒻᒪᑦᑎᐊᖅᑰᔨᙱᓛᑦ ᐃᖅᑲᓇᐃᔭᕐᕕᖕᓄᑦ? ᐃᓱᒪᓇᓱᒡᓗᑎᑦ ᓇᖕᒥᓂᖅ ᐃᔾᔪᐊᒐᒃᓴᒥᒃ ᐃᖅᑲᓇᐃᔭᖅᑎᖕᓂ ᐊᑐᖅᑕᐅᑐᐃᓐᓇᕆᐊᓕᖕᓂᒃ.
ᒪᓕᒋᐊᓕᒃ 3 - ᐊᔭᐅᖅᑐᕐᓗᒋᑦ ᐃᖅᑲᓇᐃᔭᖅᑏᑦ ᐃᓚᐅᑦᑎᐊᖁᓪᓗᒋᑦ.
ᓯᕗᓪᓕᖅᐸᓪᓗᑎᒃ ᐅᐸᖑᑎᓲᑦ ᐃᑲᔫᑎᒃᓴᑦᑎᐊᕙᐅᕗᑦ ᓴᖅᑮᓇᓱᖕᓂᕐᒧᑦ ᐊᑦᑕᕐᓇᙱᓐᓂᖅᓴᒥᒃ ᐃᖅᑲᓇᐃᔭᕐᕕᖕᓂᒃ, ᖃᐅᔨᒪᓪᓚᑦᑖᕐᓗᑎᒃ ᓇᒧᙵᐅᔭᕆᐊᒃᓴᖅ ᐊᐱᖅᑯᑎᖃᕈᑎᒃ, ᐃᓱᒫᓘᑎᖃᕈᑎᒃ ᐊᒻᒪ ᖃᓄᓪᓕᔪᖃᖅᑎᓪᓗᒍ ᐅᓂᒃᑳᓕᐅᕈᑎᓂᒃ. ᓴᖅᑮᓗᑎᑦ ᓴᙱᔪᒥᒃ ᐊᑦᑕᕐᓇᖅᑕᐃᓕᒪᓂᕐᒧᑦ ᐱᖅᑯᓯᕐᒥᒃ ᐊᔭᐅᖅᑐᐃᖏᓐᓇᐅᔭᕐᓂᒃᑯᑦ ᐃᖅᑲᓇᐃᔭᖅᑎᓂᒃ ᐅᖃᐅᓯᖃᖃᑦᑕᖁᓗᒋᑦ.
ᒪᓕᒋᐊᓕᒃ 4 - ᑐᑭᓯᐊᓂᖅ ᑕᒪᓐᓇ ᐊᑦᑕᕐᓇᖅᑕᐃᓕᒪᓂᖅ ᐋᖅᑭᒃᐸᓪᓕᐊᖏᓐᓇᐅᔭᕐᒪᑦ.
ᐊᑦᑕᕐᓇᖅᑕᐃᓕᒪᓂᖅ ᕿᒥᕐᕈᐊᑐᐃᓐᓇᐅᙱᑦᑐᖅ ᖁᓕᕈᐊᕐᒥ, ᐃᓚᒋᔭᐅᓪᓗᐊᖅᑐᑦ ᖃᐅᑕᒫᑦ ᐃᖅᑲᓇᐃᔭᕐᓇᒥ ᐅᓪᓗᖓᓂ. ᑐᓴᒐᒃᓴᖃᒐᔪᖃᑦᑕᕐᓗᑎᑦ ᐃᖅᑲᓇᐃᔭᖅᑎᓄᑦ ᖃᓄᑐᐃᓐᓇᖅ ᐊᑦᑕᕐᓇᖅᑕᐃᓕᒪᓂᕐᒧᑦ ᐃᓱᒫᓘᑕᐅᔪᓂᒃ ᐊᒃᑐᐃᔪᓂᒃ ᑖᒃᑯᓂᖓ. ᐊᔭᐅᖅᑐᖅᐸᒡᓗᖏᑦ ᐃᖅᑲᓇᐃᔭᖅᑎᑎᑦ ᐱᔭᕆᐅᖅᓴᓗᑎᒃ ᐱᔪᓐᓇᐅᑎᖏᓐᓂᒃ ᐃᓚᐅᓂᕐᒧᑦ ᓇᓗᓇᐃᕐᓗᒋᑦ ᐱᐅᓯᒋᐊᕈᑎᐅᑐᐃᓐᓇᕆᐊᓖᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᐊᑐᐊᒐᔅᓯᖓᓐᓂᒃ ᐊᒻᒪ ᐱᓕᕆᔾᔪᓯᔅᓯᓐᓂᒃ. ᑐᑭᓯᒋᐊᕈᑎᓄᑦ, ᐃᑲᔪᖅᑐᖅᑕᐅᓂᕐᒧᑦ, ᐊᒻᒪ ᐃᑲᔫᑎᒃᓴᓄᑦ ᑎᒥᖁᑏᑦ ᑭᓱᓕᒫᖃᓪᓚᑦᑖᖁᓪᓗᒍ ᑭᙴᒪᔭᔅᓯᓐᓂᒃ ᐊᑦᑕᕐᓇᖅᑕᐃᓕᒪᓂᕐᒧᑦ ᐱᓕᕆᐊᔅᓯᓐᓄᑦ, ᖃᐅᔨᒋᐊᕈᒃ ᐊᑦᑕᕐᓇᖅᑕᐃᓕᒪᓂᕐᒧᑦ ᐸᕐᓇᐃᓂᕐᒧᑦ ᖃᐅᔨᒪᔾᔪᑎᕗᑦ.
