ᔭᓗᓇᐃᕝ, ᓄᓇᑦᓯᐊᖅ/ᐃᖃᓗᐃᑦ, ᓄᓇᕗᑦ (ᐱᖓᑦᓯᖅ, ᓯᑎᐱᕆ 16, 2026) – ᐊᐅᓚᑦᑎᓂᕐᒧᑦ ᑲᑎᒪᔩᑦ ᐅᑯᓄᖓ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᓄᑦ (WSCC) ᑐᓴᖅᑎᑦᑎᔪᑦ ᐊᖓᔪᖅᑳᕆᔭᐅᔪᖅ ᓄᖅᑲᕐᓂᐊᓕᕐᓂᖓᓂ ᐃᓐᓇᐅᓂᕐᒧᑦ ᐊᒻᒪ ᐊᖓᔪᖅᑳᖅ ᐊᐅᓚᑦᑎᔨ ᕆᒃ ᕼᐊᓐᑦ ᐊᒻᒪᓗ ᑎᒃᑯᐊᖅᑕᐅᓂᖓᓂ ᕼᐋᕐᒦᑦ ᔭᒡᐹᓪ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᓄᑦ (WSCC) ᐊᖓᔪᖅᑳᙳᓛᕐᓂᖓᓂ ᐊᒻᒪ ᐊᖓᔪᖅᑳᕆᔭᐅᓕᕐᓗᓂ ᐊᐅᓚᑦᑎᔨᐅᓗᓂ.
“ᑭᒡᒐᖅᑐᐃᓪᓗᖓ ᐊᐅᓚᑦᑎᓂᕐᒧᑦ ᑲᑎᒪᔨᓂ, ᖁᔭᓕᔪᒪᕗᖓ ᕆᒃᒥᑦ ᓯᕗᓕᐅᖅᑎᐅᑦᑎᐊᑲᑕᓚᐅᕐᓂᖓᓂ ᐊᒻᒪ ᐱᔨᑦᑎᕋᓚᐅᕐᓂᖓᓂᒃ ᐅᑯᓄᖓ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᓄᑦ (WSCC),” ᐅᖃᕐᑐᖅ ᔭᓂ ᐳᕈᔅ, ᐃᒃᓯᕙᐅᑕᖅ ᐅᑯᓄᖓ ᐊᐅᓚᑦᑎᓂᕐᒧᑦ ᑲᑎᒪᔨᓄᑦ. “ᖃᓄᐃᓕᐅᕈᑎᒃᓴᓂ ᐅᔾᔨᕈᓱᑦᑎᐊᕐᓂᖓᓂ ᑲᑐᔾᔨᖃᑎᒌᓂ ᓯᕗᓂᒃᓴᒧᑦ ᐸᕐᓇᒃᓯᒪᑎᑦᑎᐊᓚᐅᕐᑐᖅ, ᑲᒪᒋᔭᖃᕐᓯᓐᓈᑦ ᐃᖅᑲᓇᐃᔭᖅᑎᐅᔪᑦ ᐱᔭᕆᐊᖃᖅᑕᖏᓐᓂᒃ ᐊᒻᒪ ᐃᖅᑲᓇᐃᔭᖅᑎᑦᑎᔨᐅᔪᑦ ᓄᓇᑦᓯᐊᕐᒥ ᐊᒻᒪ ᓄᓇᕗᒥᑦ. ᖁᕕᐊᓲᑎᕙᕗᑦ ᕆᒃ ᓄᖅᑲᕐᓂᐊᓕᖅᑎᓪᓗᒍ ᐃᓐᓇᐅᓂᕐᒧᑦ ᐊᒻᒪᓗ ᐃᓱᒪᒋᓪᓗᒍ ᑖᓐᓇ ᐃᓚᖏᓪᓗ ᖃᓄᐃᖁᙱᓘᑎᒍᑦ.”
ᕼᐋᕐᒦᑦ ᔭᒡᐹᓪ ᒫᓐᓇ ᐊᖓᔪᖅᑳᒧᑦ ᑐᒡᓕᕆᔭᐅᔪᖅ ᖃᓄᐃᓕᐅᖅᐸᓪᓕᐊᓂᕐᒧᑦ ᐊᒻᒪ ᐱᓕᕆᕝᕕᐅᑉ ᐱᔨᑦᑎᕋᐅᑎᖏᓐᓄᑦ ᐅᑯᓇᓂ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᓄᑦ (WSCC) ᐊᒻᒪᓗ ᐊᑯᓂᕈᓗᒃ ᑲᑐᔾᔨᖃᑎᒌᓄᑦ ᐱᓕᕆᔨᒻᒪᕆᐅᖃᑕᐅᓯᒪᓕᖅᖢᓂ. ᐊᕐᕌᒍᓂ ᐊᕙᑎᓂ ᐱᓕᕆᐊᖃᓕᒪᓪᓗᓂ ᐊᒻᒪᓗ ᑐᑭᓯᓯᒪᑦᑎᐊᖅᖢᓂ ᐅᑯᐊ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᑦ (WSCC) ᐊᐅᓚᑕᖏᓐᓂᒃ ᐊᒻᒪ ᐱᓇᓱᐊᒐᖏᓐᓂᒃ.
ᐃᖅᑲᓇᐃᔭᖅᑎᓪᓗᒍ ᐅᑯᓇᓂ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᓄᑦ (WSCC), ᐱᓕᕆᔨᒻᒪᕆᐅᓂᒃᑯᑦ ᓯᕗᓕᐅᕐᑎᐅᓯᒪᔪᖅ, ᐃᓚᒋᓪᓗᒍ ᐊᖓᔪᖅᑳᒧᑦ ᑐᒡᓕᕆᔭᐅᓪᓗᓂ ᐱᓕᕆᕝᕕᒃᒥ ᐱᔨᑦᑎᕋᐅᑎᓕᕆᔨᓂ ᐊᒻᒪ ᐊᖓᔪᖅᑳᖑᓪᓗᓂ ᑐᓴᐅᒪᑎᑦᑎᔨᐅᓂᕐᒥᒃ ᐊᒻᒪᓗ ᐊᖓᔪᖅᑳᖑᑲᐃᓐᓇᖅᖢᓂ, ᐊᒻᒪ ᐊᖓᔪᖅᑳᖅ ᐊᐅᓚᑦᑎᔨᐅᓪᓗᓂ.
“ᐊᐅᓚᑦᑎᓂᕐᒧᑦ ᑲᑎᒪᔩ ᖁᕕᐅᓱᒃᑐᑦ ᑎᒃᑯᐊᕐᓯᓂᕐᒥᖕᓂ ᕼᐋᒦᑦᒥ ᐅᑯᓄᖓ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᓄᑦ (WSCC) ᐊᖓᔪᖅᑳᙳᕐᓂᐊᕐᓂᖓᓂ ᐊᒻᒪ ᐊᖓᔪᖅᑳᖅ ᐊᐅᓚᑦᑎᔨᐅᓕᕐᓗᓂ,” ᐅᖃᕐᑐᖅ ᐳᕉᔅ. “ᐊᑯᓂᕈᓗᒃ ᐅᑭᐅᕐᑕᖅᑐᕐᒥᐅᑕᐅᓪᓗᓂ ᐊᒻᒪ ᐊᐅᓚᑦᑎᔨᐅᓕᒪᓪᓗᓂ, ᑐᑭᓯᓯᒪᑦᑎᐊᕐᑐᖅ ᐅᑯᓂᖓ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᓂ (WSCC), ᐊᐅᓚᑦᑎᔾᔪᓯᖏᓐᓂᒃ, ᐊᒻᒪᓗ ᐃᖅᑲᓇᐃᔭᖅᑎᑦᑎᔪᓂᒃ, ᐃᖅᑲᓇᐃᔭᖅᑐᓂᒃ ᐊᒻᒪ ᓄᓇᓕᖕᓂ ᐱᔨᑦᑎᕋᖅᑕᖏᓐᓂᒃ. ᐱᓇᓱᐊᒐᖃᖅᑐᖅ ᐊᑦᑕᓇᙱᑦᑐᓂᒃ, ᑕᒪᐃᑎᒍᑦ ᐊᒻᒪ ᐃᓱᒪᒋᔭᖃᑦᑎᐊᖅᑐᓂᒃ ᓴᓇᕝᕕᖕᓂ ᐊᒻᒪᓗ ᐱᓕᕆᖃᑎᖃᕐᓂᕐᒥ ᐱᐅᓯᕚᓪᓕᖅᑎᑦᑎᓇᓱᒃᖢᑎᒃ ᐊᑦᑕᓇᖅᑐᒦᑦᑕᐃᓕᓂᕐᒥᒃ ᐊᒻᒪ ᑲᒪᒋᔭᖃᑦᑎᐊᕐᓂᕐᒥᒃ ᐅᑭᐅᕐᑕᖅᑐᕐᒥ.”
“ᖁᕕᐊᓱᒃᑐᖓ ᐱᔨᑦᑎᕋᕈᓐᓇᕐᓂᐊᕋᒪ ᐅᑯᓄᖓ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᓄᑦ (WSCC) ᐊᖓᔪᖅᑳᖑᓕᕈᒪ ᐊᒻᒪ ᐊᖓᔪᖅᑳᖅ ᐊᐅᓚᑦᑎᔨᐅᓂᕐᒥᒃ,” ᐅᖃᕐᑐᖅ ᕼᐋᒦᑦ. “ᓯᓄᒧᑦ ᐱᓇᓱᑦᑎᐊᕋᓱᒻᒪᕆᒃᑐᖓ ᐃᖅᑲᓇᐃᔭᖅᕕᒃᓂ ᐋᓐᓂᐊᖃᖅᑕᐃᓕᑎᑦᑎᓂᕐᒥᒃ ᐊᒻᒪ ᐊᑦᑕᓇᖅᑐᒦᑦᑕᐃᓕᑎᑦᑎᓂᕐᒥᒃ, ᐃᓕᖅᑯᓯᒃᑯᑦ ᐊᑦᑕᓇᖅᑐᒦᑦᑕᐃᓕᓂᕐᒥᒃ, ᐊᒻᒪᓗ ᐃᖅᑲᓇᐃᔮᖏᓐᓂ ᐋᓐᓂᖅᑐᑦ ᐃᓱᒪᒋᔭᐅᑦᑎᐊᕐᓗᑎᒃ ᑲᒪᒋᔭᐅᑦᑎᐊᕈᓐᓇᖁᓪᓗᒋᑦ.”
ᕼᐋᒦᑦ ᐃᖅᑲᓇᐃᔮᕆᓂᐊᖅᑕᖓᓄᑦ ᓄᒃᑎᖅᐸᓪᓕᐊᓂᐊᓕᖅᑐᑦ ᐅᓇᓗ ᕆᒃ ᐅᑐᐱᕆ 1-ᒥ ᐊᒻᒪᓗ ᐊᖓᔪᖅᑳᙳᓪᓚᕆᒡᓗᓂ ᐊᒻᒪ ᐊᖓᔪᖅᑳᖅ ᐊᐅᓚᑦᑎᔨᙳᓪᓚᕆᒡᓗᓂ ᔮᓐᓄᐊᕆ 15, 2027-ᒥ.
-30-
Maggie Collins (ᒫᒋ ᑳᓕᓐᔅ)
ᑐᓴᒐᒃᓴᓕᕆᓂᖅ ᐊᒻᒪᓗ ᑭᒃᑯᑐᐃᓐᓇᕐᓄᑦ ᐱᓇᓱᐊᖅᑎᑦ ᐊᐅᓚᑦᓯᔨᖓ
ᐅᖄᓚᐅᑦ: (867) 920-3854