ᐃᖃᓗᐃᑦ, ᓄᓇᕗᑦ (ᓯᑎᐱᕆ 15, 2025) – ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ (WSCC) ᖁᕕᐊᓱᒃᑐᑦ ᓴᖅᑮᔭᕆᐊᒃᓴᖅ ᓄᑖᒥᒃ ᐃᖅᑲᓇᐃᔭᖅᑏᑦ ᐱᔪᓐᓇᐅᑎᖏᓐᓂᒃ ᐅᔾᔨᕈᓱᖕᓂᕐᒧᑦ ᐅᔾᔨᕈᓱᓕᖅᑎᑦᑎᓇᓱᐊᕐᓂᕐᒥᒃ ᐅᓪᓗᒥ ᑕᐃᑲᓂ ᓄᓇᕘᒥ ᐱᓕᕆᕝᕖᑦ ᓇᒻᒥᓂᕆᔭᐅᔪᓪᓗ ᑕᑯᒃᓴᐅᑎᑦᑎᓂᖏᑦ ᐃᖃᓗᖕᓂ.
ᐅᔾᔨᕈᓱᓕᖅᑎᑦᑎᓇᓱᐊᕐᓂᖅ – ᐃᖅᑲᓇᐃᔭᕐᓂᖅ ᐊᑦᑕᓇᔾᔭᐃᖅᓯᒪᓂᒃᑯᑦ. ᑭᒃᑯᓕᒫᑦ ᐱᓕᕆᐊᒃᓴᖓ – ᑐᕌᒐᖃᖅᑐᑦ ᑭᒃᑯᓕᒫᓂᒃ ᐅᔾᔨᕈᓱᒃᑎᑦᑎᒋᐊᓪᓚᒡᓗᑎᒃ ᐱᖓᓱᓂᑦ ᑐᑦᑕᕐᕕᓪᓗᐊᑕᕐᓂᒃ ᐊᑦᑕᕐᓇᖅᑕᐃᓕᒪᓂᕐᒥ ᐱᔪᓐᓇᐅᑎᖏᓐᓂᒃ ᓄᓇᓕᖕᓂ ᓄᓇᕗᓗᒃᑖᒥ. ᑕᒪᒃᑯᐊ ᐱᔪᓐᓇᐅᑏᑦ ᐃᒪᐃᑦᑑᔪᑦ:
- ᐱᔪᓐᓇᐅᑎᖃᕐᓂᖅ ᖃᐅᔨᒪᓂᕐᒧᑦ ᖃᓄᖅ ᐱᓕᕆᐊᕆᔭᕆᐊᖃᕐᒪᖔᑦ ᐃᖅᑲᓇᐃᔮᑦ ᐊᑦᑕᕐᓇᙱᑦᑐᒃᑯᑦ
- ᐱᔪᓐᓇᐅᑎᖃᕐᓂᖅ ᐃᓚᐅᓂᕐᒧᑦ ᐊᒻᒪ ᐃᓚᐅᓗᑎᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᐸᕐᓇᐃᓂᕐᓂ
- ᐱᔪᓐᓇᐅᑎᖃᕐᓂᖅ ᐋᒃᑳᕈᓐᓇᓂᕐᒧᑦ ᐅᕝᕙᓘᓐᓃᑦ ᐋᒃᑳᖅᓯᒪᓂᖅ ᐃᖅᑲᓇᐃᔮᒥᒃ ᐱᓕᕆᐊᒃᓴᒥᓪᓘᓐᓃᑦ ᐊᑦᑕᕐᓇᕋᓱᒋᒍᕕᐅᒃ
“ᐃᖅᑲᓇᐃᔭᖅᑏᑦ ᖃᐅᔨᒪᔭᕌᖓᒥᒃ ᐊᑦᑕᕐᓇᖅᑕᐃᓕᒪᓂᕐᒧᑦ ᐱᔪᓐᓇᐅᑎᖏᓐᓂᒃ, ᐊᔪᕈᓐᓃᖅᐹᓪᓕᖅᓯᒪᖅᑰᔨᓲᑦ ᓂᓪᓕᐊᔾᔪᑎᖃᕆᐊᒃᓴᖅ ᐊᒻᒪ ᐱᓕᕆᐊᖃᕐᓗᑎᒃ ᐋᓐᓂᖅᑳᖅᑎᓐᓇᒋᑦ, ᐋᓐᓂᐊᓕᖅᑳᖅᑎᓐᓇᒋᑦ, ᐅᕝᕙᓘᓐᓃᑦ ᐱᐅᙱᓐᓂᖅᓴᐅᓕᖅᑳᖅᑎᓐᓇᒍ.” ᐅᖃᖅᑐᖅ ᕆᒃ ᕼᐊᓐᑦ, ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ (WSCC) ᐊᖓᔪᖅᑳᖓᑦ ᐊᐅᓚᑦᑎᔨᒻᒪᕆᖓᓪᓗ.
ᖁᕕᐊᓲᑎᒋᓗᒍ ᓴᖅᑭᑕᐅᓂᖓ, ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ (WSCC) ᐱᓕᕆᑎᑦᑎᓂᐊᖅᑐᑦ ᑕᖅᑭᓕᒫᒥᒃ “ᐊᑦᑕᕐᓇᖅᑕᐃᓕᒪᓂᕐᒧᑦ ᒧᒥᕐᓂᖅ” ᑕᕐᕆᔭᐅᑎᒃᑯᑦ ᓵᓚᖃᕋᓱᐊᖅᑎᑦᑎᓂᕐᒥᒃ. ᐃᓚᐅᔪᑦ ᐃᓚᐅᔪᓐᓇᕐᓂᐊᖅᑐᑦ ᓴᖅᑮᓗᑎᒃ ᑕᕐᕆᔮᒃᓴᒥᒃ ᐱᕕᖃᖁᓪᓗᒋᑦ ᓵᓚᖃᕐᓂᕐᒧᑦ ᓵᓚᖃᐅᓯᐊᒃᓴᓂᒃ. ᑐᕌᒐᕆᔭᐅᔪᖅ ᓵᓚᖃᖅᑎᑦᑎᓇᓱᐊᕐᓂᕐᒥ ᓴᖅᑭᔮᖅᑎᑦᑎᖁᓪᓗᒋᑦ ᑕᒪᓐᓇ ᐊᑦᑕᕐᓇᖅᑕᐃᓕᒪᓂᖅ ᐃᓂᖃᕐᓂᖓᓄᑦ ᐊᑐᓂ ᐃᖅᑲᓇᐃᔭᕐᕕᖕᓂ ᐊᒻᒪ ᐊᑐᓂ ᓄᓇᓕᖕᓂ.
“ᑕᐃᒪᙵᓂᑦ 2020−ᒥᑦ, ᐅᖓᑖᓂ 5000 ᐃᓄᐃᑦ ᐋᓐᓂᖅᓯᒪᔪᑦ ᐃᖅᑲᓇᐃᔭᖅᖢᑎᒃ ᓄᓇᕗᒻᒥ. ᐱᓂᐊᒐᒃᓴᖓᑦ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ (WSCC) ᑖᔅᓱᒥᖓ ᓈᓴᐅᑎᒥᒃ ᐱᑕᖃᕈᓐᓃᖅᑎᑦᑎᓗᑎᒃ. ᐊᔭᐅᖅᑐᕈᒪᔭᐃᓐᓈᓗᒃᑯᑦ ᑭᒃᑯᓕᒫᑦ ᐃᓚᐅᖁᓪᓗᖏᑦ ᑕᕝᕙᓂ ᐅᔾᔨᕈᓱᓕᖅᑎᑦᑎᓇᓱᐊᕐᓂᕐᒥ ᑐᓴᖃᑎᒌᒍᑎᖃᕐᓂᒃᑯᑦ ᑎᑎᖅᑲᖁᑎᓂᒃ ᐅᕝᕙᓘᓐᓃᑦ ᐃᓚᐅᓗᑎᒃ ᑕᕐᕆᔭᐅᑎᒃᑯᑦ ᓵᓚᖃᖅᑎᑦᑎᓇᓱᐊᕐᓂᕐᒥ ᐊᒻᒪ ᓴᖅᑭᔮᖅᑎᑦᑎᓗᑎᒃ ᖃᓄᖅ ᑐᑭᖃᕐᒪᖔᑦ ᐊᑦᑕᕐᓇᖅᑕᐃᓕᒪᓂᖅ ᐃᓕᖕᓄᑦ,” ᐅᖃᖅᑐᖅ ᕼᐋᓐᑦ.
ᑕᒪᓐᓇ ᐅᔾᔨᕈᓱᓕᖅᑎᑦᑎᓇᓱᖕᓂᖅ ᐱᖃᓯᐅᔾᔨᔪᖅ ᐅᓄᖅᑐᓕᐅᖅᓯᒪᔪᓂᒃ ᐃᓕᓐᓂᐊᕈᑎᒃᓴᓂᒃ ᐃᑲᔫᑎᒃᓴᓂᒃ ᓲᕐᓗ ᐊᑭᓐᓇᕐᒧᐊᖅᑕᐅᔪᓐᓇᖅᑐᑦ ᐊᒻᒪ ᐅᖃᓕᒫᒐᕋᓛᑦ ᓇᒃᓯᐅᔾᔭᐅᓛᖅᑐᑦ ᓄᓇᓕᖕᓄᑦ ᓄᓇᕗᓗᒃᑖᒥ. ᑎᑎᖅᑲᐃᑦ ᑐᕌᒐᖃᖅᑐᑦ ᐃᑲᔪᖁᓪᓗᒋᑦ ᐃᖅᑲᓇᐃᔭᖅᑎᓂᒃ, ᐱᓗᐊᖅᑐᒥᒃ ᒪᒃᑯᒃᑐᓂᒃ, ᓇᓗᓇᐃᔭᐃᖁᓪᓗᒋᑦ ᐊᑦᑕᕐᓇᖅᑕᓂᒃ ᐃᖅᑲᓇᐃᔮᓂᒃ ᐊᒻᒪ ᓴᖅᑮᓯᒪᓪᓗᓂ ᐅᖃᓕᒫᒐᕋᓛᑐᑦ ᐋᖅᑭᒃᓯᒪᔪᓂᒃ ᑎᑎᕋᐅᔭᖅᓯᒪᔪᓂᒃ ᐃᓄᒃᑎᑑᖅᑐᕐᓗ ᓂᐱᓕᐅᖅᓯᒪᔪᖅ ᐱᐅᓪᓚᕆᒃᑐᒥᒃ ᑲᓇᑕᒥᐅᑕ ᓂᔾᔭᐅᑦ, ᐊᑦᑕᕐᓇᖅᑕᐃᓕᒪᓂᕐᒧᑦ ᒧᒥᕐᓂᖅ ᒪᓐᑐᕆᐊᒥᐅᑕᑦ ᓂᐅᔾᔭᐅᓯᔭᖅᑏᑦ ᐊᖑᑏᑦ ᓇᓴᖃᙱᑦᑐᑦ, ᐃᙱᖅᖢᓂ ᔫᓅᒧᑦ ᓂᕈᐊᒐᒃᓴᓕᐊᖑᓯᒪᔪᖅ ᓄᓇᕗᒻᒥᐅᑕᖅ ᓂᔾᔭᐅᓯᔭᖅᑎ, ᑎᐅᕆ ᐅᔭᕋᒃ.
ᑕᑯᒋᐊᕐᓗᒍ ᖃᕆᓴᐅᔭᒃᑯᑦ wscc.nu.ca ᖃᐅᔨᒃᑲᓐᓂᕈᒪᒍᕕᑦ ᐅᔾᔨᕈᓱᓕᖅᑎᑦᑎᓇᓱᒃᑎᐅᑉ ᒥᒃᓵᓄᑦ ᐊᒻᒪ ᖃᓄᖅ ᐃᓚᐅᔪᓐᓇᕐᒪᖔᖅᐱᑦ ᑕᕐᕆᔮᒃᓴᒃᑯᑦ ᓵᓚᖃᕋᓱᐊᕐᓂᕐᒧᑦ. ᒪᓕᒍᓐᓇᖅᑕᑎᑦ ᐊᒻᒪ ᐃᓚᐅᕝᕕᒋᓗᒋᑦ ᓵᓚᖃᕋᓱᐊᕐᓂᕐᒧᑦ ᐃᓚᐅᓂᕐᒧᑦ ᕿᓂᕐᓗᒍ ᓇᓗᓇᐃᒃᑯᑕ #WSCCWorkSafely ᕙᐃᔅᐳᒃᑯᑦ (Facebook) ᐅᕝᕙᓘᓐᓃᑦ ᔫᑑᑉᑯᑦ (YouTube).
-30-
ᒫᒋ ᑳᓕᓐᔅ (Maggie Collins)
ᑐᓴᒐᒃᓴᓕᕆᓂᖅ ᐊᒻᒪᓗ ᑭᒃᑯᑐᐃᓐᓇᕐᓄᑦ ᐱᓇᓱᐊᖅᑎᑦ ᐊᐅᓚᑦᓯᔨᖓ
ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᓄᓇᑦᓯᐊᕐᒥ ᐊᒻᒪᓗ ᓄᓇᕗᒻᒥ
ᐅᖄᓚᐅᑦ: (867) 920-3854