ᔭᓗᓇᐃ, ᓄᓇᑦᓯᐊᖅ (ᓯᑎᐱᕆ 26, 2023) – ᐋᒡᒌᓯ 25, 2023−ᒥ, ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᐊᕐᕕᓂᓖᖕᓂᒃ ᐊᑕᐅᓯᕐᒥᓪᓗ ᐃᖅᑲᒃᑐᒐᒃᓴᓕᐊᓕᐅᓚᐅᕐᒪᑕ ᐃᖅᑲᒃᑐᒐᒃᓴᐅᓕᐋᖑᓪᓗᑎᒃ SMS Equipment Inc. ᓄᓇᑦᓯᐊᕐᒥ ᓄᓇᓕᖃᕐᕕᐅᔪᒥ ᐃᖅᑲᒃᑐᐃᕕᒃᑯᑦ ᐅᑯᑎᒎᓇ ᑕᒪᒃᑭᖏᑎᒍ ᐊᑦᑕᓇᖅᑐᒦᑦᑕᐃᓕᓂᕐᒧᑦ ᐱᖁᔭᕐᒥ ᐊᒻᒪᓗ ᐅᔭᕋᖕᓂᐊᕐᕕᒃ ᐋᓐᓂᐊᖃᖅᑕᐃᓕᑎᑦᑎᓂᕐᒧᑦ ᐊᒻᒪᓗ ᐊᑦᑕᕐᓇᖅᑐᒦᑕᐃᓕᑎᑦᑎᓂᕐᒧᑦ ᐱᖁᔭᕐᒥ.
SMS Equipment ᐃᖅᑲᒃᑐᒐᒃᓴᓕᐊᖑᕗᖅ ᐊᑕᐅᓯᐅᖏᑦᑐᓂᒃ ᐸᓯᔭᐅᔾᔪᑎᖃᕐᓗᓂ ᓯᖁᒥᑦᑎᔪᒥᓂᐅᓂᕋᒃᑕᐅᓪᓗᑎᒃ ᐊᑦᑕᓇᖅᑐᒦᑦᑕᐃᓕᓂᕐᒧᑦ ᐱᖁᔭᕐᒥᒃ ᐊᒻᒪᓗ ᐅᔭᕋᖕᓂᐊᕐᕕᒃ ᐋᓐᓂᐊᖃᖅᑕᐃᓕᑎᑦᑎᓂᕐᒧᑦ ᐊᒻᒪᓗ ᐊᑦᑕᕐᓇᖅᑐᒦᑕᐃᓕᑎᑦᑎᓂᕐᒧᑦ ᐱᖁᔭᕐᒥᒃ, ᐱᖃᓯᐅᑎᓪᓗᒍ ᐋᖅᑭᐅᒪᑎᑦᑎᓚᐅᖏᒻᒪᑕ ᐃᖅᑲᓇᐃᔭᖅᑎᖏᑦ ᐅᓗᕆᐋᓇᖅᑐᒦᖁᓇᒋᑦ, ᐊᒻᒪᓗ ᐊᑐᓚᐅᖏᓐᓂᖏᓐᓄᑦ ᖃᓄᑐᐃᓐᓇᖅ ᐱᔾᔪᑎᒃᓴᖃᑦᑎᐊᕐᓗᑎᒃ ᐱᓕᕆᓐᓂᖏᒻᒪᑕ ᓴᐳᒻᒥᒃᓯᓇᓱᐋᕐᓂᕐᒥᒃ ᐋᓐᓂᐊᖃᒃᑕᐃᓕᒪᓂᕐᒧᑦ ᐊᒻᒪᓗ ᐊᑦᑕᕐᓇᖅᑐᒦᑎᑕᐅᑦᑕᐃᓕᒪᓗᑎᒃ ᐃᖅᑲᓇᐃᔭᖅᑎᖏᑦ, ᐱᖃᓯᐅᑎᓪᓗᒋᑦ ᐊᓯᒃᑲᓐᓂᖏᑦ ᐱᕋᔭᖕᓂᐅᔪᑦ.
ᐃᖅᑲᒃᑐᒐᒃᓴᓕᐆᕈᑏᑦ ᑎᑎᕋᒃᓯᒪᔪᓅᖅᑕᐅᓚᐅᕐᒪᑕ ᑭᖑᓂᖓᒍᑦ ᖃᐅᔨᓇᓱᐋᖅᑕᐅᓚᐅᖅᑎᓪᓗᒋᑦ ᐅᑯᓇᙵᑦ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᒃᑯᓐᓂᑦ (WSCC) ᐊᑦᑕᕐᓇᖅᑕᐃᓕᒪᓂᕐᒧᑦ ᐱᕋᔭᒍᑕᐅᔪᑦ ᑐᕌᖓᓪᓗᑎᒃ ᐱᓂᕐᓗᒃᑐᖃᒃᑐᒥᓂᐅᓂᖓᓄᑦ ᓯᑎᐱᕆ 1, 2022−ᒥ, ᑕᐃᑲᓂ ᒑᓱ ᑯᐃ ᐅᔭᕋᖕᓂᐊᕐᕕᖓᓂ ᐋᖅᑭᐅᒪᑎᑦᑎᓂᕐᒧᑦ ᓴᓇᕕᖓᓂ ᑐᖁᔪᖃᓚᐅᖅᑎᓪᓗᒍ ᐃᖅᑲᓇᐃᔭᖅᑎᒥᒃ.
ᓯᕗᓪᓕᖅᐹᒥ ᐃᖅᑲᖅᑐᐃᕕᒥ ᐱᓕᕆᐊᖑᓂᐊᖅᖢᓂ ᐅᑐᐱᕆ 24, 2023−ᒥ ᐅᕙᓂ ᔭᓗᓇᐃ, ᓄᓇᑦᓯᐊᖅ.
ᑕᒪᓐᓇ ᐃᖅᑲᖅᑐᐃᕕᒃᑯᑦ ᐱᓕᕆᐊᖑᓂᐊᓕᕐᓂᖓᓄᑦ ᐅᑯᐊ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᑕᒪᑐᒥᖓ ᐅᖃᐅᓯᖃᒃᑲᓐᓂᕈᓐᓇᙱᑦᑐᑦ.
ᓴᐃᕗᓚ ᒪᒃᓚᐅᑦ
ᐊᐅᓚᑦᑎᔨ, ᑐᓴᐅᒪᖃᑎᒋᒍᑎᓂᑦ
ᐅᖄᓚᐅᑦ: (867) 920-3854