ᔭᓗᓇᐃᕝ, ᓄᓇᑦᓯᐊᖅ (ᒫᑦᓯ 28, 2023) – ᐅᓪᓗᖓᓂ ᒫᑦᓯ 24, 2023, Arctic Canada Construction Ltd. (ARCAN) ᓴᓇᑎᑦᑎᔨᑦ ᐅᐸᒍᑎᓯᒪᓚᐅᕐᑐᑦ ᓄᓇᑦᓯᐊᖅ ᐃᖃᕐᑐᐃᕕᖓᓂ ᔭᓗᓇᐃᕝᒥ ᐊᒻᒪᓗ ᐸᓯᔭᒃᓴᐅᓂᕋᓚᐅᕐᑐᑦ ᒪᓕᖏᓐᓂᕐᒧᑦ ᑕᕙᓂ ᐊᑦᑕᕐᓇᕐᑕᐃᓕᒪᓂᕐᒧᑦ ᐱᖁᔭᐃᑦ.
ARCAN ᐸᓯᔭᒃᓴᐅᓂᕋᓚᐅᕐᑐᑦ ᐊᑕᐅᓯᕐᒧᑦ ᐸᓯᔭᐅᓪᓗᑎᒃ ᐃᒪᐃᓚᐅᕐᒪᑕ “ᐱᔭᕆᐊᖃᕐᑎᓪᓗᒍ ᐅᔾᔨᕐᓱᕐᓇᑎᒃ ᐊᒻᒪᓗ ᐊᑐᕐᑎᑦᑎᓇᑎᒃ ᐊᒻᒪᓗ ᐊᕿᒃᓯᒋᐊᕐᓇᑎᒃ ᐱᔭᕆᐊᓕᖕᓂᒃ ᐊᕿᒍᑎᒃᓴᓂᒃ ᐊᒻᒪᓗ ᒪᓕᒋᐊᓕᖕᓂᒃ, ᖃᓄᐃᖏᑦᑎᐊᖁᓪᓗᒋᑦ ᐊᒻᒪᓗ ᐊᑦᑕᕐᓇᕐᑐᒥᖁᓇᒋᑦ ᑕᒪᕐᒥᒃ ᐃᓄᑐᐃᓐᓇᐃᑦ ᓴᓇᕕᖓᓂ”, ᒪᓕᖏᓐᓂᕐᒧᑦ ᐊᑦᑕᕐᓇᕐᑕᐃᓕᒪᓂᕐᒧᑦ ᐱᖁᔭᐃᑦ. ᐊᑭᓕᒐᒃᓴᕐᑕᓚᐅᕐᑐᑦ ᐃᒪᓐᓇᑎᒋ $20,000 ᐊᑭᓕᕐᑕᐅᓗᑎᒃ ᐅᑯᐊ ᐃᖅᑲᓇᐃᔭᕐᑎᑦ ᓴᐳᔾᔭᐅᓯᒪᓂᖏᓐᓄᑦ ᑭᓇᐅᔭᖃᕐᕕᑦ, ᐃᓚᓗᒍ 15% ᐱᓂᕐᓗᒃᑕᐅᔪᒃ ᐊᑭᓕᕈᑎ ᐊᑭᓕᕆᐊᓕᒃ.
ᐸᓯᔭᐅᒃᓴᖑᓚᐅᕐᑐᑦ ᐱᒋᐊᕐᖢᓂ ᐱᕈᓗᒃᑐᖃᕐᒪᑦ ᐊᐃᕐᕆᓕ 22, 2021 ᐃᖅᑲᓇᐃᔭᕐᕕᐅᔪᒥ ᕗᐊᑦ ᓯᒻᓴᓐ. ᒪᕈᒃ ᓴᓇᔨᒃ ᐃᓯᕕᑦᑕᕐᑐᒥᒃ ᑭᕕᒃᓯᓯᒥᒃ ᐊᑐᕐᖢᑎᒃ ᐃᑭᒪᔪᖃᕐᖢᓂ ᑭᕕᒃᓯᓯᖓᓂ ᐊᕿᒃᓯᓇᓱᒃᖢᑎᒃ ᒪᔪᕋᐅᑎᐅᑦ ᐊᕙᑕᓂ ᑎᒍᒥᐊᕐᕕᖓᓂᒃ. ᐃᓯᕕᑦᑕᕐᑐᒥᒃ ᑭᕕᒃᓯᓯ ᐊᕿᒃᓯᓯᒪᓪᓗᓂ ᐊᐅᓚᑲᓪᓚᔾᔭᐃᒃᑯᑎᒥᒃ ᓄᖃᖓᔾᔪᑎᖓᓂᒃ ᑭᓯᐊᓂ ᐊᕿᒃᓯᒪᓚᐅᖏᒻᒪᑕ. ᐃᑭᒪᕝᕕᐅᔪᖅ ᑭᕕᒃᓯᓯᒥ ᖁᒻᒧᐊᒃᑎᑕᐅᑎᓪᓗᒍ, ᑭᕕᒃᓯᓯ ᓴᓂᒧᓕᕋᒥ ᐅᕈᔪᕕᓂᐅᖕᒪᑦ ᒪᓂᖃᒧᓪᓗ ᑐᓪᖢᓂ. ᐊᓂᓚᐅᕐᑐᖅ ᓴᓇᔨ ᐃᒋᑕᐅᒐᒥ ᒪᓂᖃᒧᑦ ᐃᑭᒪᕕᖓᓂᑦ.
ᐊᐃᕐᕆᓕ 19, 2022, ᖃᐅᔨᓴᕐᑕᐅᓚᐳᕐᑎᓪᓗᒍ, ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ (WSCC) ᐱᒋᐊᕐᓂᖓᓂ ᐸᓯᔭᒃᓴᖑᐃᓚᐅᕐᑐᑦ 7−ᓂᒃ ᑕᒃᑯᓂᖓ ARCAN. ᒪᓕᒃᓗᒍ ᐸᓯᔭᒃᓴᐅᓂᕐᒧᑦ ᐊᖏᕐᓂᖏᓐᓄᑦ, ᐃᓚᖏᑦ 6 ᐸᓯᔭᒃᓴᐅᔾᔪᑎᖏᑦ ᐊᑐᕈᓐᓂᕐᑎᑕᐅᓚᐅᕐᑐᑦ.
ᓴᐃᕗᓚ ᒪᒃᓚᐅᑦ
ᐊᐅᓚᑦᑎᔨ, ᑐᓴᐅᒪᖃᑎᒋᒍᑎᓂᑦ
ᐅᖄᓚᐅᑦ: (867) 920-3854