ᐃᖃᓗᐃᑦ, ᓄᓇᕗᑦ (ᑎᓯᐱᕆ 22, 2020) – ᑎᓯᐱᕆ 14, 2020-ᒥᑦ, ᑕᐅᕙ ᐋᑎᒃ ᓕᒥᑎᑦᑯ ᓄᓇᕗᒥᑦ ᐃᖃᖅᑐᐃᕕᒃᒧᐊᓚᐅᕐᑐᑦ ᐃᖃᓗᖕᓂ ᐊᒻᒪᓗ ᐸᓯᔭᒃᓴᐅᔾᔪᑎᖏᓐᓄᑦ ᐃᖃᖅᑐᖅᑕᐅᓪᓗᑎᒃ ᓱᕋᐃᓯᒪᓂᕐᒥᒃ ᐅᕘᓈᖓᔪᓂᒃ ᓄᓇᕗᑦ ᐊᑦᑕᓇᔾᔭᐃᖅᓯᒪᓂᕐᒧᑦ ᒪᓕᒐᖅᒥ.
ᐸᓯᔭᒃᓴᐅᑎᑦᑎᔪᖅ ᐊᒻᒪ ᒪᓕᒐᓕᕆᔭᐅᔪᖅ ᑕᐅᕙ ᐋᑎᒃ ᓕᒥᑎᑦᑯᓐᓄᑦ ᑕᒪᕐᒥᒃ ᐊᖏᖃᑎᒌᓚᐅᕐᑑᑦ ᑖᒃᑯᐊ ᐊᑭᓖᓂᐊᕐᓗᑎᒃ $75,000.00-ᓂᒃ. ᐃᖃᖅᑐᐃᔨᐅᔪᖅ ᑖᔅᓱᒥᖓ ᐊᖏᖃᑎᒌᖕᓂᕐᒧᑦ ᐱᔭᐅᔪᒪᔪᖅ ᐊᖏᕈᑎᒋᓚᐅᕐᑕᖓ, ᐃᓚᖃᖅᖢᓂ ᓈᒻᒪᙱᓕᐅᕐᕕᐅᔪᕐᒧᑦ ᐊᑭᓖᒃᑲᓐᓂᕆᐊᖃᖅᖢᑎᒃ ᐅᕘᓈᖓᔪᒥᒃ ᓄᓇᕗᑦ ᐱᕋᔭᒃᕕᐅᓯᒪᔪᓄᑦ ᒪᓕᒐᖅᑎᒍᑦ.
ᑕᐃᒪᐃᓕᐅᕈᑎᐅᔪᖅ ᐱᒋᐊᕐᓯᒪᔪᖅ ᖃᓄᐃᓕᐅᕈᑎᕕᓂᕐᒥᒃ ᒥᑦᑎᒪᑕᓕᒃ ᕼᐋᒻᒪᓚᒃᑯᓐᓂᒃ, ᓄᓇᕗᑦ ᐅᕙᓂ ᑕᐅᕙ ᐋᑎᒃ ᓴᓇᕝᕕᖓᓂ/ᒎᓛᔪᒥ ᓯᑎᐱᕆ 19, 2018-ᖑᑎᓪᓗᒍ.
ᐊᖏᖃᑎᒌᒍᑎ ᖃᓄᐃᓕᐅᕈᑎᓄᑦ (ASF) ᑐᓂᓯᓚᐅᕐᓯᒪᔪᑦ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᓄ (WSCC) ᐊᒻᒪ ᑕᐅᕙ ᐋᑎᒃᑯᓐᓂ ᐅᖃᐅᓯᖃᕐᑕᖅ ᐋᓐᓂᖅᑐᖃᓚᐅᕐᓂᖓᓂ ᓄᑖᖅ ᐃᖅᑲᓇᐃᔭᖅᑎ ᐱᓕᕆᐊᖃᕐᑎᓪᓗᒍ ᑎᒍᒥᐊᕆᐊᓕᖕᒥ ᓴᕕᕋᔭᒃᒥ ᖃᐃᖅᑲᒃᓴᐅᑎᒥ ᒪᑐᐃᕐᓯᓇᓱᒃᖢᓂ ᓴᕕᕋᔭᒃᒥᑦ ᖃᑦᑕᐅᔭᕐᒥᒃ. ᖃᑦᑕᐅᔭᖅ ᐊᒃᑕᕐᕕᖕᒥ ᐱᔭᐅᓚᐅᕐᑐᖅ ᐅᑯᐊ ᒥᑦᑎᒪᑕᓕᒃᒥ ᕼᐋᒻᒪᓚᒃᑯᑦ ᐊᒃᑕᕐᕕᖓᓂᒃ ᐊᒻᒪᓗ ᐃᑭᔭᑦᑐᒥ ᐃᒪᖄᕐᔪᒃᖢᓂ ᐃᓗᐊᓂ. ᖃᐃᖅᑲᒃᓴᐅᑎᐅᑉ ᐊᐅᒪᖓᓄᑦ ᑖᓐᓇ ᐃᒪᖃᕐᓂᐅᔪᖅ ᐃᑭᒍᑎᐅᓚᐅᕐᐳᖅ ᐊᒻᒪ ᖄᖅᑎᑦᑎᒍᑎᐅᓪᓗᓂ. ᐅᑯᐊ ᐊᖏᖃᑎᒌᒍᑎ ᖃᓄᐃᓕᐅᕈᑎᓄᑦ (ASF) ᐅᖃᕐᓯᒪᓚᐅᕐᑐᖅ ᑖᓐᓇ ᐃᖅᑲᓇᐃᔭᖅᑎ ᐱᐊᓂᒃᓯᓯᒪᙱᓐᓂᖓᓂᒃ ᐱᕐᕈᓗᐊᕿᑦᑕᐃᓕᓂᕐᒧᑦ ᐊᔪᕈᓐᓃᕐᓴᕈᑎᓂᒃ ᐊᒻᒪᓗ ᖁᐊᕐᓵᕐᓇᖅᑐᓂᒃ ᖃᐅᓗᔨᓴᕈᑎᑦ ᐱᐊᓂᒃᑕᐅᓚᐅᙱᖢᑎᒃ ᑕᐃᒪᓕ ᖃᐅᔨᔪᓐᓇᓚᐅᕋᓗᐊᕐᑐ ᐃᒪᖃᕈᔪᖕᓂᖓᓂᒃ.
ᐅᑯᑎᒎᓇᕐᓕ ᐊᖏᖃᑎᒌᒍᑎ ᖃᓄᐃᓕᐅᕈᑎᓄᑦ (ASF), ᑕᐅᕙ ᐋᑎᒃ ᓕᒥᑎᑦ ᖃᐅᔨᓴᖅᑎᓪᓗᒋ ᐃᑲᔪᑲᑕᐃᓐᓇᓚᐅᕐᓂᖏᓐᓂᒃ ᐊᒻᒪᓗ ᐱᐅᓯᕚᓪᓕᖅᑎᑦᑎᓕᖅᖢᑎᒃ ᐃᖅᑲᓇᐃᔭᖅᑏᑦ ᐅᓗᕆᐊᓇᙱᑦᑐᒦᑎᒐᓱᖕᓂᕐᒧᑦ.
ᐅᑐᐱᕆ 6, 2020-ᒥᑦ ᑕᐅᕙ ᐋᑎᒃ ᓕᒥᑎᑦᑯᑦ ᐸᓯᔭᒃᓴᐅᓂᕋᓚᐅᕐᓯᒪᔪᑦ ᐊᑕᐅᓯᕐᒧᑦ ᐆᒧᖓ ᒪᓕᙱᓐᓂᕐᒥᒃ ᐃᓚᖓ 4(1)(b) ᐅᕙᓃᑦᑐᓂᒃ ᐊᑦᑕᓇᔾᔭᐃᖅᓯᒪᓂᕐᒧᑦ ᒪᓕᒐᖅᒥ ᐃᒪᐃᓕᖓᓪᓗᓂ:
4. (1) ᐊᑐᓂ ᐃᖅᑲᓇᐃᔭᖅᑎᖁᑎᓕᒃ ᐃᒪᐃᓕᐅᕐᓗᓂ:
(b) ᐱᓕᕆᓂᐅᔪᓂᑦ ᑕᒪᒃᑭᓂ ᓈᒻᒪᒃᑐᓂ ᐅᔾᔨᖅᓱᑦᑎᐊᕐᓂᐅᔪᓂ ᐊᒻᒪᓗ ᐱᓕᕆᓗᑎᒃ ᑕᒪᕐᒥᒃ ᓈᒻᒪᒃᑐᓂ ᓇᓗᓇᐃᖅᓯᓂᕐᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥᑦ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ ᑕᒪᕐᒥᒃ ᐃᓄᖕᓄᑦ ᑕᐃᑲᓃᑦᑐᓂ ᐱᓕᕆᕝᕕᐅᔪᒥ.
ᐃᖅᑲᓇᐃᔭᖅᑎᑦᑎᔨᐅᔪᑦ ᐃᖅᑲᓇᐃᔭᖅᑎᓂᒃ ᓈᒻᒪᒃᑐᒥ ᐃᓕᓐᓂᐊᖅᑎᑦᑎᔭᕆᐊᖃᖅᑐᑦ ᐊᑐᕐᓂᐊᕈᑎ ᐱᓕᕆᔾᔪᑎᓄᑦ ᐱᕐᕈᓗᐊᕿᑦᑕᐃᓕᓂᕐᒧᑦ ᐊᒻᒪᓗ ᑐᑭᓯᓯᒪᔭᕆᐊᖃᕐᓂᕐᒥᒃ ᖁᐊᕐᓵᕐᓇᑐᐃᓐᓇᕆᐊᓕᖕᓂᒃ. ᐃᖅᑲᓇᐃᔭᖅᑎᑦᑎᔨᐅᔪᑦ ᐃᖅᑲᓇᐃᔭᖅᑎᓂᒃ ᖃᐅᔨᒪᑎᑦᑎᔭᕆᐊᖃᖅᑐᑦ ᐱᔪᓐᓇᐅᑎᖏᓐᓂᒃ ᐊᒻᒪᓗ ᖃᓄᖅ ᑖᒃᑯᓂᖓ ᐊᑐᕈᓐᓇᕐᓂᕐᒥᒃ. ᐅᐸᒡᓗᒍ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᖃᕋᓴᐅᔭᑎᒍᑦ ᑐᑭᓯᒋᐊᖅᑕᕐᕕᖓᓐᓂ ᖃᐅᔨᒋᐊᒃᑲᓐᓂᕐᓂᕐᒧᑦ ᐃᖅᑲᓇᐃᔭᖅᑎᖁᑎᓕᖕᓄᑦ ᐱᔪᓐᓇᐅᑎᖏᑦ ᐊᒻᒪᓗ ᐱᓕᕆᐊᒃᓴᖏᑦ ᐊᒻᒪᓗ ᐃᖅᑲᓇᐃᔭᖅᑏᑦ ᐱᔪᓐᓇᐅᑎᖏᑦ ᐊᒻᒪᓗ ᐱᓕᕆᐊᒃᓴᖏᓐᓄᑦ.
-30-
ᕼᐊᐃᑎ ᕼᐃᐊᓪᑦ
ᐊᐅᓚᑦᑎᔨᐅᑲᐃᓐᓇᖅᑐᖅ, ᑐᓴᐅᒪᔪᓕᕆᓂᕐᒧᑦ
ᐅᖄᓚᐅᑦ: (867) 446-5730
ᐊᑭᖃᙱᑦᑐᖅ: 1 (800) 661-0792 ᐅᖃᓘᑎᖓᓄᑦ 3829
ᐃᕐᖐᓐᓈᖅᑕᐅᑖ: heidi.held@wscc.nt.ca