ᐃᖃᓗᐃᑦ, ᓄᓇᕗᑦ (ᔪᓚᐃ 11, 2023) – ᔭᓂ ᐳᕈᔅ, ᐃᒃᓯᕙᐅᑕᖅ ᐊᐅᓚᑦᑎᓂᕐᒧᑦ ᑲᑎᒪᔨᓂ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ (WSCC), ᖁᕕᐋᑦᑐᖅ ᑐᓴᖅᑎᑦᑎᔭᕆᐋᒃᓴᖅ ᑎᒃᑯᐊᖅᑕᐅᓂᖓᓂᑦ ᕆᒃ ᕼᓐᑦ ᓄᑖᖑᓪᓗᓂ ᐊᖓᔪᖄᒃ ᐊᒻᒪᓗ ᐊᖓᔪᖅᑳᒃ ᐊᖓᔪᖃᐅᑎᑦ ᐊᐅᓚᑦᑎᔨᐅᓗᓂ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᒃᑯᓐᓂ ᐱᒋᐋᕐᓂᐊᕐᓗᓂ ᐅᑐᐱᕆ 2-ᖓᓂ, 2023−ᒥ.
“ᕆᒃ ᐱᓕᕆᖃᑦᑕᖅᓯᒪᖕᒪᑦ ᐊᕐᕌᒍᑦ ᖁᓕᐅᔪᖅᑐᒐᓴᖕᓂ ᐅᑭᐅᖅᑕᖅᑐᕐᒥ, ᐊᑦᑕᕐᓇᖅᑕᐃᓕᒪᓂᕐᒥ, ᐊᒻᒪᓗ ᐊᐅᓚᑦᑎᕕᖕᒥ ᐃᖅᑲᓇᐃᔭᖃᑦᑕᖅᓯᒪᓂᕐᒥᓂᑦ ᐃᖅᑲᓇᐃᔭᕐᕕᐅᔪᒨᖅᓯᓪᓗᓂ,” ᐅᖃᒃᐳᖅ ᐳᕈᔅ. “ᐱᕕᐊᕆᖕᒪᒋᑦ ᓴᖅᑭᑎᑦᑕᕆᐋᖏᑕ ᐊᑦᑕᕐᓇᑦᑐᖃᖏᓪᓗᑎᒃ ᐊᒻᒪᓗ ᐃᒃᐱᒍᓱᑦᑎᐋᕐᓗᑎᒃ ᐃᖅᑲᓇᐃᔭᕐᕕᒋᔭᐅᔪᑦ ᐊᒻᒪᓗ ᐃᓕᓴᕆᓗᓂᒋᑦ ᐱᒻᒪᕆᐅᓂᕆᔭᖏᑦ ᐱᕙᓪᓕᐋᑎᑦᑎᓂᑦ ᐃᖅᑲᓇᐃᔭᖃᑎᒌᖕᓂᕐᒥ ᐱᓕᕆᖃᑎᒌᓐᓂᕆᔭᐅᔪᑦ ᐊᒻᒪᓗ ᐱᔭᐅᑎᑦᑎᕙᒡᓘᓂ ᓴᙱᔪᒥᒃ ᐊᑭᓖᕙᒃᑐᓄᑦ ᐱᔨᑦᓯᕈᑎᒥᑦ. ᖁᕕᐋᓱᑦᑎᐊᖅᑐᒍᑦ ᑐᙵᓱᒃᑎᑦᑕᕆᐊᖓ ᑖᓐᓇ ᐅᕙᒍᑦ ᐱᓕᕆᖃᑎᒌᓐᓂᕆᔭᑦᑎᓄᑦ.”
ᕆᒃ ᐱᒋᐋᓚᐅᖅᓯᒪᖕᒪᑦ ᐱᓕᕆᖃᑦᑕᖅᖢᓂ ᐊᑐᕐᓗᓂᒋᑦ ᐊᕙᑎᓕᕆᓂᕐᒥᑦ ᐃᓕᓐᓂᐋᖅᓯᒪᓂᕆᔭᓂ ᐊᒻᒪᓗ ᐊᑦᑕᕐᓇᖅᑕᐃᓕᒪᓂᕐᒧᑦ ᐃᓕᓐᓂᐊᕇᕈᑎᖓᓂᑦ ᐊᐅᓪᕘᑕᒥ ᐅᖅᓱᐊᓗᒃᓴᓕᖕᒥ ᓯᐅᕋᕐᒥ ᓴᓇᕕᖁᑎᒥ. ᐃᖅᑲᓇᐃᔭᖃᑕᐅᓕᓚᐅᖅᓯᒪᔪᖅ ᖁᓪᓕᖅ ᐆᒪᖁᑎᓕᕆᔨᒃᑯᑦ ᑎᒥᖁᑖᓂ (QEC) 2004−ᒥ ᐊᑦᑕᕐᓇᖅᑕᐃᓕᒪᔪᓕᕆᔨᐅᓗᓂ/ᐊᕙᑎᓕᕆᓂᕐᒥ ᐊᐅᓚᑦᑎᔨᐅᓪᓗᓂ ᐊᔪᖏᓐᓂᖅᓴᕈᕆᐋᓚᐅᖅᑎᓐᓇᒍ ᓯᕗᓕᖅᑎᕈᒃᐸᓪᓕᐋᓂᕐᒧᑦ ᖁᕙᖅᐸᓪᓕᐋᔾᔪᑎᓂ, ᑕᕝᕙᓂᓗ ᒪᓐᓇ ᐱᓯᒪᓕᖅᖢᓂ ᐃᖅᑲᓇᐃᔮᒥᒃ ᐊᖓᔪᖄᖑᓪᓗᓂ ᐊᒻᒪᓗ ᐊᖓᔪᖅᑳᒃ ᐊᖓᔪᖃᐅᑎᑦ ᐃᖃᓇᐃᔭᕐᕕᖓᓂ. ᐱᓯᒪᓪᓗᓂᒋᑦ ᐊᒥᓱᑲᓪᓚᐃᑦ ᐃᖅᑲᓇᐃᔭᖅᑎᓚᕆᐅᓂᕐᒥᓄᑦ ᐱᓕᕆᔨᐅᖁᔭᐅᔪᑎᖏᑦ, ᐃᓚᒋᔭᐅᓪᓗᑎᒃ ᑲᓇᑕᒥ ᓇᓗᓇᐃᒃᑯᑕᓕᒃ ᐊᕙᑎᓕᕆᓂᕐᒥ ᐃᖅᑲᓇᐃᔭᖅᑎᓪᓚᕆᐅᓂᕐᒧᑦ (CCEP), ᓇᓗᓇᐃᒃᑯᑕᖅᑖᖅᓯᒪᓪᓗᓂ ᐋᓐᓂᐊᖃᒃᑕᐃᓕᒪᔪᓕᕆᓂᕐᒥ ᐊᒻᒪ ᐊᑦᑕᓐᓇᖅᑕᐃᓕᒪᔪᓕᕆᓂᕐᒥ ᖃᐅᔨᒪᔨᑕᐅᓪᓗᓂ (CHSC), ᐊᒻᒪᓗ ᑲᓇᑕᓕᒫᒥ ᓴᓇᓂᕐᒧᑦ ᐊᑦᑕᕐᓇᖅᑕᐃᓕᒪᔪᓕᕆᓂᕐᒥ ᐊᐅᓚᑦᑎᔨᐅᓂᕐᒥᑦ (NCSO).
ᐅᓇ ᓇᓗᓇᐃᖅᓯᔪᖅ ᓯᕗᓪᓕᖅᐹᒥᑦ ᑖᓐᓇ ᐊᖓᔪᖅᑳᒃ ᐊᒻᒪᓗ ᐊᖓᔪᖅᑳᒃ ᐊᖓᔪᖃᐅᑎᑦ ᐊᐅᓚᑦᑎᔨᐅᓗᓂ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᐃᖅᑲᓇᐃᔮᖓ ᓄᓇᕗᒻᒦᓂᐊᖅᑐᖅ. ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᐊᑭᓕᖅᑕᐅᓂᖏᓐᓄᑦ ᑲᑎᒪᔨᑐᐊᖑᔪᑦ ᑲᓇᑕᒥ ᐱᔨᑦᑎᖅᑐᑦ ᐊᑕᐅᓯᐅᓗᐊᖅᑐᒥᑦ ᑲᓇᑕᒥ ᐊᕕᑦᑐᖅᓯᒪᔪᓂᑦ ᐅᕝᕙᓘᓐᓃᑦ ᐅᑭᐅᑕᖅᑐᒥ.
“ᑲᔪᖏᖅᓯᒪᔪᒍᑦ ᐱᓕᕆᖃᑎᖃᓕᕐᓗᑕ ᑕᒪᒃᑭᓐᓂᒃ ᓄᓇᑦᓯᐊᒥ ᐊᒻᒪ ᓄᓇᕗᒻᒥ ᒐᕙᒪᒃᑯᓐᓂᑦ ᓯᕗᓕᖅᑎᐅᖃᑕᐅᓂᕐᒧᑦ ᐊᒻᒪ ᐃᖅᑲᓇᐃᔮᕐᓗᑕ ᑐᕌᖅᑐᓂ ᑎᑭᑦᑎᓗᑕ ᑐᕌᖅᑕᑎᓐᓂᑦ ᓴᖅᑭᔮᖅᑎᑦᑎᓂᕐᒧᑦ ᐃᖅᑲᓇᐃᔭᕐᕕᒻᒥ ᐋᓐᓂᐊᖅᑐᓕᕆᓂᕐᒧᑦ ᐊᒻᒪ ᐊᑦᑕᓇᐃᖅᓯᒪᓂᕐᒧᑦ ᑲᒪᒋᔭᖃᖅᑐᑎᑦ ᐋᓐᓂᖅᓯᒪᔪᓂᑦ ᐃᖅᑲᓇᐃᔭᖅᑎᓂᑦ,” ᐅᖃᖅᑐᖅ ᐳᕈᔅ.
ᑭᖑᓂᖓᒍᑦ ᐊᐅᓪᓚᓚᐅᖅᑎᓪᓗᒍ ᑎᕝᕖ ᒧᓪᓗᐃ ᒪᐄᖑᑎᓪᓗᒍ, ᕼᕐᒦᑦ ᔭᒡᐸᓪ ᐱᓕᕆᓚᐅᕐᒪᑦ ᑭᖑᕝᕕᐅᑎᓯᒪᓪᓗᓂ ᐊᖓᔪᖄᒧᑦ.
“ᕼᕐᒦᑦᐅᑉ ᓯᕗᓕᖅᑎᐅᓂᖓ ᑕᐃᑦᓱᒪᓂ ᐊᓯᕈᒃᐸᓪᓕᐋᓕᖅᑎᓪᓗᒍ ᐊᑑᑎᖃᑦᑎᐊᖅᑐᒪᕆᐋᓗᓚᐅᕐᒪᑦ,” ᐅᖃᒃᐳᖅ ᐳᕈᔅ. “ᐱᓯᒪᒃᓯᑦᑎᐋᓚᐅᕐᒪᑦ ᐃᖅᑲᓇᐃᔭᕐᕕᖁᑎ ᑕᐃᒫᑦᑕᐃᓐᓇᓕᑎᓪᓗᓂᐅᒃ ᓂᐸᐃᑦᑑᓪᓗᓂ ᖁᓚᖏᑦᑎᐋᕐᓂᕐᒥᓄᑦ ᐊᒻᒪᓗ ᐱᓕᕆᑦᑎᐋᕋᓱᐋᕐᓗᓂ ᐱᓕᕆᖃᑎᒌᖕᓂᕆᔭᐅᔪᓂ ᐃᖅᑲᓇᐃᔭᕐᓗᓂ.”
ᐅᖃᒃᓯᒪᓂᖏᓐᓄᑦ ᐃᖅᑲᓇᐃᔭᖅᑎᐅᑉ ᐊᑭᓕᖅᑕᐅᔾᔪᑎᖏᓐᓄᑦ ᒪᓕᒐᖅ, ᐃᒻᒥᒃᑰᖓᓂᖅ 101, ᐊᖓᔪᖄᒃ ᑎᒃᑯᐊᖅᑕᐅᓲᖑᖕᒪᑦ ᐊᐅᓚᑦᑎᓂᕐᒧᑦ ᑲᑎᒪᔨᓂᑦ.
ᔭᓂ ᐳᕈᔅ
ᐃᒃᓯᕙᐅᑕᖅ, ᐊᐅᓚᑦᑎᓂᕐᒧᑦ ᑲᑎᒪᔨᓂ
ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ
ᓄᓇᑦᓯᐊᕐᒥ ᐊᒻᒪᓗ ᓄᓇᕗᒻᒥ
ᐃᕐᖐᓐᓈᖅᑕᐅᑖ: jenni.bruce@wscc.nt.ca