ᐃᖃᓗᐃᑦ, ᓄᓇᕗᑦ (ᕕᕝᕗᐊᕆ 4, 2022) – ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ (WSCC) ᖁᕕᐊᓱᒃᑐᑦ ᑐᓴᖅᑎᑦᑎᔪᓐᓇᕐᒪᑕ ᓄᑖᒥ ᐱᓕᕆᐊᒃᓴᒥᒃ – Safe Workplace. ᐅᓇ Safe Workplace ᐱᓕᕆᐊᒃᓴᖅ ᐃᖅᑲᓇᐃᔭᖅᑎᑦᑎᔨᓂᒃ ᐃᓕᓴᖅᓯᓯᒪᔾᔪᑎ ᐱᕐᕈᓗᐊᕿᑦᑕᐃᓕᓂᕐᒥᒃ ᐱᓕᕆᐊᖃᕐᓂᖏᓐᓄᑦ ᐃᑲᔪᓯᓐᓈᑦ ᐊᓯᖏᓐᓂᒃ ᐱᐅᓯᕚᓪᓕᖅᑎᑦᑎᓇᓱᖕᓂᕐᒥᒃ ᐊᐅᓚᑦᑎᓂᕐᒥᒃ ᐊᒻᒪ ᓯᕗᓪᓕᐅᑎᑦᑎᓯᒪᔭᕆᐊᖃᕐᓂᕐᒥᒃ ᐱᕐᕈᓗᐊᕿᑎᑦᑎᑦᑕᐃᓕᓂᕐᒥᒃ.
“ᐃᖅᑲᓇᐃᔭᖅᑎᑦᑎᔨᐅᔪᑦ ᐱᒻᒪᕆᐊᓗᖕᒥ ᐱᓕᕆᐊᒃᓴᖃᕐᒪᑕ ᓴᐳᔾᔨᓯᒪᓇᓱᒃᖢᑎᒃ ᐋᓐᓂᐊᖃᖅᑕᐃᓕᑎᑦᑎᓂᒃᑯᑦ ᐊᒻᒪ ᐱᕐᕈᓗᐊᕿᑎᑦᑎᑦᑕᐃᓕᓂᕐᒥᒃ ᐃᖅᑲᓇᐃᔭᖅᑎᓂᒃ. ᑕᑯᓯᒪᒐᑦᑕ ᐅᓄᕈᓘᔭᕐᑐᓂᒃ ᐱᓇᓱᒋᐊᖅᓯᒪᔪᓂᒃ ᐃᖅᑲᓇᐃᔭᖅᑎᖏᓐᓂᒃ ᓄᓇᓕᖕᓂᒡᓗ ᐅᓗᕆᐊᓇᙱᑦᑐᒦᑎᑦᑎᓇᓱᒃᑐᓂᒃ ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᖅᑕᖃᕐᓂᖓᓂᒃ. ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ (WSCC) Safe Workplace ᐱᓕᕆᐊᒃᓴᖓ ᐃᓕᓴᖅᓯᓯᒪᔾᔪᑎᐅᓂᐊᕐᑐᖅ ᐃᖅᑲᓇᐃᔭᖅᑎᑦᑎᔨᓂᒃ ᐱᓇᓱᒃᓯᒪᔪᓂᒃ ᐃᖅᑲᓇᐃᔭᕐᕕᖏᑦ ᐋᓐᓂᐊᖃᖅᑕᐃᓕᒪᑎᑦᑎᔪᓂᒃ ᐊᒻᒪ ᐅᓗᕆᐊᓇᖅᑐᒦᑎᑦᑎᑦᑕᐃᓕᔪᓂᒃ ᐊᒻᒪᓗ ᐊᓯᖏᓐᓂᒃ ᐱᓕᕆᑎᑦᑎᓇᓱᒃᑐᓂᒃ ᐊᑦᑕᓇᖅᑐᒦᑦᑕᐃᓕᓂᕐᒥᒃ ᐱᓕᕆᐊᖃᓪᓚᕆᒃᑎᑦᑎᓂᕐᒥᒃ ᐱᓕᕆᐊᖏᑦᑎᒍᑦ,” ᐅᖃᖅᑐᖅ ᓂᕐᓱᕐᓇᖅᑐᖅ ᐋᑕᒻ ᐋᕆᐊᒃ ᓚᐃᑦᓯᑑᓐ, ᒥᓂᔅᑕ ᑲᒪᒋᔭᖃᕐᑐᖅ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᓂᒃ (WSCC) ᓄᓇᕗᒥᑦ.
ᑕᒪᕐᒥᒃ ᐃᖅᑲᓇᐃᔭᖅᑎᑦᑎᔨᐅᔪᑦ ᐊᑎᓕᐅᕐᑕᐅᓯᒪᔪᑦ ᐅᑯᓇᓂ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᓄᑦ (WSCC) ᖃᐅᔨᒋᐊᕈᓐᓇᖅᑐᑦ ᖃᓄᐃᓕᖓᓂᖏᓐᓂᒃ ᐱᓕᕆᐊᒃᓴᑎᒍᑦ ᑐᓂᓯᓚᐅᖅᑎᓪᓗᒋᑦ ᐊᕐᕌᒍᑕᒫᑦ ᐃᖅᑲᓇᐃᔭᖅᑏᑦ ᐊᑭᓕᖅᑕᐅᔾᔪᑎᖏᓐᓂᒃ ᐅᓂᒃᑳᓕᐅᕐᓂᕐᒥ (APR) 2022-ᒧ, ᑖᓐᓇᓗ ᐃᓚᖃᖅᖢᓂ ᐋᓐᓂᐊᖃᖅᑕᐃᓕᓂᕐᒧᑦ ᐊᒻᒪ ᐊᑦᑕᓇᖅᑐᒦᑦᑕᐃᓕᓂᕐᒧᑦ ᐊᐱᖅᑯᑎᓂᒃ. ᐊᕐᕌᒍᒧᑦ ᐃᓱᒋᑎᑕᐅᔪᖅ ᑐᓂᓯᓂᕐᒧᑦ ᐅᑯᓄᖓ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᓄᑦ (WSCC) ᕕᕝᕗᐊᕆ 28.
ᐊᔪᙱᑎᑕᐅᓐᓇᖅᑐᖅ ᐆᒧᖓ Safe Workplace ᐃᖅᑲᓇᐃᔭᖅᑎᑦᑎᔨᐅᓂᕐᒧᑦ ᒪᑯᓂᖓ ᐊᑦᑕᓇᖅᑐᒦᑦᑕᐃᓕᓂᕐᒧᑦ ᐱᓕᕆᐊᖃᕆᐊᖃᖅᑐᑦ ᐊᑐᖃᑦᑕᖅᑐᓂᒃ ᐊᒻᒪᓗ ᐊᑖᓃᑦᑐᓂᒃ ᒪᓕᒡᓗᑎᒃ;
- ᐱᓕᕆᐊᑎᒍ ᐊᑐᖃᑦᑕᕐᓯᒪᑦᑎᐊᕐᓗᓂ ᐅᑯᐊ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ (WSCC) ᐊᑐᖁᔭᖏᓐᓂᒃ ᐊᑭᓕᐅᑎᒃᓴᑎᒍᑦ
- ᑭᖑᕙᓯᒃᓯᒪᙱᓪᓗᓂ ᖃᓄᐃᓕᐅᖁᔭᐅᓯᒪᔪᓂᒃ ᐅᑯᓇᙵᑦ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᓄᑦ (WSCC) ᒪᐅᓇ ᐃᖅᑲᓇᐃᔭᕐᕕᒃᒥ ᖃᐅᔨᓴᖅᑕᐅᔪᓕᕆᓂᒃᑯᑦ
- ᐸᓯᔭᒃᓴᐅᑎᑕᐅᓯᒪᙱᓪᓗᓂ ᐅᕘᓇ ᐊᑦᑕᓇᔾᔭᐃᖅᓯᒪᓂᕐᒧᑦ ᒪᓕᒐᕐᓂᑦ ᐅᕝᕙᓘᓐᓃᑦ ᐃᖅᑲᓇᐃᔭᕐᕕᒃᒥ ᐃᓅᔪᓐᓃᖅᑐᖃᕐᓯᒪᙱᑉᐸᑦ ᑕᖅᑭᓂ 12 ᐊᓂᒍᓵᖅᑐᓂᒃ
- ᐊᑖᓂ ᓇᓗᓇᐃᒃᑯᑎᐅᔪᑦ ᖃᓄᐃᓕᐅᕐᓂᖏᑦᑎᒍᑦ ᐃᑲᕐᕋᓕᐅᕈᑎᓂᒃ ᐊᓯᐅᔨᓂᕐᒧᑦ ᐋᓐᓂᖅᑐᕕᓂᕐᓄᑦ ᐅᕝᕙᓘᓐᓃᑦ ᐋᓐᓂᐊᓕᕐᓯᒪᓂᕐᒧᑦ ᑮᓇᐅᔭᖅᑖᕋᓱᒍᑎᑦ
ᐃᖅᑲᓇᐃᔭᖅᑎᑦᑎᔨᐅᔪᑦ ᖃᓄᐃᓕᐅᕈᑎᐅᔭᕆᐊᓕᖕᓂᒃ ᒪᓕᒃᑐᑦ ᐊᒻᒪᓗ ᓇᓗᓇᐃᖅᑕᐅᓯᒪᓗᑎᒃ ᐊᓯᖏᓐᓂᒃ ᐃᖅᑲᓇᐃᔭᕐᕕᖕᒥᑦ ᐋᓐᓂᐊᖃᖅᑕᐃᓕᒪᓂᕐᒥᑦ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ (OHS) ᐱᓕᕆᐊᓄᑦ ᓄᓇᑦᓯᐊᕐᒥ ᐅᕝᕙᓘᓐᓃᑦ ᓄᓇᕗᒥᑦ (ᓲᕐᓗ: ᐃᓕᓴᕆᔭᐅᔾᔪᑎᑖᕈᑎᑦ (COR)) ᖃᐅᔨᒪᔭᐅᔾᔪᑎᐅᓂᐊᕐᑐᑦ Advanced Safe Workplace-ᖃᕐᓂᕐᒥᒃ, ᐊᒻᒪᓗ ᐃᓱᒪᒋᔭᐅᓗᓂ ᐱᓕᕆᐊᖏᑦᑎᒍᑦ ᐱᕐᕈᓗᐊᕿᑎᑦᑎᑦᑕᐃᓕᕙᖕᓂᕐᒥᒃ.
ᑕᒪᕐᒥᒃ Safe Workplace ᐃᖅᑲᓇᐃᔭᖅᑎᐅᔪᑦ ᓇᓗᓇᐃᔭᖅᑕᐅᓯᒪᔪᑦ ᐅᕙᓂ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ (WSCC) ᖃᕋᓴᐅᔭᒃᑯᑦ ᐱᔨᑦᑎᕋᐅᑎᓂᒃ ᐊᒻᒪᓗ ᐸᐃᑉᐹᒧᐊᖅᑕᐅᔪᓐᓇᖅᑐᒥᒃ ᓇᓗᓇᐃᒃᑯᑎᒥᒃ ᐊᒻᒪ ᖃᕋᓴᐅᔭᒃᑯᑦ ᓇᓗᓇᐃᒃᑯᑎᒥᒃ ᐃᖅᑲᓇᐃᔭᕐᕕᒋᔭᖓᓂᒃ ᐅᕝᕙᓘᓐᓃᑦ ᖃᕋᓴᐅᔭᒃᑯᑦ ᓴᖅᑭᔮᒐᖓᓂᒃ ᐊᒻᒪ ᑎᑎᕋᖅᑕᐅᓯᒪᔪᓂᒃ ᐅᖃᓕᒫᒐᓂᒃ.
ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ (WSCC) ᐃᑲᔪᖅᑐᐃᓂᐊᖅᑐᑦ ᓇᖕᒥᓂᖅ ᐱᓕᕆᐊᕆᔭᐅᔪᓂᒃ ᐊᒻᒪ ᐃᖅᑲᓇᐃᔭᖅᑎᑦᑎᔨᓂᒃ ᐊᔪᕈᓐᓃᖅᑎᑕᐅᓯᒪᙱᑦᑐᓂᒃ ᓇᓗᓇᐃᕐᓯᓗᑎᒃ ᐃᖅᑲᓇᐃᔭᖅᑎᑦᑎᔨᐅᔪᑦ ᓇᐅᒃᑯᑦ ᐱᓕᕆᐊᖃᕆᐊᖃᕐᓂᖏᓐᓂᒃ ᐊᒻᒪᓗ ᑐᓴᐅᒪᑎᑕᐅᓗᑎᒃ ᐊᒻᒪ ᐃᑲᔪᕈᑎᖃᖅᑎᑕᐅᓗᑎᒃ ᐱᐅᓯᕚᓪᓕᕈᑎᐅᓂᐊᖅᑐᓂᒃ ᐱᕐᕈᓗᐊᕿᑎᑦᑎᑦᑕᐃᓕᓂᕐᒧᑦ ᐱᓕᕆᐊᒃᓴᓂᒃ.
“ᑐᕋᒐᖃᕋᓱᒃᑲᑦᑕ ᐃᑲᔪᕐᓗᑎᒍᑦ ᐃᖅᑲᓇᐃᔭᖅᑎᑦᑎᔨᐅᔪᑦ ᐱᕐᕈᓗᐊᕿᑦᑕᐃᓕᓂᕐᒥ ᐱᓕᕆᐊᖃᖅᑎᓐᓇᕋᓱᒡᓗᑎᒍ ᐃᖅᑲᓇᐃᔭᕐᕕᖏᓐᓂᒃ ᐅᑭᐅᕐᑕᖅᑐᕐᒥ ᐅᕝᕙᓘᓐᓃᑦ ᐋᓐᓂᐊᖃᖅᑕᐃᓕᑎᑦᑎᓂᕐᒥᒃ ᐊᒻᒪ ᖃᓄᐃᑎᑦᑎᑦᑕᐃᓕᓂᕐᒥᒃ,” ᐅᖃᖅᑐᖅ ᑕᐱ ᒪᓗᐊᐃ, ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ (WSCC) ᐊᖓᔪᖅᑳᖓ ᐊᒻᒪ ᐊᐅᓚᑦᑎᔨᖓ.
“ᐱᓕᕆᐊᖃᕐᓂᖅ ᐆᒧᖓ ᐃᖅᑲᓇᐃᔭᕐᕕᖕᒥᑦ ᐋᓐᓂᐊᖃᖅᑕᐃᓕᒪᓂᕐᒥᑦ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ ᐱᓕᕆᐊᒃᓴᒥᒃ ᐃᓛᓐᓂ ᐅᐊᑲᓪᓚᐅᓗᐊᖅᑰᔨᔭᑦᑐᖅ ᐅᓄᕐᑐᓄᑦ ᐃᖅᑲᓇᐃᔭᖅᑎᑦᑎᔨᓄᑦ. ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ (WSCC) Safe Workplace ᐱᓕᕆᐊᖓ ᐃᖅᑲᓇᐃᔭᖅᑎᑦᑎᔨᓂᒃ ᐱᓕᕆᐊᖃᕈᒪᓕᕈᑎᐅᓂᐊᕐᑐᖅ, ᐱᒋᐊᓕᓵᕋᓗᐊᖅᐸᑕ ᐅᕝᕙᓘᓐᓃᑦ ᐋᖅᑭᒃᓱᐃᕙᓪᓕᐊᔪᒪᒃᐸᑕ”, ᐅᖃᖅᑐᖅ ᒪᓗᐊᐃ.
ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ (WSCC) ᐋᖅᑭᒃᓱᐃᓚᐅᕐᓯᒪᖕᒪᑕ ᑖᔅᓱᒥᖓ ᐱᓕᕆᐊᒃᓴᒥᒃ ᒪᓕᒃᖢᑎᒃ ᐃᖅᑲᓇᐃᔭᖅᑎᓂᒃ ᑐᓴᑲᑕᒃᑕᖏᓐᓂᒃ, ᐃᖅᑲᓇᐃᔭᕐᕕᖕᒥᑦ ᐋᓐᓂᐊᖃᖅᑕᐃᓕᒪᓂᕐᒥᑦ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ ᑭᒡᒐᖅᑐᐃᔨᓂᒃ, ᐱᓕᕆᖃᑎᒋᔭᐅᓪᓚᕆᒃᑐᓂᒃ, ᓄᓇᓕᖕᓂ ᒐᕙᒪᐅᔪᓂᒃ ᐊᒻᒪ ᐊᓯᖏᓐᓂᒃ ᑎᒍᒥᐊᖅᑎᓂᒃ.
ᖃᐅᔨᒋᐊᒃᑲᓐᓂᕈᒪᒍᕕᑦ ᑕᑯᒋᐊᕐᓗᒍ www.wscc.nt.ca/health-safety/safe-workplace-program
-30-
Maggie Collins
ᐊᐅᓚᑦᑎᔨ, ᑐᓴᐅᒪᖃᑎᒋᒍᑎᓂᑦ
ᐅᖄᓚᐅᑦ: (867) 445-8421
ᐊᑭᖃᙱᑦᑐᖅ: (800) 661-0792 ᓇᕿᑦᑕᓗᒍᓗ 3854