ᓄᑖᖅ ᐃᖅᑲᓇᐃᔮᒧᑦ ᐋᓐᓂᐊᖃᕐᑕᐃᓕᒪᓂᖅ ᐊᑦᑕᕐᓇᖅᑕᐃᓕᒪᓂᕐᓗ ᐊᑐᐊᒐᖏᑦ
ᒪᓕᒐᐅᔪᖅ ᓄᓇᕗᒻᒥ
ᐃᖃᓗᐃᑦ, ᓄᓇᕗᑦ (ᐊᐃᕆᓕ 7, 2016) – ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᑦ (WSCC) ᑐᓴᖅᑎᑦᑎᔪᑦ ᓄᑖᒥᒃ ᐃᖅᑲᓇᐃᔮᒧᑦ ᐋᓐᓂᐊᖃᕐᑕᐃᓕᒪᓂᖅ ᐊᑦᑕᕐᓇᖅᑕᐃᓕᒪᓂᕐᓗ ᐊᑐᐊᒐᖏᑦ ᒪᓕᒐᐅᓕᖅᑐᑦ ᓄᓇᕗᒻᒥ.
ᐊᑐᐊᒐᑦ ᐱᒋᐊᖅᑐᑦ ᐃᓗᐊᓂ ᑲᒪᒋᔭᕆᐊᖃᖅᑐᓂ ᐊᑐᖃᑦᑕᖅᑐᓂ (IRS), ᐃᖅᑲᓇᐃᔭᕐᕕᖕᒥ ᐊᑦᑕᕐᓇᖅᑕᐃᓕᒪᓂᖅ ᐊᒥᖅᑳᖃᑎᒋᔭᐅᓪᓗᓂ ᑲᒪᒋᔭᕆᐊᖃᖅᑐᖅ ᐃᖅᑲᓇᐃᔭᖅᑎᑦᑎᔨᓄᑦ ᐃᖅᑲᓇᐃᔭᖅᑎᓄᓪᓗ. ᑐᓂᓯᓲᑦ ᐃᖅᑲᓇᐃᔭᕐᕕᖕᓂ ᓄᑖᓂᒃ ᐋᖅᑭᒃᓯᒪᓂᐅᔪᓂᒃ ᓈᒻᒪᒃᓴᖅᑐᓂᒃ ᐅᑭᐅᖅᑕᖅᑐᒥ ᐊᐅᓚᓂᐅᔪᓂᒃ ᐅᓪᓗᒥ, ᖃᐅᔨᒪᒋᐊᕐᖢᑎᒃ ᐅᑭᐅᖅᑕᖅᑐᒥᐅᑕᑦ ᓇᓗᓇᙱᑦᑐᓂᒃ, ᐱᐊᓂᒃᓯᒪᔪᓂᒃ ᑐᕌᕈᑎᒃᓴᓂᑦ, ᐃᖅᑲᓇᐃᔭᖅᑎᓪᓗ ᐃᖅᑲᓇᐃᔭᖅᑎᑦᑎᔨᓪᓗ ᐊᐅᓚᔾᔪᑎᖃᖅᑐᑦ ᐊᑕᐅᓯᐅᙱᑦᑐᒥᒃ ᓄᓇᕗᒻᒥ ᐊᕕᒃᑐᖅᓯᒪᓂᐅᔪᓂ ᑲᓇᑕᒥᓘᓐᓃᑦ ᐊᕕᒃᑐᖅᓯᒪᓂᐅᔪᓂ ᐊᖏᒃᓕᒋᐊᖅᑎᑦᑎᓯᒪᔪᑦ ᖃᐅᔨᒪᓕᕐᓂᕐᓂ ᐃᖅᑲᓇᐃᔮᒧᑦ ᐋᓐᓂᐊᖃᕐᑕᐃᓕᒪᓂᖅ ᐊᑦᑕᕐᓇᕐᑕᐃᓕᒪᓂᕐᓗ ᐱᔭᕆᐊᓕᖏᓐᓂ. ᐊᑐᐊᒐᑦ ᐃᓕᔭᐅᓚᐅᖅᓯᒪᔪᑦ ᓄᓇᑦᓯᐊᒥ 2015−ᒥ ᐊᒻᒪᓗ ᐅᓄᖅᑐᑦ ᓄᓇᕗᒻᒥ ᑲᑐᔾᔨᖃᑎᒌᑦ ᐊᑐᖃᑦᑕᖅᑕᖓᑦ ᒫᓐᓇᐅᔪᖅ ᖃᐅᔨᒪᓇᓱᒍᑎᒋᓪᓗᓂᔾᔪᒃ ᐃᖕᒥᖕᓂᒃ ᐊᓯᔾᔨᕈᑎᓄᑦ.
“ᐱᒻᒪᕆᐅᔪᖅ ᐃᖅᑲᓇᐃᔭᖅᑎᑦᑎᔨᓄᑦ ᕿᒥᕐᕈᑦᑎᐊᕐᓗᑎᒃ ᓄᑖᒥᒃ ᐊᑐᐊᒐᓂᑦ ᑕᑯᒋᐊᕐᓗᑎᒃ ᖃᓄᖅ ᐊᑐᕐᒪᖔᑕ ᐃᖅᑲᓇᐃᔭᕐᕕᖏᓐᓄᑦ. ᑕᐃᒃᑯᐊ ᒪᓕᑦᑎᐊᖅᓯᒪᔪᑦ ᐊᑐᓵᖅᑐᒥᒃ ᑭᒃᑯᑐᐃᓐᓇᕐᓄᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᐊᑐᐊᒐᓂᑦ ᓇᓂᓯᓪᓗᐊᖅᑐᑦ ᓅᑕᐅᓂᖓᓂᒃ ᓄᑖᒧᑦ ᐊᑐᐊᒐᓄᑦ ᓈᒻᒪᒃᓗᓂ ᐱᕚᓪᓕᐊᔾᔪᑎ ᐃᓗᐊᓂ ᐊᑦᑕᕐᓇᖅᑕᐃᓕᒪᓂᕐᒧᑦ ᐱᓕᕆᐊᒃᓴᖏᓐᓂ. ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᑦ ᐊᑐᐃᓐᓇᐅᔪᑦ ᐅᖃᓘᑎᒃᑯᑦ ᖃᕋᓴᐅᔭᒃᑯᓪᓗ ᑭᐅᔪᓐᓇᖅᑐᑦ ᐊᐱᖅᑯᑎᓂᑦ, ᐱᓕᕆᐊᖃᕐᓂᐊᕆᓪᓗᑎᒃ ᖃᐅᔨᔾᔪᑎᒃᓴᓂᑦ ᐃᓕᓐᓂᐊᕐᓂᕐᓂ ᐊᖏᔪᓂᑦ ᓄᓇᓕᐅᔪᓂᑦ ᓄᓇᕗᓕᒫᒥ,” ᐅᖃᖅᑐᖅ ᑕᐃᕝ ᒍᕋᓐᑎ, ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᑦ ᐃᓱᒪᑕᖓᑦ ᓄᓇᓕᖕᓂᓗ ᒪᑭᐅᒪᐃᓐᓇᕈᑎᒃᓴᓄᑦ ᑎᑎᕋᖅᑎᖓᑦ.
ᑖᒃᑯᐊ ᐊᑐᐊᒐᑦ ᐊᑐᖅᑐᑦ ᐱᓯᓂᓯᓕᒫᓄᑦ ᐊᐅᓇᔪᓄᑦ ᓄᓇᕗᒻᒥ ᓄᓇᑦᓯᐊᒥᓗ, ᐃᓚᐅᙱᖦᖢᑎᒃ ᑕᐃᒃᑯᐊ ᒐᕙᒪᑐᖃᒃᑯᓐᓄᑦ ᐊᑐᐊᒐᖃᖅᑎᑕᐅᔪᓄᑦ. ᐊᑐᐊᒐᑦ ᑕᒪᑮᓪᓗ ᒪᓕᒐᐅᔪᑦ, ᐱᒻᒪᕆᐅᓪᓗᑎᒃᓗ ᐱᖃᐃᓐᓇᕋᓱᖕᓂᕐᒧᑦ ᓴᙱᔪᒥᒃ ᐅᑭᐅᖅᑕᑦᑐᒥ ᐊᑦᑕᕐᓇᖅᑕᐃᓕᒪᓂᕐᒧᑦ ᐃᓕᖅᑯᓯᖃᕐᓂᕐᒥᑦ. ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᑦ ᐊᐅᓪᓚᑲᑕᖕᓂᐊᖅᑐᑦ ᐊᖏᔪᓄᑦ ᓄᓇᓕᐅᔪᓄᑦ ᓄᓇᕗᒻᒥ ᐱᑎᑦᑎᔭᕐᑐᕐᓗᑎᒃ ᐃᓚᒃᑲᓐᓂᖏᓐᓂ ᑐᓴᕈᑎᒃᓴᓂᑦ ᑭᐅᕙᒃᓗᑎᒃᓗ ᐊᐱᖅᑯᑎᓂᒃ ᖃᓄᑐᐃᓐᓇᖅ ᐃᖅᑲᓇᐃᔭᖅᑎᑦᑎᔨᑦ ᐃᖅᑲᓇᐃᔭᖅᑎᓪᓘᓐᓃᑦ ᐱᖏᓐᓂᒃ, ᑕᐅᑐᖃᑦᑕᐅᑎᓗᑎᒃ. ᐃᓚᒃᑲᓐᓂᖓ, ᑭᓇᑐᐃᓐᓇᖅ ᐊᐱᖅᑯᑎᒃᓴᓕᒃ ᒪᓕᑦᑎᐊᕐᓂᕐᒥᒃ ᐱᖁᔭᐅᔪᖅ ᖃᐅᔨᒋᐊᕐᓗᑎᒍᑦ ᐅᕗᖓ OHSRegs@wscc.nu.ca.
ᓄᑖᖅ ᐊᑐᐊᒐᑦ ᐊᑐᐃᓐᓇᐅᔪᑦ ᖃᕋᓴᐅᔭᕐᒧᐊᖅᑕᐅᔪᓐᓇᖅᑐᑦ ᐅᕙᓂ OHSRegs.ca.
-30-
ᑭᒻ ᕚᓪᑯ
ᐊᐅᓚᑦᑎᔨ, ᑐᓴᐅᒪᔪᓕᕆᔨᒃᑯᑦ
ᐅᖃᓘᑖ: (867) 920-3846
ᐊᑭᖃᙱᑦᑐᖅ: (800) 661-0792 ᑐᕌᕈᑖ. 3846