ᔭᓗᓇᐃᕝ, ᓄᓇᑦᓯᐊᖅ (ᕕᕝᕗᐊᕆ 1, 2021) – ᐃᖅᑲᓇᐃᔭᖅᑎᖁᑎᓖᑦ ᓄᓇᑦᓯᐊᕐᒥ ᐊᒻᒪᓗ ᓄᓇᕗᒻᒥ ᒫᓐᓇᐅᔪᖅ ᐅᓂᒃᑳᓕᐊᖃᕈᓐᓇᖅᓯᔪᑦ ᐃᖅᑲᓇᐃᔭᕐᕕᖕᒥᑦ ᖃᓄᐃᑦᑐᕕᓂᕐᓂᒃ ᐊᒻᒪᓗ ᐋᓐᓂᕐᓂᐅᔪᓂᒃ ᖃᕋᓴᐅᔭᑎᒍᑦ ᑕᐃᑰᓇ ᖃᕋᓴᐅᔭᒃᑯᑦ ᐱᔨᑦᑎᕋᐅᑎᒃᑯᑦ, WSCC Connect.
“ᑖᒃᑯᐊ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᐱᓕᕆᖃᑎᖃᖅᓯᒪᔪᑦ ᐃᖅᑲᓇᐃᔭᖅᑎᖁᑎᓕᖕᓂᒃ ᖃᐅᔨᓴᖅᖢᑎᒃ ᑖᔅᓱᒥᖓ ᓄᑖᖑᔪᒥᒃ ᐱᔨᑦᑎᕋᐅᑎᒥᒃ ᐊᒻᒪᓗ ᐱᓕᒻᒪᒃᓴᐃᓂᒃᑯᑦ ᐃᑲᔪᕐᓗᑎᒃ ᐊᓯᔾᔨᖅᐸᓪᓕᐊᑎᓪᓗᒋᑦ ᑎᑎᕋᕆᐊᓕᖕᓂᒃ ᐸᐃᑉᐹᓂᒃ”, ᐅᖃᖅᐳᖅ ᑎᐊᐱ ᒪᓗᐊᐃ, ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᐊᖓᔪᖅᑳᖅ ᐊᒻᒪᓗ ᑎᑎᕋᕐᕕᖕᒥ ᐊᖓᔪᖅᑳᖅ. “WSCC Connect ᐃᑲᔪᖅᐳᖅ ᐃᖃᓇᐃᔭᖅᑎᖁᑎᓕᖕᓂᒃ ᖃᕋᓴᐅᔭᒃᑯᑦ ᐅᓂᒃᑳᕆᓂᕐᒥᑦ ᐱᓕᕆᓂᐅᔪᒥᒃ ᐱᔭᕆᐊᑭᓐᓂᖅᓴᐅᓪᓗᓂ, ᓱᒃᑲᓂᖅᓴᐅᓪᓗᓂ ᐊᒻᒪᓗ ᐱᔭᐅᔾᔭᐃᓐᓂᖅᓴᐅᓐᓇᖅᑐᓂ.”
ᐅᓂᒃᑳᓕᐅᕐᓂᕐᒧᑦ ᒪᓕᒃᑕᐅᔭᕆᐊᓖᑦ ᑕᐃᑰᓇ ᐃᖅᑲᓇᐃᔭᖅᑎᒧᑦ ᐋᓐᓂᖅᑐᖅᓯᐅᑎᓕᕆᔨᒃᑯᑦ ᒪᓕᒐᖓᒍᑦ, ᐊᑦᑕᓇᔾᔭᐃᖅᓯᒪᓂᕐᒧᑦ ᐱᖁᔭᓂᑦ ᐊᒻᒪᓗ ᒪᓕᒐᕐᓂᒃ ᐊᒻᒪᓗ ᐅᔭᕋᖕᓂᐊᕐᕕᖕᓂᒃ ᐋᓐᓂᐊᖃᕐᓇᖏᑦᑐᓕᕆᓂᒃᑯᑦ ᐊᑦᑕᓇᖅᑐᒦᑎᑦᑎᑦᑕᐃᓕᒪᓂᒃᑯᓪᓗ ᐱᖁᔭᑦ ᐊᒻᒪᓗ ᒪᓕᒐᑦ ᐊᓯᔾᔨᖏᑦᑐᑦ.
ᐃᖅᑲᓇᐃᔭᖅᑎᖁᑎᖃᖅᑐᓕᒫᑦ ᐅᓂᒃᑳᓕᐅᕆᐊᓖᑦ ᐃᖅᑲᓇᐃᔭᕐᕕᖕᒥᑦ ᖃᓄᐃᑦᑐᕕᓂᕐᓂᒃ, ᐋᓐᓂᕐᓂᐅᔪᓂᒃ ᐅᕝᕙᓘᓐᓃᑦ ᐅᓗᕆᐊᓇᖅᑐᒥ ᖃᓄᐃᓐᓂᐅᔪᒥᑦ ᑖᒃᑯᓄᖓ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᒃᑯᓐᓄᑦ ᐃᓗᐃᑦᑐᕐᒥᒃ ᐱᔭᕇᖅᓯᓗᑎᒃ ᐃᖅᑲᓇᐃᔭᖅᑎᖁᑎᓕᖕᓄᑦ ᐅᓂᒃᑳᓕᐊᖓᓂ ᖃᓄᐃᓐᓂᐅᔪᒥ ᐅᓪᓗᐃᑦ ᐱᖓᓱᑦ ᐃᖅᑲᓇᐃᔭᕐᓇᐅᑎᓪᓗᒍ ᐃᓗᐊᓂ. ᑕᒪᓐᓇ ᐅᓂᒃᑳᓕᐅᕆᐊᖃᕐᓂᖅ ᒪᓕᒃᑕᐅᑦᑎᐊᖏᑉᐸᑦ ᐊᑭᓖᑎᑕᐅᑐᐃᓐᓇᕆᐊᖃᖅᑐᖅ.
ᐱᕐᕈᓗᐊᕿᓂᐅᔪᓂᑦ ᐱᑎᑦᑎᔪᒥ ᑎᒥᒃᑯᑦ ᐋᓐᓂᕐᓂᕐᔪᐊᖑᔪᒥᑦ, ᑐᖁᓂᕐᒥᒃ ᐅᕝᕙᓘᓐᓃᑦ ᐅᓗᕆᐊᓇᖅᑐᒥ ᖃᓄᐃᓐᓂᐅᔪᒥᑦ, ᐃᖅᑲᓇᐃᔭᖅᑎᖁᑎᓖᑦ ᐅᖄᓕᐊᓐᓇᕆᐊᓖᑦ ᐃᑲᕐᕋᓄᑦ−24-ᓄᑦ ᖃᓄᐃᑦᑐᕕᓂᕐᓂ ᐅᓂᒃᑳᓕᐅᕐᓂᕐᒧᑦ ᐅᖃᓗᒡᕕᒃᓴᖅ ᐅᕗᖓ 1-800-661-0792 ᕿᓚᒻᒥᐅᓛᒃᑯᑦ. ᐅᓇ ᐃᓚᔭᐅᓯᒪᔪᖅ ᐱᐊᓂᒃᓯᓇᓱᒡᓗᓂ ᐃᖅᑲᓇᐃᔭᖅᑎᑦᑎᔫᑉ ᐅᓂᒃᑳᖏᓐᓂᒃ ᖃᓄᐃᓐᓂᕐᓄᑦ ᖃᕋᓴᐅᔭᒃᑯᑦ.
ᐃᖅᑲᓇᐃᔭᖅᑎᖁᑎᓕᖕᓄᑦ ᐅᓂᒃᑳᓕᐊᖓᓂ ᖃᓄᐃᓐᓂᐅᔪᒥ ᐃᓚᒋᐊᕈᑕᐅᕗᖅ ᐊᓯᖏᓐᓄᑦ ᐱᔨᑦᑎᕋᐅᑎᓄᑦ ᑕᐃᑲᓂ WSCC Connect-ᒧᑦ, ᐃᓚᖃᖅᖢᓂ ᐅᓂᒃᑳᓕᐅᕐᓂᕐᒥᑦ ᐊᑦᑕᕐᓇᖅᑐᓂᒃ ᐱᔭᒃᓴᕆᔭᐅᔪᓂᒃ, ᑐᒃᓯᕋᕐᓂᕐᒥᑦ ᐃᖅᑲᓇᐃᔭᒃᑲᓐᓂᕈᓐᓇᕐᓂᕐᒧᑦ ᑎᑎᖅᑲᕐᒥᒃ, ᓇᖕᒥᓂᕆᔭᕐᓂᒃ ᐊᑎᓕᐅᕆᓂᕐᒥᑦ, ᑐᑭᓯᒋᐊᕈᑎᒃᓴᓄᑦ ᐊᑭᓕᐅᑎᒃᓴᓄᑦ ᐊᒻᒪᓗ ᖃᕋᓴᐅᔭᒃᑯᑦ ᐊᑭᓖᖔᕈᓐᓇᕐᓂᕐᒧᑦ. ᖃᐅᔨᒋᐊᒃᑲᓐᓂᕈᒪᒍᕕᑦ ᐅᕗᖓᕐᓗᑎᑦ wscc.nt.ca ᐅᕝᕙᓘᓐᓃᑦ wscc.nu.ca
-30-
ᒫᒋ ᑳᓕᓐᔅ
ᐊᐅᓚᑦᑎᔨ, ᑐᓴᐅᒪᖃᑎᒋᒍᑎᓂᑦ
ᐅᖄᓚᐅᑦ: (867) 445-8421
ᐊᑭᖃᙱᑦᑐᖅ: (800) 661-0792 ᓇᕿᑦᑕᓗᒍᓗ 3854
ᐃᕐᖐᓐᓈᖅᑕᐅᑖ: maggie.collins@wscc.nt.ca