ᓄᕙᒡᔪᐊᕐᓇᖅ-19 (COVID-19) ᓄᑖᖑᓛᖅ ᑐᓴᒐᒃᓴᖅ

ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᑎᑎᕋᕐᕕᖏᑦ ᐃᖃᓗᖕᓂᑦ ᐊᒻᒪ ᐃᓅᕕᒃᒥᑦ ᒪᑐᐃᖓᓕᕐᑐᑦ ᑭᒃᑯᑐᐃᓐᓇᕐᓄᑦ. ᔭᓗᓇᐃᒥ ᑎᑎᕋᕐᕕᒃ ᒪᑐᐃᒃᑲᓐᓂᓛᖅᑐᖅ ᐅᓗᕆᐊᓇᕈᓐᓃᖅᑎᑕᐅᓚᐅᕐᑎᓪᓗᒋᑦ ᑎᑎᕋᕐᕕᒃᓴᕆᓂᐊᕐᑕᕗᑦ. ᑕᑯᒋᐊᕐᓗᒍ ᓄᕙᒡᔪᐊᕐᓇᖅ-19-ᒧᑦ ᒪᒃᐱᒐᖅ ᐱᔨᑦᑎᕋᐅᑎᓄᑦ ᐱᒻᒪᕆᖕᓂ ᑕᑯᔪᓐᓇᕐᓂᐊᕋᕕᑦ ᓄᑖᖑᓛᓂᒃ, ᐊᒻᒪᓗ ᓄᕙᒡᔪᐊᕐᓇᖅ-19 ᐃᑲᔫᑎᒃᓴᓄᑦ ᒪᒃᐱᒐᖅ ᐃᖅᑲᓇᐃᔭᕐᕕᖕᓄ ᐃᑲᔫᑎᐅᔪᓐᓇᖅᑐᓄᑦ.

ᐱᕙᓪᓕᐊᔪᑦ ᓴᖅᑭᑎᑕᐅᔪᑦ: ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᒪᓕᒃᑕᐅᔪᓐᓇᖅᑐᖁᑎᖏᑦ ᐃᖅᑲᓇᐃᔭᕐᕖᑦ ᐅᒃᑯᐃᒃᑲᓐᓂᖅᐸᓪᓕᐊᑎᓪᓗᒋᑦ ᐊᑦᑕᕐᓇᙱᑦᑐᒃᑯᑦ ᐊᑐᖅᑎᓪᓗᑕ ᓄᕙᒡᔪᐊᕐᓇᖅ-19

ᔫᓂ 15 / 2020

ᐱᕙᓪᓕᐊᔪᑦ ᓴᖅᑭᑎᑕᐅᔪᑦ: ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᒪᓕᒃᑕᐅᔪᓐᓇᖅᑐᖁᑎᖏᑦ ᐃᖅᑲᓇᐃᔭᕐᕖᑦ ᐅᒃᑯᐃᒃᑲᓐᓂᖅᐸᓪᓕᐊᑎᓪᓗᒋᑦ ᐊᑦᑕᕐᓇᙱᑦᑐᒃᑯᑦ ᐊᑐᖅᑎᓪᓗᑕ ᓄᕙᒡᔪᐊᕐᓇᖅ-19

ᐃᖃᓗᐃᑦ, ᓄᓇᕗᑦ (ᒪᐃ 15, 2020) – ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ (WSCC) ᓴᖅᑮᖅᑲᐅᔪᑦ ᐅᓪᓗᒥ ᖄᒃᑲᓐᓂᐊᒍᑦ ᑎᑎᖅᑲᓂᒃ ᐃᑲᔪᕐᓂᐊᖅᑐᓂᒃ ᐃᖅᑲᓇᐃᔭᕐᕕᖕᓂᒃ ᐃᓄᐃᓴᒃᖠᒋᐊᖁᓪᓗᒋᑦ ᖁᐊᖅᓵᕐᓇᕈᑏᑦ ᐊᐃᑦᑐᕐᓗᒃᑕᐅᓂᕐᒧᑦ ᑕᒪᑐᒧᖓ ᓄᕙᒡᔪᐊᕐᓇᖅ-19 ᐃᖅᑲᓇᐃᔭᕐᕕᖏᓐᓂᑦ.

ᓴᖅᑭᑦᑎᓂᐊᖅᑐᖅ ᑕᓪᓕᒪᓂᒃ ᒪᓕᒃᑕᐅᔪᓐᓇᖅᑐᓂᒃ ᐃᖅᑲᓇᐃᔭᕐᕕᖕᓂᑦ ᒪᓕᒃᑕᐅᓪᓗᐊᖅᑐᓂᒃ ᖃᐅᔨᓴᓕᕌᖓᑕ ᖁᐊᖅᓵᕐᓇᕈᑎᓂᒃ ᐊᒻᒪᓗ ᐱᕙᒌᔭᐅᑎᓂᒃ ᓄᕙᒡᔪᐊᕐᓇᖅ-19-ᒧᑦ ᐊᐃᑦᑐᕐᓗᒃᑕᐅᔪᖃᕐᓂᕈᓂ ᐊᐅᓚᑦᑎᓂᕐᒧᑦ ᐸᕐᓇᐅᑎᒥᒃ ᓇᓗᓇᐃᔭᐃᖁᓪᓗᒋᑦ ᑭᓱᓂᒃ ᐊᑦᑕᕐᓇᖅᑕᐃᓕᒪᔾᔪᑎᓂᒃ ᐊᒻᒪᓗ ᐊᑐᖅᑕᐅᔪᓐᓇᖅᑐᓂᒃ ᓴᖅᑭᑦᑎᓯᒪᔭᕆᐊᖃᕐᒪᖔᑕ ᐅᒃᑯᐃᒃᑲᓐᓂᕐᓂᐊᖅᑎᓪᓗᒋᑦ ᐊᑦᑕᕐᓇᙱᓪᓗᑎᒃ.

“ᐊᐱᕆᓯᒪᔪᒍᑦ ᐃᖅᑲᓇᐃᔭᕐᕕᖕᓂᑦ ᐃᓚᓕᐅᔾᔨᓯᒪᖁᓪᓗᒋᑦ ᐃᖅᑲᓇᐃᔭᖅᑎᓂᒃ ᐊᔪᕐᓇᙱᑐᐊᕌᖓᑦ ᑕᒪᒃᑯᓇᓂ ᐊᑦᑕᕐᓇᖅᑕᐃᓕᒪᓂᕐᒧᑦ ᐸᕐᓇᐅᑎᖏᓐᓂᑦ, ᐃᓚᐅᓪᓗᑎᒃ ᑕᑯᖅᑳᑲᑦᑕᖅᑐᑦ ᐃᖅᑲᓇᐃᔭᖅᑏᑦ, ᐊᖏᔪᖅᑳᑦ ᐊᒻᒪᓗ ᐱᓕᕆᖃᑎᒌᒃᑐᑦ  ᐋᓐᓂᐊᖃᕐᓇᙱᑦᑐᓕᕆᓂᕐᒥᑦ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ ᑲᑎᒪᔨᐊᓛᑦ, ᐊᒻᒪᓗ/ᐅᕝᕙᓘᓐᓃᑦ ᐃᖅᑲᓇᐃᔭᖅᑏᑦ ᑭᒡᒐᖅᑐᐃᔨᖏᓐᓂᒃ. ᐃᒪᐃᒐᔪᖕᓂᖓᓄᑦ ᐃᖅᑲᓇᐃᔭᖅᑏᑦ ᑲᒪᒋᔭᖃᑦᑎᐊᕈᓐᓇᓛᖑᖃᑦᑕᕐᓂᖏᓐᓄᑦ ᓇᓗᓇᐃᔭᐃᑎᓪᓗᒋᑦ ᖁᐊᖅᓵᕐᓇᕈᓐᓇᖅᑐᓂᒃ. ᐃᓚᐅᑎᓪᓗᒋᑦ ᑲᔪᓯᕙᓪᓕᐊᓂᕐᓂᒃ ᑲᔪᖏᖅᓴᐃᖕᒪᑦ ᐃᓚᐅᑦᑎᐊᕐᓂᕐᒥᒃ ᐊᒻᒪᓗ ᐃᑲᔪᖅᐸᒃᖢᓂ ᐃᓱᒫᓘᑎᖏᑦ ᑐᓴᖅᑕᐅᖁᓪᓗᒋᑦ ᐊᒻᒪᓗ ᑲᒪᒋᔭᐅᖁᓪᓗᒋᑦ.” ᐅᖃᓚᐅᖅᑐᖅ ᑎᐊᐃ ᒪᓗᐃ, ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᓄᑦ ᐊᖓᔪᖅᑳᖅ ᐊᒻᒪᓗ ᑎᑎᕋᕐᕕᖕᒥᑦ ᐊᖓᔪᖅᑳᖅ.

“ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᐊᖏᖅᓯᔭᕆᐊᖃᙱᑦᑐᑦ ᐊᐃᑦᑐᕐᓗᒃᑕᐅᔪᖃᕐᓂᕈᓂ ᐊᐅᓚᑦᑎᓂᕐᒧᑦ ᐸᕐᓇᐅᑎᓂᒃ, ᑭᓯᐊᓂᓕ ᐸᕐᓇᐅᑏᑦ ᓴᖅᑭᑕᐅᓯᒪᔭᕆᐊᓖᑦ ᐊᒻᒪᓗ ᐊᑐᐃᓐᓇᐅᓗᑎᒃ ᖃᐅᔨᓴᖅᑎ ᕿᒥᕐᕈᔪᒪᓐᓂᕈᓂ. ᐊᑐᕐᓗᑎᒃ ᖃᐅᔨᓴᕐᓂᕐᓂᒃ, ᐱᓕᕆᖃᑎᒋᓪᓚᕆᒃᑕᕗᑦ ᐃᖅᑲᓇᐃᔭᕐᕖᑦ ᐊᒻᒪᓗ ᐃᖅᑲᓇᐃᔭᖅᑏᑦ ᐃᑲᔪᕈᒪᓪᓗᒋᑦ ᐊᑐᖅᑕᐅᔭᕆᐊᖃᖅᑐᓂᒃ ᓴᐳᑎᓯᒪᖁᓪᓗᒋᑦ ᐃᖅᑲᓇᐃᔭᖅᑎᖏᑦ, ᐱᔨᑦᑎᕋᖅᑕᖏᑦ ᐊᒻᒪᓗ ᓂᐅᕕᖅᐸᒃᑐᑦ.” ᐅᖃᑐᖅ ᒪᓗᐃ.

ᐱᕙᒌᔭᕐᓗᒋᑦ ᐸᕐᓇᐅᑎᑎᑦ ᐅᑯᐊ ᑕᓪᓕᒪᑦ ᒪᓕᒍᓐᓇᖅᑕᑎᑦ:

1. ᐱᐊᓂᒡᓗᒍ ᐃᖅᑲᓇᐃᔭᕐᕕᖕᒥᑦ ᖁᐊᖅᓵᓇᕈᓐᓇᖅᑐᓄᑦ ᖃᐅᔨᓴᕈᑎ ᓇᖕᒥᓂᖁᑎᖕᓂᑦ.

2. ᐊᑐᓂ ᐃᖅᑲᓇᐃᔭᖅᑎᑎᑦ ᐱᐊᓂᒃᓯᑎᑉᐸᒡᓗᒋᑦ ᐃᖅᑲᓇᐃᔭᕐᕕᖕᒥᑦ ᖁᐊᖅᓵᓇᕈᓐᓇᖅᑐᓄᑦ ᖃᐅᔨᓴᕈᑎᒥᒃ. ᑖᓐᓇ ᐊᐱᕆᓯᒪᓂᐊᕐᒪᑦ ᑐᓴᐅᒪᔾᔪᑎᓂᒃ ᓇᓗᓇᐃᓪᓚᕆᒃᓯᒪᔪᓂᒃ ᐊᑐᓂ ᐃᖅᑲᓇᐃᔮᒧᑦ ᐅᕝᕙᓘᓐᓃᑦ ᐱᓕᕆᐊᒃᓴᒧᑦ ᐃᖅᑲᓇᐃᔭᕐᕕᖕᒥᑦ.

3. ᐊᑐᕐᓗᒍ ᖁᐊᖅᓵᕐᓇᕈᓐᓇᖅᑐᓄᑦ ᐊᒻᒪᓗ ᖁᐊᖅᓵᕐᓇᕈᓐᓇᖅᑐᓂᒃ ᓴᖅᑮᖁᓪᓗᒋᑦ ᐊᐃᑦᑐᕐᓗᒃᑕᐅᔪᖃᕐᓂᖅᐸᑦ ᐊᐅᓚᑦᑎᓂᕐᒧᑦ ᐸᕐᓇᐅᑎᒥᒃ. ᑖᓐᓇ ᐸᕐᓇᐅᑦ ᓇᓗᓇᐃᔭᐃᓯᒪᔪᑦ ᖃᓄᖅ ᐃᖅᑲᓇᐃᔭᕐᕖᑦ, ᐊᖏᔪᖅᑳᑦ ᐊᒻᒪᓗ ᐃᖅᑲᓇᐃᔭᖅᑏᑦ ᐱᑕᖃᕈᓐᓃᖅᑎᑦᑎᔪᓐᓇᕐᒪᖔᑕ ᐅᕝᕙᓘᓐᓃᑦ ᐊᐅᓚᑦᑎᔪᓐᓇᕐᒪᖔᑕ ᖁᐊᖅᓵᕐᓇᕈᓐᓇᖅᑐᓂᒃ ᑕᒪᑐᒧᖓ ᓄᕙᒡᔪᐊᕐᓇᖅ-19-ᒧᑦ ᐊᐃᑦᑐᕐᓗᒃᑕᐅᓂᕐᒧᑦ ᐃᖅᑲᓇᐃᔭᕐᕕᖕᒥᑦ.

4. ᐊᑐᓕᖅᑎᓪᓗᒋᑦ ᐱᑕᖃᕆᐊᖃᖅᑐᑦ ᐊᐅᓚᑦᑎᔾᔪᑏᑦ ᐊᑐᖅᑕᐅᓕᒻᒪᒃᓴᓗᒋᑦ:

  • ᐋᖅᑭᒃᓱᐃᓗᑎ ᐅᕝᕙᓘᓐᓃᑦ ᐃᓕᐅᖃᐃᓗᑎ ᑐᓗᕐᑕᕐᕕᐅᔪᓐᓇᖅᑐᓂᒃ, ᐊᒻᒪᓗ ᖃᕋᓴᐅᔭᒃᑯᑦ ᐱᔨᑦᑎᕋᐅᑎᓕᕆᔾᔪᑎᓂᒃ;
  • ᐋᖅᑭᒃᓱᐃᓗᑎ ᓄᑖᓂᒃ ᐊᑐᐊᒐᕐᓂᒃ ᐊᒻᒪ ᖃᓄᐃᓕᐅᕈᑎᒃᓴᓂᒃ ᐱᓕᕆᐊᕆᓂᐊᕐᓗᒋᑦ ᖁᐊᕐᓵᕐᓇᕈᑎᐅᔪᓐᓇᖅᑐᑦ;
  • ᐃᓕᓐᓂᐊᖅᑎᓪᓗᒋᑦ ᐃᖅᑲᓇᐃᔭᖅᑎᑎᑦ ᑕᒪᒃᑯᓂᖓ ᓄᑖᓂᒃ ᐊᐅᓚᑦᑎᔾᔪᑎᓂᒃ, ᐊᑐᐊᒐᕐᓂᒃ, ᒪᓕᒃᑕᐅᔪᓐᓇᖅᑐᓂᒃ ᐊᒻᒪᓗ ᓇᓗᓇᐃᔭᐃᓂᕐᒥᒃ ᖁᐊᖅᓵᕐᓇᕈᓐᓇᖅᑐᓄᑦ ᐊᒻᒪᓗ ᐅᖃᖅᓵᕋᓐᓇᖅᑐᓄᑦ ᐃᖅᑲᓇᐃᔭᕐᕕᖕᓂᑦ;
  • ᓂᐅᕕᕐᓗᑎ ᐱᖁᑎᒃᓴᓂᒃ ᓇᖕᒥᓂᖅ ᐋᓐᓂᖅᑕᐃᓕᔾᔪᑎᓂᒃ (PPE) ᐱᓯᒪᔭᕆᐊᖃᖅᑕᔅᓯᓐᓂᒃ ᐃᖅᑲᓇᐃᔭᖅᑎᓄᑦ ᐊᑐᖅᑕᐅᔭᕆᐊᓕᖕᓂ ᐃᖅᑲᓇᐃᔭᖅᑎᓪᓗᒋᑦ.

5. ᑐᓴᐅᒪᐃᓐᓇᕋᓱᒡᓗᑎᑦ, ᐱᕙᒌᔭᖅᓯᒪᓗᑎᑦ ᐊᒻᒪᓗ ᒪᓕᒡᓗᒋᑦ ᐋᓐᓂᐊᖃᖅᑕᐃᓕᒪᔪᓕᕆᔨᒃᑯᑦ ᐅᖃᐅᔾᔨᒋᐊᕈᑎᖏᑦ. ᐃᖅᑲᐅᒪᓂᐊᖅᐳᑎᑦ ᑭᒃᑯᓕᒫᑦ ᒪᓕᒋᐊᖃᕐᒪᑕ ᐋᓐᓂᐊᖃᖅᑕᐃᓕᒪᔪᓕᕆᔨᒃᑯᑦ ᐊᑐᖅᑕᐅᖁᔭᖏᓐᓂᒃ ᐊᒻᒪᓗ ᐃᖅᑲᓇᐃᔭᕖᑦ ᕿᒥᕐᕈᔭᕆᐊᓖᑦ ᐊᐃᑦᑐᕐᓗᒃᑕᐅᐅᓂᕐᒧᑦ ᐊᐅᓚᑦᑎᓂᕐᒧᑦ ᐸᕐᓇᐅᑎᒥᒃ ᐊᒻᒪᓗ ᐅᖃᖅᓵᓇᕈᓐᓇᖅᑐᓄᑦ ᖃᐅᔨᓴᕈᑎᓂᒃ ᐊᑯᓚᐃᓕᕇᒡᓗᑎᒃ ᐸᕐᓇᐅᑎᖏᑦ ᐅᓪᓗᒥᒨᖓᐃᓐᓇᖁᓪᓗᒋᑦ.

ᑐᑭᓯᒋᐊᒃᑲᓐᓂᕈᒪᒍᕕᑦ ᐊᒻᒪᓗ ᖃᕆᑕᐅᔭᕐᓄᐊᖅᑲᐃᔪᒪᒍᕕᑦ ᓄᕙᒡᔪᐊᕐᓇᖅ-19 ᐃᖅᑲᓇᐃᔭᕐᕕᖕᒥᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᑎᑎᖅᑲᑦ ᖃᕆᑕᐅᔭᒃᑯᑦ ᑕᑯᒋᐊᕐᓗᒍ www.wscc.nt.ca/iu ᐅᕝᕙᓘᓐᓃᑦ www.wscc.nu.ca/iu.

ᐃᖅᑲᓇᐃᔭᕐᕕᖕᒥᑦ ᐋᓐᓂᐊᖃᖅᑕᐃᓕᒪᓂᕐᒥᑦ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ  ᖃᐅᔨᓴᖅᑏᑦ ᐃᑲᔪᕈᓐᓇᖅᑐᑦ ᐃᖅᑲᓇᐃᔭᕐᕕᖕᒥᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᖁᐊᖅᓵᕐᓇᕈᓐᓇᖅᑐᓄᑦ ᖃᐅᔨᓴᕈᑎᓂᒃ, ᑎᑎᕋᕐᕕᒋᓗᒋᑦ ᖃᕆᑕᐅᔭᒃᑯᑦ ᐃᕐᖐᓐᓇᕈᓐᓇᐅᑎᒃᑯᑦ 
Covid-19@wscc.nt.ca ᑕᐃᑲᓂ ᓄᓇᑦᑎᐊᒥᑦ ᐊᒻᒪᓗ Covid-19@wscc.nu.ca ᓄᓇᕗᒻᒧᑦ ᐅᕝᕙᓘᓐᓃᑦ ᐅᖄᓚᓗᑎᑦ 1 800-661-0792.

ᐊᐱᖅᑯᑎᒃᓴᖃᕈᕕᑦ ᖃᓄᖅ ᓇᖕᒥᓂᖁᑏᑦ ᐅᕝᕙᓘᓐᓃᑦ ᑎᒥᖁᑏᑦ ᖃᓄᐃᓕᖓᓂᖓᓄᑦ ᑕᒪᒃᑯᓇᓂ ᓄᓇᕘᑉ ᒐᕙᒪᖏᑕ ᐊᒻᒪᓗ ᓄᓇᑦᑎᐊᒥᑦ ᒐᕙᒪᒃᑯᑦ ᐅᒃᑯᐃᒃᑲᓐᓂᕐᓂᒧᑦ ᐸᕐᓇᐅᑏᑦ ᒥᒃᓵᓄᑦ, ᐊᑏ ᐅᖃᖃᑎᒋᒃᑭᑦ ᐊᑖᓂ ᑎᑎᕋᖅᓯᒪᔪᑦ:

-30-

Maggie Collins
ᑐᓴᐅᒪᖃᑦᑕᐅᑎᓕᕆᓂᕐᒧᑦ ᐊᐅᓚᑦᑎᔨ
ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᓄᓇᑦᓯᐊᕐᒥ ᐊᒻᒪᓗ ᓄᓇᕗᒻᒥ
ᐅᖄᓚᐅᑎᖓ: (867) 920-3854