ᔨᐊᓗᓇᐃᕝ, ᓄᓇᑦᓯᐊᖅ (ᒪᐃ 29, 2018) – ᐃᐳᕈᒥ 24, 2018, ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᐊᑦᑕᓇᔾᔭᐃᖅᓯᒪᓂᕐᒧᑦ ᒪᓕᒐᕐᒥ ᑕᓪᓕᒪᓂᑦ ᐸᓯᔭᔅᓴᖑᖅᑎᑦᑎᓚᐅᖅᑐᑦ ᓄᓇᑦᓯᐊᒥ ᐃᖅᑲᖅᑐᐃᕕᖓᓂ ᐊᑖᓂ ᓄᓇᑦᓯᐊᒥ ᐊᑦᑕᓇᔾᔭᐃᖅᓯᒪᓂᕐᒧᑦ ᒪᓕᒐᕐᒥ.
The North West Company (ᓂᐅᕕᕐᕕᒃᑯᑦ ᑎᒥᖁᑎᖓ) ᐊᒻᒪ The North West Company LP (ᓂᐅᕕᕐᕕᒃ ᑎᒥᖓᑦ ᐱᓕᕆᖃᑎᒌᑦᑐᑦ) ᐸᓯᔭᔅᓴᖑᖅᑎᑕᐅᔪᑦ ᐊᒥᓱᒐᓚᓐᓄᑦ ᐊᔾᔨᒌᖏᑦᑐᓄᑦ ᓯᖁᒥᑦᑎᓂᕐᒧᑦ ᐊᑦᑕᓇᔾᔭᐃᖅᓯᒪᓂᕐᒧᑦ ᒪᓕᒐᕐᒥ ᐊᒻᒪ ᐃᖅᑲᓇᐃᔭᕐᕕᖕᒥᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ ᒪᓕᒃᑕᐅᔭᕆᐊᓕᖕᓂ, ᐱᖃᓯᐅᑎᓪᓗᑎ ᒪᓕᖏᓂᕐᒧᑦ:
- ᑐᑭᓯᒋᐊᕈᑎᖃᖅᑎᑦᑎᓂᕐᒧᑦ, ᒪᓕᑦᑕᐅᔭᕆᐊᓕᓐᓂᑦ, ᐃᓕᓐᓂᐊᑎᑦᑎᓂᖅ, ᐊᒻᒪ ᑲᒪᔨᐅᓂᕐᒧᑦ ᐱᑕᖃᕆᐊᖃᖅᑐᓂᑦ ᓴᐳᒻᒥᓗᒋᑦ ᐋᓐᓂᐊᖅᑐᓕᕆᓂᕐᒧᑦ ᐊᒻᒪ ᐊᑦᑕᓇᐃᖅᓯᒪᓂᕐᒧᑦ ᐃᖅᑲᓇᐃᔭᖅᑎᓂᑦ ᖃᐅᔨᒋᐊᖃᑦᑕᕐᓇᑎ ᐃᖅᑲᓇᐃᔭᖅᑏᑦ ᓴᓇᖃᑦᑕᖅᑐᑦ ᐃᖅᑲᓇᐃᔭᕐᕕᒻᒥ ᐃᓕᓐᓂᐊᖅᑎᑕᐅᓯᒪᓗᑎ ᓈᒻᒪᑦᑐᓂᑦ ᐊᑦᑕᓇᖅᑐᓂᑦ ᖃᐅᔨᓴᐃᓂᕐᒥᑦ ᐊᒻᒪ ᐊᑦᑕᓇᐃᖅᓯᒪᓂᕐᒧᑦ ᐃᖅᑲᓇᐃᔭᓂᕐᒧᑦ ᐊᑐᖅᑕᐅᔭᕆᐊᓖᑦ ᐊᑦᑕᓇᖅᑐᓄᑦ ᐱᖃᓯᐅᑎᓪᓗᑎ ᐃᑭᒍᓐᓇᖏᑦᑐᑦ ᐊᒻᒪ ᐅᖁᐃ;
- ᖃᐅᔨᒪᑦᑎᐊᕐᓗᒋᑦ ᑲᒪᔩᑦ ᓈᒻᒪᑦᑐᓂ ᖃᐅᔨᒪᓂᖃᕐᓗᑎ ᐊᑦᑕᓇᐃᖅᓯᒪᓗᓂ ᐊᐅᓚᑦᑎᓂᕐᒥᑦ, ᐊᑐᕐᓂᕐᒥᑦ, ᑐᖅᑯᐃᓂᕐᒥᑦ, ᓴᖅᑭᖅᑎᑕᐅᓂᖏᓐᓄᑦ ᐊᒻᒪ ᐃᒋᑕᐅᓂᖏᓐᓄᑦ ᐊᑦᑕᓇᖅᑐᑦ, ᐊᒻᒪ ᐱᑕᖃᕆᐊᖃᕐᓂᖓᓄᑦ, ᐊᒻᒪ ᐊᑦᑕᓇᖏᑦᑐᒥ ᐊᑐᖅᑕᐅᓂᖓᓄᑦ, ᐃᓄᒻᒧᑦ ᓴᐳᒻᒥᔾᔪᑏᑦ, ᐱᔾᔪᑎᖃᖅᑐᓄᑦ ᐊᑦᑕᓇᖅᑐᓄᑦ;
- ᖃᐅᔨᒪᑦᑎᐊᕐᓗᒋᑦ ᑲᒪᔩᑦ ᐱᔭᕇᖅᓯᓯᒪᓗᑎ ᐊᖏᖅᑕᐅᓯᒪᔪᒥᑦ ᒪᓕᑦᑕᐅᔭᕆᐊᓕᓐᓂᑦ ᖃᐅᔨᒪᓕᕐᓂᕐᒧᑦ ᐱᓕᕆᐊᒥᑦ;
- ᓇᓗᓇᐃᕐᓗᒋᑦ ᐊᒻᒪ ᐱᓯᒪᑦᑎᓗᓂ ᑎᑎᕋᖅᓯᒪᔪᓂᑦ ᒧᓇᒃᑯᑖᓂᑦ ᐃᖅᑲᓇᐃᔭᖅᑎᑦᑎᔪᖅ ᖃᐅᔨᒪᓚᐅᖅᑐᖅ ᐅᕝᕙᓘᓐᓃᑦ ᓂᕆᐅᒋᔭᐅᒍᓐᓇᓚᐅᖅᑐᖅ ᖃᐅᔨᒪᓗᓂ ᐃᖅᑲᓇᐃᔭᕐᕕᒦᑦᑐᓂᑦ;
- ᓴᖅᑭᑎᑦᑎᓗᑎ ᐊᒻᒪ ᐊᑐᓕᖅᑎᑦᑎᓗᑎ ᐃᖅᑲᓇᐃᔭᓂᕐᒧᑦ ᐊᑐᖅᑕᐅᔭᕆᐊᓖᑦ ᐊᒻᒪ ᐱᕙᓪᓕᐊᓂᖏᑦ ᐊᑦᑕᓇᕐᓇᑎ ᐊᐅᓚᑕᐅᓂᖏᓐᓄᑦ, ᐊᑐᖅᑕᐅᓂᖏᓐᓄᑦ, ᑐᖅᑯᖅᑕᐅᓂᖏᓐᓄᑦ ᐊᒻᒪ ᐃᒋᑕᐅᓂᖏᓐᓄᑦ ᐊᑦᑕᓇᖅᑐᑦ ᐅᕝᕙᓘᓐᓃᑦ ᐊᑦᑕᓇᖅᑐᑦ ᐃᓚᓕᐅᕈᑎᓖᑦ ᐅᕝᕙᓘᓐᓃᑦ ᑎᒥᒦᖔᖅᑐᓂᑦ.
ᓯᖁᒥᑦᑕᐅᓯᒪᓂᕋᖅᑕᐅᔪᑦ ᐱᒋᐊᕐᓂᖃᖅᓯᒪᔪᑦ ᑐᑭᓯᒋᐊᕈᑏᑦ ᓄᐊᑕᐅᓂᖏᓐᓄᑦ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᐊᑦᑕᓇᖅᑕᐃᓕᒪᔪᓕᕆᔨᖓᓄᑦ ᖃᐅᔨᓴᕐᓂᖃᖅᑎᓪᓗᒍ ᐊᒻᒪ ᑭᖑᓂᐊᒍᑦ ᖃᐅᔨᓴᖅᑕᐅᔪᖅ ᓂᐅᕕᕐᕕᒃ ᕗᐊᑦ ᕆᐊᓴᓘᓴᓐᒥ.
ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᐃᖅᑲᐃᑎᑕᐃᓐᓇᖏᑦ ᐃᖅᑲᓇᐃᔭᖅᑎᑦᑎᔪᓂᑦ ᒪᓕᒐᖅᑎᒍ ᐃᖅᑲᓇᐃᔮᕆᒋᐊᖃᖅᑕᖓ ᑲᒪᒋᔭᕆᐊᖃᖅᑕᖏᑦ ᐃᖅᑲᓇᐃᔭᖅᑎᓕᒫᑦ ᐊᒻᒪ ᐃᖅᑲᓇᐃᔭᕐᕕᐅᔪᑦ, ᐊᒻᒪ ᐱᓯᒪᑦᑎᓗᓂ ᐃᖅᑲᓇᐃᔭᕐᕕᖕᒥᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ ᐱᓕᕆᐊᒥᑦ ᐅᓪᓗᒥᒨᖓᔪᒥᑦ ᐊᒻᒪ ᐊᑦᑐᐊᓂᓖᑦ ᐊᑦᑕᓇᕈᓇᖅᑐᓄᑦ ᐃᖅᑲᓇᐃᔭᕐᕕᖏᓐᓂᑦ, ᐱᖃᓯᐅᑎᓪᓗᑎ ᐊᑦᑕᓇᖅᑐᐃᑦ.
ᓯᕗᓪᓕᖅᐹᒥ ᐃᖅᑲᖅᑐᐃᕕᒻᒦᕕᒋᓂᐊᖅᑕᖓ ᒪᐃ 31, 2018, ᕗᐊᑦ ᕆᐊᓴᓘᓴᓐ, ᓄᓇᑦᓯᐊᖅ.
-30-
ᒫᒋ ᑳᓕᓐᔅ
ᐊᐅᓚᑦᑎᔨ, ᑐᓴᐅᒪᖃᑎᒋᒍᑎᓂᑦ
ᐅᖄᓚᐅᑦ: (867) 920-3854
ᐊᑭᖃᙱᑦᑐᖅ: (800) 661-0792
ᖃᐅᔨᒪᒋᑦ:
- ᑕᒪᓐᓇ ᐃᖅᑲᖅᑐᐃᕕᒻᒦᓕᖅᑐᖅ, ᑐᑭᓯᒋᐊᕈᑎᖃᖅᑎᑦᑎᕕᔅᓴᐅᑎᐊᖏᑦᑐᖅ ᑕᐃᒪᐃᓐᓂᖓᓄᑦ.
- ᐊᑦᑕᓇᐃᖅᓯᒪᓂᕐᒧᑦ ᒪᓕᒐᖅ, ᐃᓚᖓ 11, ᓇᓗᓇᐃᔭᐃᔪᖅ ᐱᑕᖃᕆᐊᖃᖅᑎᑕᐅᔪᓂᑦ ᑲᓐᖑᓇᖅᑎᑕᐅᓂᖓᓄᑦ ᐊᑦᑐᐊᓂᖃᖅᑐᑦ ᖃᓄᖅ ᐃᓄᒻᒧᑦ ᑐᑭᓯᑎᒋᐊᕈᑎᖏᓐᓂᑦ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᓴᖅᑭᖅᑎᒍᓐᓇᖅᑕᖏᓐᓂᑦ. ᐱᔭᔅᓴᐅᓂᖏᓐᓄᑦ ᑐᑭᓯᒋᐊᕈᑏᑦ ᐊᒻᒪ ᓴᐳᒻᒥᑦᑎᓂᕐᒧᑦ ᑲᓐᖑᓇᖅᑐᓂ ᐱᖁᔭᕐᒥᑦ ᐅᖃᖅᓯᒪᒻᒥᔪᑦ ᖃᓄᐃᑦᑐᓂ ᐃᓄᒻᒧᑦ ᑐᑭᓯᒋᐊᕈᑎᖏᓐᓂᑦ ᒐᕙᒪᒃᑯᑦ ᑎᒥᖓᓄᑦᑦ ᓴᖅᑭᑎᑦᑎᒍᓐᓇᖅᑎᑕᐅᔪᑦ. ᑖᒃᑯᓕᖓ ᒪᓕᒐᕐᓂᑦ, ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᓴᖅᑭᑎᑦᑎᔪᓐᓇᖏᑦᑐᑦ ᐃᓄᒻᒥ ᑐᑭᓯᒋᐊᕈᑎᖏᓐᓂᑦ ᐅᕝᕙᓘᓐᓃᑦ ᑐᑭᓯᒋᐊᕈᑎᓂᑦ ᓇᓗᓇᐃᖅᓯᒍᓐᓇᖅᑐᓂᑦ ᑭᓇᐅᓂᖓᓂᑦ ᐃᓅᔪᖅ.