ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᒃᑯᑦ ᓴᖅᑭᑦᑎᕗᑦ ᓄᑖᒥᒃ ᐱᓕᕆᐊᒃᓴᒥᒃ
ᔭᓗᓇᐃ, ᓄᓇᑦᓯᐊᖅ (ᓯᑎᐱᕆ 16, 2016) – ᐅᓪᓗᒥ, ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᒃᑯᑦ (WSCC) ᓴᖅᑭᑦᑎᕗᑦ ᐊᑑᑎᖃᕐᓂᕐᒥᒃ, ᐱᓕᕆᔾᔪᓯᖅᑖᓵᖅ ᑐᕌᒐᖃᖅᑎᑕᐅᓪᓗᓂ ᓇᓗᓇᐃᕈᑕᐅᔪᓐᓇᕐᓗᓂ ᐃᖅᑲᓇᐃᔭᕐᕕᖕᒥ ᐊᑦᑕᕐᓇᙱᑦᑐᒦᓐᓂᖅ ᐱᒻᒪᕆᐅᓂᖓᓂᒃ.
ᐱᓕᕆᐊᖑᓂᐊᖅᑐᖅ ᓴᖅᑭᑕᐅᓚᐅᙱᓐᓂᖓᓂᒃ, WSCC-ᒃᑯᑦ ᐱᒋᐊᖅᑎᑦᑎᓚᐅᖅᐳᑦ ᐅᖃᐅᓯᖃᖅᖢᑎᒃ ᐅᓄᙱᑦᑑᒐᓗᐊᓂᒃ ᓇᓗᓇᖅᑐᓂᒃ ᔭᓗᓇᐃᒥ ᐃᖃᓗᖕᓂᓗ, ᐃᓄᐃᑦ ᐊᐱᕆᓪᓗᒋᑦ ᐊᑕᐅᓯᕐᒥᒃ ᐊᐱᖅᑯᑎᒥᒃ: “ᖃᓄᖅ ᐃᓕᖕᓄᑦ ᐊᑑᑎᖃᖅᑎᒋᕙ?” ᐃᒡᓗᐊᓗᐃᑦ ᓴᓂᕋᖏᑦ 50/50 ᓄᓇᓯᐅᑎᓄᑦ ᓄᖅᑲᖅᑕᕐᕕᒃ ᔭᓗᓇᐃᒥ ᐊᒻᒪ ᖃᒧᑎᒃ ᐃᒡᓗᐊᓗᖕᒥ ᐃᖃᓗᖕᓂ ᑕᑯᒃᓴᐅᑎᑕᐅᓚᐅᖅᑐᑦ ᐊᔾᔨᒌᙱᑦᑐᑦ ᐊᑭᓐᓇᒥᐅᑕᑦ ᐊᔾᔨᙳᐊᑦ, ᐃᓄᐃᑦ ᐱᓱᒃᑐᑦ ᓯᓚᑖᒍᑦ ᓄᖅᑲᕈᓐᓇᖁᓪᓗᒋᑦ ᐃᓱᒪᒃᓴᖅᓯᐅᕈᓐᓇᖁᓪᓗᒋᓪᓗ ᑭᓱᓂᒃ ᐱᒻᒪᕆᐅᒍᓱᖕᒪᖔᑕ ᐃᓅᓯᖏᓐᓂᒃ. ᐊᑐᓂ ᐊᑭᓐᓇᒥᐅᑕᑦ ᓇᓗᓇᐃᖅᓯᓯᒪᓚᐅᖅᐳᑦ ᐅᕗᖓ ᐃᑭᐊᖅᑭᕕᖕᒧᐊᕈᓐᓇᕐᓂᖏᓐᓂᒃ www.worth-it.ca.
ᐊᒻᒪᓗ, ᖃᔅᓯᑲᓪᓚᖕᓂᒃ ᑎᑎᕋᐅᔭᖅᓯᒪᔪᖃᖅᖢᓂ ᐊᖅᑯᑎᒋᔭᐅᓪᓗᐊᑕᓲᒃᑯᑦ ᔭᓗᓇᐃᒥ ᐃᖃᓗᖕᓂᓗ, ᐃᓄᖕᓂᒃ ᐃᒡᓗᐊᓗᐃᑦ ᐊᑭᓐᓇᙱᓐᓄᑦ ᑕᑯᒋᐊᖁᔨᔪᓂᒃ. ᐅᓪᓗᒥ ᓴᖅᑭᑕᐅᓂᐊᖅᑐᖅ ᑭᓱᑯᑦᑎᓕᒫᖏᑦ ᓇᓗᓇᙱᖦᖢᑎᒃ ᐲᔭᕈᓐᓇᖅᑐᒃᑯᑦ ᑎᑎᕋᐅᑎᒃᑯᑦ ᑎᑎᕋᐅᔭᖅᓯᒪᓗᑎᒃ 50/50 ᓄᓇᓯᐅᑎᓄᑦ ᓄᖅᑲᖅᑕᕐᕕᖕᒥ ᔭᓗᓇᐃᒥ ᑕᑯᒃᓴᐅᑎᑦᑎᓗᑎᒃ ᐃᖅᑲᓇᐃᔭᕐᕕᖕᒥ ᐱᕐᕈᓗᐊᕿᔾᔪᑕᐅᓐᓇᖅᑐᑦ ᓄᖅᑲᖅᑎᒐᒃᓴᐅᓂᖏᓐᓂᒃ, ᐊᒻᒪ ᐃᓄᖕᓄᑦ ᐅᓪᓗᕈᒻᒥᑕᕐᓇᒥ ᐱᓕᕆᐊᒃᓴᒥᒃ. ᐅᓪᓗᕈᒻᒥᑕᕐᓇᒥᒃ ᐱᓕᕆᐊᒃᓴᖅ ᐱᓕᕆᐊᖑᓛᖅᐳᖅ ᐃᖃᓗᖕᓂ ᖃᒧᑎᒃ ᐃᒡᓗᐊᓗᖕᒥ, ᐃᓄᐃᑦ ᖃᐅᔨᔪᓐᓇᕐᓂᖅᓴᐅᓂᐊᕐᒪᑕ ᐱᓕᕆᐊᖑᔪᒥᒃ.
“ᖃᑯᒍᙳᕌᖓᑦ ᐃᖅᑲᓇᐃᔮᑦᑎᓐᓂ, ᐃᖅᑲᓇᐃᔭᕐᕕᖕᒥ ᐊᑦᑕᕐᓇᖅᑐᒃᑰᖅᑕᐃᓕᒪᓂᖅ ᐊᑐᕆᐊᖃᕐᓂᑦᑎᓐᓂᒃ ᖃᐅᔨᒪᔪᐃᓐᓇᐅᕗᒍᑦ, ᐅᕙᑦᑎᓐᓂ ᐊᑦᑕᕐᓇᖅᑐᒦᓕᖅᑎᓪᓗᑕ ᐋᓐᓂᕈᑎᒋᑐᐃᓐᓇᕆᐊᖃᖅᑕᑦᑎᓐᓄᑦ, ᐋᓐᓂᐊᓕᕈᑎᒋᑐᐃᓐᓇᕆᐊᖃᖅᑕᑦᑎᓐᓄᑦ, ᐅᕝᕙᓘᓐᓃᑦ ᐱᐅᙱᓐᓂᖅᓵᓗᖕᒧᑦ ᑎᑭᐅᑎᒋᑐᐃᓐᓇᕆᐊᖃᖅᑕᑦᑎᓐᓄᑦ. WSCC-ᒃᑯᑦ ᐃᓄᖕᓂᒃ ᓄᖅᑲᖁᔨᕗᑦ ᐃᓱᒪᒃᓴᖅᓯᐅᖁᓪᓗᒋᓪᓗ ᐃᖅᑲᓇᐃᔭᕐᕕᖕᒥ ᐊᑦᑕᕐᓇᖅᑐᒃᑰᕆᐊᖃᙱᓐᓂᖅ ᐱᒻᒪᕆᐅᒋᒍᓱᒃᑎᒋᖕᒪᖔᑕ, ᖃᓄᐃᒻᒪᓪᓗ ᐅᓪᓗᓕᒫᖅ ᐃᖅᑲᓇᐃᔮᓪᓚᓚᐅᕐᓗᓂ ᓴᓇᓐᓇᐅᔪᓐᓃᕌᖓᑦ ᐊᖏᕐᕋᕆᐊᖃᕐᓂᖅ, ᐱᓇᓱᐊᕈᓯᓕᒫᒥᒃ, ᐅᕝᕙᓘᓐᓃᑦ ᑕᖅᑭᓕᒫᒥᒃ ᐊᑑᑎᖃᖅᑎᒋᖕᒪᖔᑦ,” ᐅᖃᓚᐅᖅᐳᖅ ᑏᕝ ᒍᕋᓐᑎ, WSCC−ᑯᓐᓄᑦ ᐊᖓᔪᖅᑳᖅ ᐊᒻᒪ ᐊᐅᓚᑦᑎᔨᒻᒪᕆᒃ. “ᐃᖅᑲᓇᐃᔭᕐᕕᖕᒥ ᐊᑦᑕᕐᓇᖅᑕᐃᓕᒪᓂᖅ ᐱᖁᔭᐅᖕᒪᑦ, ᑭᓯᐊᓂ ᐱᓂᖅᓵᓘᓪᓗᓂ. ᐃᓄᖕᓄᑦ ᐊᑭᒋᓕᐅᑎᓇᔭᖅᑐᖅ ᐱᕐᕈᓗᐊᕿᑎᑦᑎᑦᑕᐃᓕᒪᓂᖅ ᐊᒃᑐᐃᓂᖃᕐᔪᐊᕈᓐᓇᕐᒪᑦ ᑭᓱᕈᓘᔭᓗᖕᓂᒃ ᐱᔾᔪᑎᖃᓯᑳᓪᓚᒡᓗᓂ.”
ᐱᐅᓂᖅᓴᒃᑯᑦ ᐃᑭᐊᖅᑭᕕᒃᑰᕈᓐᓇᐅᑎ, www.worth-it.ca, ᐊᑐᐃᓐᓇᕈᖅᑎᑦᑎᓲᖑᕗᑦ ᑐᑭᓯᒋᐊᒐᒃᓴᓂᒃ ᐱᔾᔪᑎᓕᖕᓂᒃ ᐊᑑᑎᖃᕐᓂᖅ ᐱᓕᕆᐊᓂᒃ ᖃᓪᓗᓈᑐᑦ, ᐅᐃᕖᑐᑦ, ᐊᒻᒪ ᐃᓄᒃᑎᑐᑦ ᑎᑎᕋᖅᓯᒪᓪᓗᑎᒃ, ᐃᓗᓕᖃᖅᐸᒡᓗᑎᒃ ᓵᓚᒃᓴᒐᒃᓴᓂᒃ ᓯᑎᐱᕆ 19−ᒥ ᐱᒋᐊᓛᖅᑐᑦ. ᐱᓕᕆᐊᕐᒧᑦ ᐱᓕᕆᐊᒃᓴᒃᑲᓐᓃᑦ ᓴᖅᑭᑕᐅᓛᕆᓪᓗᑎᒃ ᖃᑯᒍᒃᑲᓐᓂᖅ 2016-ᒥ ᐊᒻᒪ 2017−ᒥ, ᓇᓗᓇᐃᖅᓯᓯᒪᓗᑎᒃ WSCC−ᒃᑯᓐᓂ ᐱᔨᑦᑎᕋᐅᑎᖏᓐᓂᒃ ᐊᑐᐃᓐᓇᕈᖅᑎᑉᐸᒃᑕᖏᓐᓂᒃ ᐃᖅᑲᓇᐃᔭᖅᑎᒥᓄᑦ, ᐊᖓᔪᖅᑳᒥᓄᑦ, ᓴᓇᔨᓄᑦ, ᐊᒻᒪ ᐅᑭᐅᖅᑕᖅᑐᒥᐅᑕᓕᒫᓄᑦ.
-30-
ᑭᒻ ᐅᐊᓪᑲ
ᐊᐅᓚᑦᑎᔨ, ᑐᓴᐅᒪᔪᓕᕆᔨᒃᑯᓐᓄᑦ
ᐅᖃᓘᑖ: (867) 920-3846
ᐊᑭᖃᙱᑦᑐᒃᑯᑦ: (800) 661-0792 ᓇᕿᒃᑲᓐᓂᕐᓗᒍ 3846