ᐃᓱᐃᓪᓕᓯᔪᑦ ᐊᒻᒪᓗ ᓄᓱᒃᓯᕆᓂᖅ ᐋᓐᓂᕐᓇᖅᑐᒻᒪᕆᐅᓪᓗᑎᒃ ᐋᓐᓂᕐᓂᐅᔪᑦ, ᑭᓯᐊᓂᓕ ᑕᐃᒪᐃᒐᔪᒃᑐᑦ. ᐃᓛᓐᓂᒃᑯᑦ ᐃᓅᓯᕐᓂ, ᐃᓱᐃᓪᓕᓯᑐᐃᓐᓇᕆᐊᖃᖅᐳᑎᑦ ᓄᑭᒥᒃ ᐅᕝᕙᓘᓐᓃᑦ ᓄᓱᒃᓯᕆᓗᑎᑦ ᓂᕿᒃᑯᑦ ᓄᑭᒃᑯᓪᓘᓐᓃᑦ. ᑕᐃᒪᐃᑎᑕᐅᑐᐃᓐᓇᕆᐊᓕᒃ ᑭᖑᓪᓕᕐᒧᑦ ᐅᓚᕕᓴᖅᑕᐅᓂᕐᒧᑦ ᐊᖅᑲᖅᐸᓪᓕᐊᓗᑎᓪᓗᑎᑦ ᐱᓱᒡᕕᖕᒥ, ᑭᕕᒃᓯᓇᓱᒃᑎᓪᓗᑎᑦ ᐅᖁᒪᐃᑦᑐᒥᒃ ᐃᖃᐃᓕᓴᕐᕕᖕᒥ, ᐅᕝᕙᓘᓐᓃᑦ ᑖᓐᓇᑕᐃᓐᓇᖅ ᐊᐅᓚᓂᕆᖃᑦᑕᕈᖕᓂ ᐊᑯᓂᐅᔪᒥᒃ.
ᐃᓱᐃᓪᓕᓯᔪᑦ ᐊᒻᒪᓗ ᓄᓱᒃᓯᕆᓂᖅ, ᐋᓐᓂᕈᑕᐅᒐᔪᓚᐅᖅᑐᑦ ᐃᖅᑲᓇᐃᔭᖅᑎᓄᑦ ᓄᓇᑦᓯᐊᒥ ᐊᒻᒪᓗ ᓄᓇᕘᒥ 2021-ᖑᑎᓪᓗᒍ. 18%-ᐸᓗᐃᑦ ᐋᓐᓂᕐᓃᑦ ᐅᖃᐅᓯᐅᔪᑦ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᒃᑯᓐᓄᑦ (WSCC) ᐱᖃᓯᐅᔾᔨᓯᒪᓚᐅᖅᑐᑦ ᐃᓱᐃᓪᓕᓯᔪᓂᒃ ᐊᒻᒪᓗ ᓄᓱᒃᓯᕆᔪᓂᒃ. ᐋᓐᓂᕈᑕᐅᑐᐃᓐᓇᕆᐊᓖᑦ ᐃᓱᐃᓪᓕᓯᔪᑦ ᐊᒻᒪᓗ ᓄᓱᒃᓯᕆᓂᓃᑦ ᐊᒥᓱᓪᓚᕆᐅᔪᑦ, ᑐᑭᖃᖅᖢᓂᓗ ᑕᐃᒪᐃᑦᑐᑦ ᐋᓐᓂᕈᑕᐅᔪᑦ ᐊᔾᔨᐅᙱᑐᒥᒃ ᑲᒪᒋᔭᐅᔭᕆᐊᓖᑦ ᐋᖅᑭᒃᓱᖅᑕᐅᑎᓪᓗᒋᑦ ᐃᖅᑲᓇᐃᔭᕐᕕᖕᒥ ᐊᑦᑕᕐᓇᖅᑕᐃᓕᒪᓂᕐᒧᑦ ᐸᕐᓇᐅᑏᑦ.
ᑭᓲᕙ ᐃᓱᐃᓪᓕᓯᔪᑦ ᐊᒻᒪᓗ ᓄᓱᒃᓯᕆᓃᑦ?
ᐃᓱᐃᓪᓕᓯᔪᑦ: ᓄᑭᒃ ᐃᓱᐃᓪᓖᑎᓪᓗᒋ ᓇᒡᒍᐊᑦ ᓴᖑᓗᐊᖅᑐᑦ ᐅᕝᕙᓘᓐᓃᑦ ᓱᖃᒃᑐᑦ.
ᓄᑭᒥᒃ ᓄᓱᒃᓯᒪᓂᖅ: ᐊᑐᓗᐊᖃᑦᑕᕐᓂᖏᑦ, ᐊᔭᖅᓯᒪᓗᐊᕐᓂᖏᑦ, ᐅᕝᕙᓘᓐᓃᑦ ᑕᓯᓯᖅᓂᖅ ᓂᕿ ᓄᑭᒥᒡᓘᓐᓂᑦ ᓄᓱᒃᓯᕆᑎᑦᑎᔪᓐᓇᖅᑐᖅ.
ᐊᔾᔨᒌᙱᒃᑲᓗᐊᖅᑎᓪᓗᒋᑦ, ᑕᒪᕐᒦᒃ ᐋᓐᓂᕐᓃᑦ ᑕᐃᒪᐃᑎᑕᐅᔪᓐᓇᖅᑐᑦ ᑖᒃᑯᖓᔅᓴᐃᓐᓇᖅ ᐱᓕᕆᓂᕐᓄᑦ. ᑐᓄ ᑐᓄᓱᒡᓘᓐᓃᒃ ᑭᐊᑎᓘᓐᓃᑦ ᑎᒥᒥ ᐊᒃᑐᖅᑕᐅᓂᖅᐹᖑᓲᑦ ᐃᓱᐃᓪᓕᓯᔪᕐᓄᑦ ᐊᒻᒪᓗ ᓄᓱᒃᓯᕆᓂᕐᒧᑦ. 40%-ᐸᓗᐃᑦ ᐃᖅᑲᓇᐃᔭᕐᕕᖕᒥ ᐋᓐᓂᕐᓃᑦ 2021-ᒥ ᐱᖃᓯᐅᔾᔨᓯᒪᓚᐅᖅᑐᑦ ᑕᒪᒃᑯᓂᖓ ᐃᓚᒋᔭᐅᔪᓂᒃ ᑎᒥᒧᑦ. ᑕᕝᕙᓂᔅᓴᐃᓐᓇᖅ ᐊᕐᕌᒍᒥ, 27% ᐊᒃᑐᐊᔪᑦ ᐋᓐᓂᕐᓂᕐᓄᑦ ᓂᐅᒧᑦ ᐊᓯᖏᓐᓄᓪᓘᓐᓃᑦ ᑕᐅᓇᓃᓐᓂᖅᓴᐅᔪᓂᒃ ᓲᕐᓗ ᓰᖅᑯᖅ ᓯᖏᕐᓂᕐᓂᓘᓐᓃᑦ ᓇᒡᒍᐊᓂᒃ.
ᖃᐅᔨᒪᓇᕈᑎᖏᑦ ᑕᒪᕐᒦᖕᓄᑦ ᐃᓱᐃᓪᓕᓯᔪᑦ ᐊᒻᒪᓗ ᓄᓱᒃᓯᕆᓂᖅ ᐊᔾᔨᒌᐸᓘᔪᑦ. ᐱᖃᓯᐅᔾᔨᓯᒪᕙᒃᑐᑦ ᐆᖅᑯᔨᓂᕐᒥᒃ, ᐳᓪᓕᕐᓗᓂ, ᐋᓐᓂᑳᓪᓚᒡᓗᓂ, ᐊᔪᕐᓇᖅᓯᓗᓂᓘᓐᓃᑦ ᐊᐅᓚᔾᔭᒍᓐᓇᐃᓪᓕᓗᓂᓘᓐᓃᑦ, ᐃᒃᐱᖕᓂᐊᔪᓐᓃᕐᓗᓂ ᑕᖃᓗᐊᔮᕐᓗᓂᓘᓐᓃᑦ. ᐊᑐᖅᓯᒪᒍᕕᑦ ᑕᒪᒃᑯᓂ ᖃᐅᔨᒪᓇᕈᑎᓂᒃ, ᑲᒪᒋᑲᐅᑎᒋᒋᐊᕈᒃ ᐃᕐᖐᓐᓇᖅ: ᓱᖁᑎᒃᓴᙱᓐᓂᖅ ᑕᒪᒃᑯᓂᖓ ᖃᐅᔨᒪᓇᕈᑎᓂᒃ ᑎᑭᐅᑎᑎᑦᑎᑐᐃᓐᓇᕆᐊᓕᒃ ᐊᔪᕐᓇᖅᓯᓗᓂ ᖃᓄᐃᓕᖓᓕᕐᓃᑦ ᓴᖅᑮᓇᔭᖅᖢᓂ ᐊᑯᓂᐅᔪᒃᑯᑦ ᐊᖅᑐᖅᑕᐅᓗᑎᑦ.
ᖃᓅᖃᑦᑕᖅᐸ ᐊᒻᒪᓗ ᑭᓇᒃᑯᑦ ᖁᐊᖅᓵᕐᓇᖅᑐᒦᑉᐸᑦ?
ᐊᒥᓱᑦ ᐊᔾᔨᒌᙱᑦᑐᑦ ᐱᓕᕆᓃᑦ ᑎᑭᐅᑎᔪᓐᓇᖅᑐᑦ ᑕᒪᒃᑯᓄᖓ ᐋᓐᓂᕐᓂᕐᓄᑦ. ᐱᓕᕆᓗᐊᕐᓂᖅ (28%), ᑎᒥ ᖃᓄᐃᓕᑎᓪᓗᒍ (14%), ᓈᓐᓃᑦ ᓇᓕᒧᒌᒥ ᓇᑎᕐᒥ (11%) ᐱᔾᔪᑕᐅᒐᔪᒃᑐᑦ ᐃᓱᐃᓪᓕᓯᔪᓄᑦ ᐊᒻᒪᓗ ᓄᓱᒃᓯᕆᔪᓄᑦ. ᐅᖓᑖᓂ 61%-ᖑᔪᑦ ᐱᓕᕆᓗᐊᕐᓃᑦ ᖃᓄᐃᔾᔪᑕᐅᔪᑦ ᐃᓱᐃᓪᓕᓯᖃᑦᑕᖅᑐᑦ ᓄᓱᒃᓯᕆᓗᑎᒡᓘᓐᓃᑦ ᐋᓐᓂᕐᓗᑎᒃ.
ᐱᔾᔪᑕᐅᓪᓗᑎᒃ ᑕᒪᒃᑯᐊ ᖃᓄᐃᓕᖓᓂᖏᑦ ᐋᓐᓂᕐᓃᑦ, ᐃᖅᑲᓇᐃᔭᖅᑏᑦ ᐱᓕᕇᓐᓇᖃᑦᑕᖅᑐᑦ ᐱᓕᕆᒐᔪᒃᑕᒥᖕᓂᒃ ᐃᖅᑲᓇᐃᔮᓂᒃ ᐊᒃᑐᖅᑕᐅᓴᕋᐃᑦᑐᑦ ᐃᓱᐃᓪᓕᓯᔪᑦ ᐊᒻᒪᓗ ᓄᓱᒃᓯᕆᓂᕐᒥᒃ. ᐆᒃᑑᑕᐅᔪᓐᓇᖅᑐᑦ ᐃᖅᑲᓇᐃᔮᑦ ᐊᒃᑐᖅᑕᐅᓴᕋᐃᓐᓂᖅᓴᓄᑦ ᐃᓚᐅᑎᑦᑎᔪᑦ ᐃᓗᐊᖅᓴᐃᔨᓂᒃ, ᐃᒡᓗᓕᐅᖅᑎᓂᒃ, ᐊᒻᒪ ᐅᖁᒪᐃᑦᑐᓂᒃ ᓄᓇᓯᐅᑎᓂᒃ ᐊᖁᑎᓂᒃ.
ᑕᐃᒪᐃᓕᒐᑦᑕ, ᐃᖢᕐᕆᓕᓗᐊᖅᑕᐃᓕᒋᑦ ᐃᖅᑲᓇᐃᔭᖃᑦᑕᕈᕕᑦ ᖃᕆᓴᐅᔭᐅᑉ ᓵᖓᓂ! ᖁᐊᖅᓵᕐᓇᖅᑐᒦᑦᑐᑎᑦᑕᐅᖅ ᑕᒪᒃᑯᓄᖓ ᐋᓐᓂᕐᓂᕐᓄᑦ. ᐅᔾᔨᕈᓱᙱᒃᑯᕕᒃ ᐃᖅᑲᓇᐃᔭᕐᕕᖕᓄᑦ ᖃᓄᐃᓕᖓᓂᐅᔭᕆᐊᖃᖅᑐᓂᒃ ᐃᖅᑲᓇᐃᔭᕐᕕᒋᕙᒃᑕᕐᓂ, ᑎᒥᕕᑦ ᖃᓄᐃᓕᖓᓂᖓ ᐊᒃᑐᖅᑕᐅᓂᐊᖅᑐᖅ. ᐊᑯᓂᐅᔪᒃᑯᑦ, ᑐᕌᕈᓐᓇᖅᑐᑦ ᐃᓱᐃᓪᓕᓯᔪᓄᑦ ᓄᑭᒧᑦ ᐅᕝᕙᓘᓐᓃᑦ ᓄᓱᒃᓯᕆᓂᖅ ᓂᕿᖕᓂᒃ ᐊᒻᒪᓗ ᓄᑭᖕᓂᒃ, ᐊᒻᒪᓗ ᐊᑯᓂᐅᔪᒃᑯᑦ ᐃᖢᐊᖅᓴᖅᑕᐅᑐᐃᓐᓇᕆᐊᖃᕋᔭᖅᑐᑎᑦ ᐱᓕᕆᑎᑕᐅᓗᑎᑦ.
ᐆᒃᑑᑏᑦ ᐱᓕᕆᓂᐅᕙᒃᑐᑦ ᑕᒪᒃᑯᐊ ᐃᓱᐃᓪᓕᓯᔪᑦ ᐊᒻᒪᓗ ᓄᓱᒃᓯᕆᓃᑦ ᐃᒪᐃᑦᑐᓐᓇᖅᑐᑦ:
- ᐃᖢᐊᖅᓴᐃᔨᒧᑦ ᐃᑲᔪᖅᑎ ᑐᓄᒥᒍᑦ ᐋᓐᓂᕈᓐᓇᖅᑐᖅ ᑭᕕᒃᓯᓚᐳᖅᑎᓪᓗᒍ ᐃᖢᐊᖅᓴᕋᓱᒃᑕᒥᓂᒃ.
- ᐃᒡᓗᓕᐅᖅᑎ ᐋᓐᓂᕈᓐᓇᖅᑐᑦ ᑲᓱᐊᕈᑎᒥᒃ ᐊᑐᕐᓗᓂ ᐊᑯᓂᐅᔪᒃᑯᑦ ᓈᒻᒪᓈᖅᓯᒪᔪᒥᒃ ᓄᖅᑲᖓᓚᐅᑲᖃᑦᑕᖅᑎᓐᓇᒍ.
- ᐃᓕᓴᐃᔨ ᖁᐊᔭᕿᑦᑐᓐᓇᖅᑐᑦ ᓯᑯᐊᖅᓯᒪᔪᒥ ᓯᕗᓂᐊᓂ ᐃᓕᓐᓂᐊᕐᕕᐅᑉ ᐊᒻᒪᓗ ᐋᓐᓂᕐᓗᓂ ᓯᖏᕐᓂᖓ.
- ᑎᑎᕋᕐᕕᖕᒥᐅᑕᖅ ᐱᕙᓪᓕᐊᓕᕈᓐᓴᖅᑐᖅ ᑭᐊᑎᖓ ᐋᓐᓂᐊᖃᑦᑕᓕᕐᓗᓂ ᐃᒃᓯᕚᖃᑦᑕᕐᓂᖓᓄᑦ ᐃᖅᑲᓇᐃᔭᕐᕕᖓᓂ ᐋᖅᑭᑦᑎᐊᖅᓯᒪᙱᑦᑑᓗᓂ ᐃᖅᑲᓇᐃᔭᕐᕕᖕᒥ ᐋᖅᑭᒃᓯᒪᔭᕆᐊᖃᖅᑐᑦ.
ᑕᐃᒪᐃᑎᑦᑎᑦᑕᐃᓕᒪᓂᖅ
ᐃᓱᐃᓪᓕᓯᔪᑦ ᐊᒻᒪᓗ ᓄᓱᒃᓯᕆᓂᖅ ᑕᖃᕈᓐᓇᖅᑐᑦ ᐊᒥᓲᔪᓂᒃ ᐱᓕᕆᓂᕐᓂ. ᐊᒃᓱᓪᓕ, ᐅᓄᙱᑦᑐᓂᒃ ᐊᔪᕐᓇᙱᑦᑐᓂᒃ ᐊᑐᖅᑕᐅᔪᓐᓇᖅᑐᓂᒃ ᐱᑕᖃᖅᐳᖅ ᑭᒃᑯᑐᐃᓐᓇᑦᑎᐊᕐᓄᑦ ᐊᑐᕈᓐᓇᖅᑐᓂᒃ ᖁᐊᖅᓵᕐᓇᙱᓐᓂᖅᓴᐅᖁᓪᓗᒍ ᐋᓐᓂᕐᓂᕐᒧᑦ.
- ᐃᖃᐅᓕᓴᒐᔪᖕᓂᖅ ᓴᖏᓂᖃᖅᑎᑦᑎᔪᓐᓇᖅᑐᑦ ᓄᑭᓪᓗᐊᑕᕐᓂᒃ.
- ᑕᓯᓴᖃᑦᑕᕐᓗᑎᑦ ᑎᒦᑦ ᐊᐅᓚᓂᐊᖅᑎᓪᓗᒍ ᐱᓕᕆᑎᓪᓗᑎᑦ.
- ᐅᔾᔨᕈᓱᒐᓱᒃᐸᒡᓗᑎᑦ ᑲᑕᒐᖃᑦᑕᖅᑐᓂᒃ ᐅᓗᕆᐊᓇᖅᑐᓂᒃ ᐃᖅᑲᓇᐃᔭᕐᕕᖕᓂ.
- ᑲᒫᓗᒃᑎᑦ ᓈᒻᒪᑦᑎᐊᕐᓗᑎᒃ ᐊᒻᒪᓗ ᐋᖅᑭᑦᑎᐊᖅᓯᒪᓗᑎᒃ.
ᐃᖅᑲᓇᐃᔭᕐᕖᑦ ᐱᓗᐊᖅᑎᑦᑎᔾᔭᐃᖅᓯᒪᔭᕆᐊᓖᑦ ᖁᐊᖅᓵᕐᓇᖅᑐᓂᒃ ᐃᓱᐃᓪᓕᓯᔪᑦ ᐊᒻᒪᓗ ᓄᓱᒃᓯᕆᓂᕐᒧᑦ ᐃᖅᑲᓇᐃᔭᕐᕕᖕᒥ ᐃᒪᐃᓕᐅᕐᓗᑎᒃ:
- ᓈᒻᒪᒃᑐᓂᒃ ᐃᒻᒥᒧᑦ ᓴᐳᑎᓯᒪᔾᔪᑎᓂᒃ ᐊᓐᓄᖄᓂᒃ ᐅᖁᒪᐃᑦᑐᓂᒃ ᐅᕝᕙᓘᓐᓃᑦ ᐃᖢᐊᙱᑦᑐᓂᒃ ᐊᒡᔭᖅᑐᐃᖃᑦᑕᕐᓂᐊᖅᑎᓪᓗᖏᑦ ᐃᖅᑲᓇᐃᔭᖅᑏᑦ.
- ᐃᖅᑲᓇᐃᔭᕐᕖᑦ ᐋᖅᑭᒃᓱᖅᓯᒪᓂᖏᑦ ᐋᖅᑭᒃᑕᐅᓯᒪᓗᑎᒃ ᐊᑐᓂ ᐃᖅᑲᓇᐃᔭᖅᑎᒧᑦ, ᐊᒻᒪᓗ ᐱᓕᕆᐊᒃᓴᖏᓐᓄᑦ ᐱᐊᓂᒃᑕᐅᔭᕆᐊᓕᖕᓄᑦ.
- ᓇᓗᓇᐃᔭᕐᓗᒋᑦ ᐃᖅᑲᓇᐃᔭᕐᕕᖕᒥ ᐅᓗᕆᐊᓇᕈᓐᓴᖅᑐᑦ, ᐊᒻᒪᓗ ᐃᖅᑲᓇᐃᔭᖅᑏᑦ ᐃᓕᓐᓂᐊᖅᑎᓪᓗᒋᑦ ᐱᓗᐊᔾᔭᐃᖅᓯᒪᖁᓪᓗᒋᑦ ᑕᒪᒃᑯᐊ ᐊᑦᑕᕐᓇᖅᑕᐃᓕᒪᓂᕐᒧᑦ ᖁᐊᖅᓵᕐᓇᕈᓐᓇᖅᑐᑦ.
- ᐱᓕᕆᔾᔪᑎᓂᒃ ᑐᓂᓯᓯᒪᕙᒡᓗᑎᒃ ᑕᖃᐃᖅᓯᕈᓐᓇᖁᓪᓗᒋᑦ ᐃᖅᑲᓇᐃᔭᖅᑏᑦ ᓇᖏᓲᔭᕆᐊᖃᖃᑦᑕᖅᑐᑦ ᐊᑯᓂᐅᔪᒥᒃ.
ᐃᑲᔪᕈᑎᒃᓴᐃᑦ
ᑐᓄ ᖁᐊᖅᓵᕐᓇᖅᑐᒦᓪᓚᕆᖕᓂᖓᓄᑦ ᑕᒪᒃᑯᓄᖓ ᐃᓱᐃᓪᓕᓯᔪᑦ ᐊᒻᒪᓗ ᓄᓱᒃᓯᕆᓂᕐᓄᑦ, ᐃᖅᑲᓇᐃᔭᖅᑏᑦ ᖃᐅᔨᒪᔭᕆᐊᓖᑦ ᑭᕕᒃᓯᑦᑎᐊᓂᕐᒥᒃ ᐅᖁᒪᐃᑦᑐᓂᒃ. ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᒃᑯᓐᓄᑦ (WSCC) ᓴᖅᑮᓯᒪᔪᖅ ᒪᕐᕉᖕᓂᒃ ᑭᖑᓂᖔᑦᑎᓐᓂᒃ ᐊᑦᑕᕐᓇᖅᑕᐃᓕᒪᓂᕐᒧᑦ ᑐᕌᖓᓪᓚᑦᑖᖅᑐᓂᒃ ᐱᖃᓯᐅᔾᔨᔪᓂᒃ ᐃᑲᔫᑎᒃᓴᓂᒃ ᐋᖅᑭᒃᓱᖅᓯᒪᔪᑦ ᑐᓄᐃᑦ ᖃᓄᐃᙱᑦᑎᐊᖏᓐᓇᖁᓪᓗᒍ:
- ᑭᕕᒃᓯᓂᖅ ᐊᑦᑕᕐᓇᙱᑦᑐᒃᑯᑦ ᐃᖅᑲᓇᐃᔭᕐᕕᖕᒥ ᑕᑯᑎᑦᑎᓂᐊᖅᑐᖅ ᖃᓄᖅ ᐊᑐᖅᑕᐅᓕᒪᔪᓐᓇᕐᒪᖔᖅᐱᒋ ᑭᕕᒃᓯᔾᔪᑎᐅᒐᔪᒃᑐᓂ ᐋᓐᓂᕐᓃᑦ.
- ᑐᓄᒃᑯᑦ ᐋᓐᓂᕐᓃᑦ ᐊᑐᐃᓐᓇᐅᑎᑦᑎᓂᐊᖅᑐᖑᑦ ᐃᓕᓐᓄᑦ ᐱᐅᓂᖅᐹᓂᑦ ᖃᓄᐃᓕᐅᕈᑕᐅᔪᒪᔪᓂᑦ ᐋᓐᓂᖅᑎᑦᑎᑕᐃᓕᒪᓂᕐᒥᑦ ᑐᓄᖕᓂᒃ ᐃᖅᑲᓇᐃᔭᕐᕕᒻᒥᑦ.
ᐃᖅᑲᓇᐃᔭᕐᕕᖕᒥ ᐋᖅᑭᒃᓯᒪᓃᑦ ᐋᖅᑭᑦᑎᐊᖅᓯᒪᙱᓐᓂᖏᑦ ᐱᔾᔪᑕᐅᒐᔪᒃᑯᑦ ᐃᓱᐃᓪᓕᓯᔪᓄᑦ ᐊᒻᒪᓗ ᓄᓱᒃᓯᕆᓂᕐᓄᑦ. ᑖᓐᓇ ᓴᓇᕐᕈᑎᒃᑯᕕᖕᒥᑦ ᐱᕐᕈᓗᐊᕿᑦᑕᐃᓕᓂᕐᒧᑦ ᐅᖃᖃᑎᒋᓐᓂᖅ – ᐃᖅᑲᓇᐃᔭᕐᕖᑦ ᐋᖅᑭᒃᓱᖅᓯᒪᓂᖓ ᐊᒻᒪ ᓴᐅᓂᕐᒧᑦ ᐃᓕᖅᑯᓯᖅᓱᙱᔾᔪᑎᓖᑦ ᐊᑐᑕᐅᔪᓐᓇᖅᑐᓂᒃ ᑐᓂᓯᔪᓐᓇᖅᑐᑦ ᐊᑐᓕᖅᑎᑕᐅᖁᓪᓗᒋᑦ ᓈᒻᒪᓈᖅᓯᒪᖁᓪᓗᒋᑦ ᐃᖅᑲᓇᐃᔭᕐᕕᖕᒥ ᐋᖅᑭᓯᒪᓂᐅᕙᒃᑐᑦ.
ᑲᓇᑕᒥ ᐱᓕᕆᕝᕕᒃ ᐃᖅᑲᓇᐃᔭᕐᕕᖕᒥᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ (CCOHS) ᐃᑲᔪᕈᑎᒃᓴᐃᑦ
ᐃᖅᑲᓇᐃᔭᕐᕖᑦ ᐋᖅᑭᒃᓱᖅᓯᒪᓂᖓ: ᖃᔅᓯᑲᓪᓚᖕᓂᒃ ᓱᓕᔪᓂᒃ ᑎᑎᕋᖅᓯᒪᔪᓂᒃ ᐃᖅᑲᓇᐃᔭᕐᕕᒋᔭᐅᔪᓂ ᐋᖅᑭᒃᓯᒪᓂᖏᓐᓄᑦ ᐊᑐᖅᑕᐅᓕᕈᓐᓇᖅᑐᑦ.
ᖁᐊᔭᕿᑦᑕᐃᓕᓂᖅ, ᓈᑦᑕᐃᓕᓂᖅ ᐊᒻᒪᓗ ᐹᓪᓚᒃᑕᐃᓕᒪᓂᖅ: ᖁᐊᔭᕿᓐᓃᑦ, ᓈᓐᓂᑦ ᐊᒻᒪᓗ ᐃᔪᒃᑲᕐᓃᑦ ᐱᔾᔪᑕᐅᔪᐊᑐᐃᓐᓇᕆᐊᓖᑦ ᐃᓱᐃᓪᓕᓯᔪᒧᑦ ᐊᒻᒪᓗ ᓄᓱᒃᓯᕆᓂᕐᒧᑦ.
ᓴᙱᒃᑎᓴᖃᑦᑕᕐᓂᕐᒧᑦ ᐊᑐᖅᑕᐅᔪᓐᓇᖅᑐᑦ: ᐃᖅᑲᐃᓯᒋᐊᕈᑎ ᐊᑦᑕᕐᓇᙱᒃᑐᒥᒃ ᑭᕕᒃᓯᖃᑦᑕᕐᓂᕐᒧᑦ ᐊᑐᖅᑕᐅᖃᑕᕆᐊᓕᒃ.