ᐃᓕᒃᑲᓐᓂᕈᒪᒍᕕᑦ…
2021-ᖑᑎᓪᓗᒍ, 19.2% ᓈᒻᒪᒋᔭᐅᓚᐅᖅᑐᑦ ᑕᑕᑎᕆᔪᑦ ᐱᔾᔪᑕᐅᓪᓗᑎᒃ ᐊᒡᒐᒃᑯᒃ ᐋᓐᓂᕐᓂᕐᓄᑦ. ᐊᒡᒐᕗᑦ ᐱᒻᒪᕆᐅᔪᑦ ᐱᓕᕆᓂᕆᖃᑦᑕᖅᑕᑦᑎᓐᓄᑦ ᖃᐅᑕᒫᑦ ᐱᓕᕆᐊᒃᓴᓄᑦ ᐊᒻᒪᓗ ᐃᓅᓯᕐᓄᑦ ᐊᒻᒪ, ᖃᐅᔨᔭᐅᓯᒪᔪᖅ, ᓯᕗᓪᓕᖅᐸᐅᒐᔪᒃᑐᑦ ᑎᒥᑦᑎᓐᓂᑦ ᓴᖅᑭᔮᖅᑑᓪᓗᑎᒃ ᐅᓗᕆᐊᓇᖅᑐᓄᑦ ᓲᕐᓗ ᓂᒡᓚᓱᒡᔪᐊᖅᑐᓄᑦ ᐅᖅᑰᕐᔪᐊᖅᑐᓄᓪᓘᓐᓃᑦ, ᐃᐱᒃᑐᑦ, ᑕᑦᑐᕿᓐᓇᖅᑐᑦ, ᖃᐅᒻᒪᖅᑯᑏᑦ, ᐅᕕᓂᖕᒧᑦ ᐆᓐᓇᖅᑐᑦ ᐊᓯᖏᓪᓗ. ᒥᑭᑦᑐᑯᓗᖕᒥᑦ ᑭᓕᕐᓃᑦ ᐊᑲᐅᙱᓕᐅᕈᑕᐅᓕᓲᑦ ᐊᒻᒪᓗ ᐱᕐᔪᐊᒥᒃ ᐱᓇᐃᓗᑕᓕᐅᓕᖅᐸᒃᖢᑎᒃ. ᐊᒡᒐᒃᑯᑦ ᐋᓐᓂᕐᓃᑦ ᒫᓐᓇᓚᐅᑲᒃ ᐅᕝᕙᓘᓐᓃᑦ ᐃᓛᓐᓂᒃᑯᑦ ᐊᒃᑐᐃᓂᖃᓪᓚᕆᓕᖃᑦᑕᖅᑐᑦ ᐃᓅᓯᑦᑎᓐᓂᑦ ᑭᓯᐊᓂ ᖃᐅᑕᒫᑦ ᑲᒪᒋᑦᑎᐊᖏᓐᓇᕈᑦᑎᒍᑦ ᓴᐳᑎᓯᒪᓗᒋᑦ ᐊᒡᒐᕗᑦ, ᐃᓄᒐᙳᐊᕗᑦ ᐊᒻᒪᓗ ᐊᒡᒐᐅᑎᕗᑦ ᐋᓐᓂᖅᓂᖅᑕᖃᖅᑎᑦᑕᐃᓕᒪᓗᒋᑦ. ᐋᓐᓂᕈᑕᐅᒐᔪᒃᑐᑦ ᐊᒡᒐᓄᑦ ᐱᖃᓯᐅᑎᓪᓗᒋᑦ ᐅᑯᐊ:
- ᓂᒡᓚᓱᒃᑎᓪᓗᒍ: ᓂᒡᓚᓱᒃᑐᒥᙶᕐᓗᓂ, ᖁᐊᕐᓃᑦ ᐊᒻᒪᓗ ᕿᕿᓐᓃᑦ ᑐᑭᖃᕈᓐᓇᖅᑐᖅ ᐊᓯᐅᔨᓪᓚᑦᑖᕐᓗᒍ ᐊᐅᓚᔪᓐᓇᕐᓂᖏᑦ ᓇᒡᒍᐊᖏᑦ, ᐊᒻᒪᓗ ᓇᑲᑕᐅᔪᓐᓇᒻᒪᕆᒃᑐᑦ.
- ᐆᓐᓃᑦ ᐊᒻᒪᓗ ᐅᕕᓂᒃᑯᑦ ᐆᓐᓃᑦ ᐊᒡᒐᒃᑯᑦ: ᐃᒪᐃᒃᑐᓂᖔᕋᓗᐊᖅᐸᑦ ᖃᓛᖅᑐᒥᑦ, ᐃᑯᒪᒥᑦ, ᖃᐅᒻᒪᖅᑯᑎᓂᑦ, ᐅᕝᕙᓘᓐᓃᑦ ᐅᕕᓂᖕᒧᑦ ᐆᓐᓇᖅᑐᑦ, ᐆᓐᓃᑦ ᑐᑭᖃᕈᓐᓇᕐᒥᔪᑦ ᒫᓐᓇᓚᐅᑲᑦ ᐅᕝᕙᓘᓐᓃᑦ ᐊᓯᐅᔨᓪᓚᑦᑖᕐᓗᒋᑦ ᐊᐅᓚᔪᓐᓇᕐᓂᖏᑦ.
- ᐃᓕᕐᓃᑦ ᐅᕝᕙᓘᓐᓃᑦ ᑕᑦᑐᕿᓐᓂᕐᒧᑦ ᐋᓐᓂᕐᓃᑦ: ᑖᒃᑯᐊ ᑕᐃᒪᐃᑦᑐᓐᓇᖅᑐᑦ ᐊᑐᕐᓂᕐᒧᑦ ᐊᐅᓚᐅᑎᖃᖅᑐᓂᒃ ᓴᓇᕐᕈᑎᓂᒃ, ᑭᓱᑐᐃᓐᓇᕐᓂᒃ ᐊᑐᖅᑕᐅᖓᔪᒃᑐᓂᒃ ᓲᕐᓗ ᑭᔾᔭᐅᑏᑦ, ᓰᒥᖕᓃᑦ ᐹᒧᑦ, ᐅᕝᕙᓘᓐᓃᑦ ᓂᖅᖥᕿᑎᓪᓗᑎᑦ ᓂᕿᒥᒃ.
- ᓇᐅᓂᒃᑯᑦ ᓯᖁᒥᓐᓃᑦ ᐅᕝᕙᓘᓐᓃᑦ ᓇᐱᓃᑦ: ᑕᒪᒃᑯᐊ ᐋᓐᓂᕐᓃᑦ ᑕᐃᒪᐃᑦᑐᓐᓇᖅᑐᑦ ᐱᔾᔪᑕᐅᓪᓗᑎᒃ ᐃᔪᒃᑲᕐᓃᑦ, ᒥᓗᖅᑕᐅᓃᑦ ᐱᖁᑎᒧᑦ, ᐅᕝᕙᓘᓐᓃᑦ ᐊᐅᓚᐅᑎᓄᑦ ᐱᔭᐅᓂᓗ.
- ᐊᒥᕐᓗᓕᕐᓃᑦ ᐅᕝᕙᓘᓐᓃᑦ ᐅᕕᓂᖕᒧᑦ ᐅᖏᓚᓕᕐᓃᑦ: ᑕᐃᒪᐃᓕᕆᓐᓇᖅᑐᑦ ᑲᒪᒋᔭᖃᕐᓗᓂ ᐅᕕᓂᖕᒧᑦ ᐆᓐᓇᖅᑐᓂᒃ, ᑎᒥᒧᑦ ᐅᖏᓚᖕᓇᖅᑐᓂᒃ, ᐅᕝᕙᓘᓐᓃᑦ ᐊᐃᑦᑐᕐᓗᐃᔪᓐᓇᕐᑐᓂᒃ ᐋᓐᓂᐊᓂᒃ, ᑖᒃᑯᐊ ᐋᓐᓂᕐᓃᑦ ᐅᖏᓚᓕᕐᓇᖅᑐᑦ ᐅᕝᕙᓘᓐᓃᑦ ᐊᔪᓕᕈᑎᖃᓪᓚᑦᑖᕐᓗᑎᒃ.
- ᐃᖅᓇᐃᔭᖅᑐᖅᓯᐅᑎᓄᑦ ᐋᓐᓂᕐᓃᑦ: ᐊᑐᕈᕕᑦ ᓴᓇᕐᕈᑎᓂᒃ ᐊᖏᓗᐊᕐᑐᓂᒃ, ᒥᑭᓗᐊᖅᑐᓂᒃ, ᐅᕝᕙᓘᓐᓃᑦ ᐃᖢᕐᕆᓐᓇᙱᑦᑐᓂᒃ ᐊᒡᒐᖕᓄᑦ ᑕᓕᕐᓄᓪᓘᓐᓃᑦ, ᓴᐅᓂᕐᒥᒃ ᐋᓐᓂᖅᑎᑦᑎᔪᓐᓇᖅᑐᑦ.
- ᑲᐴᑏᑦ ᒥᖅᑯᑎᖏ: ᑕᐃᒪᐃᒐᔪᒃᑐᑦ ᐃᖅᑲᓇᐃᔭᖅᑐᓂᑦ ᐋᓐᓂᐊᕐᕕᖕᒥᑦ, ᑖᒃᑯᐊ ᐋᓐᓂᕐᓃᑦ ᑕᐃᒪᐃᑦᑐᓐᓇᖅᑐᑦ ᓂᕆᐅᓇᙱᑦᑐᒃᑯᑦ. ᐱᐅᔪᓐᓃᕈᓐᓇᕐᓂᖓ ᐊᐃᑦᑐᕐᓗᒃᑕᐅᔪᓐᓇᖅᑐᓂᒃ ᐋᓐᓂᐊᓂᑦ ᑕᐃᒪᐃᒃᑐᑦ ᐋᓐᓂᕐᓃᑦ ᑭᓕᕐᓂᑐᐃᓐᓇᐅᙱᓚᑦ.
ᑕᐃᒪᐃᑦᑐᓗᒃᑖᓄᑦ ᐋᓐᓂᕐᓂᕐᓄᑦ, ᑐᕌᒐᖃᕈᓐᓇᖅᑐᒍᑦ ᑕᐃᒪᐃᑎᑦᑎᑦᑕᐃᓕᓂᕐᓂᒃ ᐋᓐᓂᖅᑎᑦᑎᑦᑕᐃᓕᖁᓪᓗᑕ. ᐅᖃᐅᔾᔨᒋᐊᖏᓐᓇᐅᔭᖅᑐᒍᑦ ᐱᒋᐊᕈᑎᖃᖁᓪᓗᓯ ᐊᑦᑕᕐᓇᖅᑕᐃᓕᒪᓂᕐᒧᑦ ᖃᐅᔨᒋᐊᕐᓂᕐᒥᒃ ᐊᒻᒪᓗᑦᑕᐅᖅ ᑕᐃᔭᐅᖕᒥᔪᖅ ᖁᐊᖅᓵᕐᓇᖅᑐᓂᒃ ᖃᐅᔨᓴᕐᓂᖅ ᐊᒻᒪᓗ ᐅᓗᕆᐊᓇᕈᓐᓇᖅᑐᓂᒃ ᖃᐅᔨᓴᕐᓂᖅ. ᑭᓱᑦ ᖃᐅᑕᒫᖅᓯᐅᑎᖕᓂᑦ ᐱᓕᕆᐊᕐᓂᑦ ᐱᓕᕆᔾᔪᓯᖅ ᖁᐊᖅᓵᓇᑑᔪᓐᓇᖅᐸ ᐃᖅᑲᓇᐃᔭᖅᑎᓄᑦ? ᐃᓱᒪᒋᓪᓗᒋᑦ ᐊᒡᒐᒃᑯᑦ ᐋᓐᓂᕐᓃᑦ, ᐃᓱᒪᒋᖃᓯᐅᑎᔪᓐᓇᖅᑕᑎᑦ ᐅᑯᐊ:
- ᓂᕆᕝᕕᖕᒥᑦ – ᓂᕿᓄᑦ ᓇᑲᑎᕆᔾᔪᑏᑦ, ᐅᐊᔭᖃᖅᑐᑦ ᐱᖁᑏᑦ (ᐃᖑᓚᐅᑎ), ᓴᕖᑦ, ᖄᖏᔭᐅᑏᑦ, ᐊᕕᒃᑐᐃᔾᔪᑏᑦ, ᐅᕕᓂᖕᒧᑦ ᐆᓐᓇᖅᑐᑦ ᓴᓗᒻᒪᖅᓴᐃᓂᕐᒧᑦ, ᐊᓯᖏᓪᓗ.
- ᐃᒡᓗᓕᐅᕐᕕᖕᒥᑦ – ᑭᓪᓘᑏᑦ, ᐃᑰᑕᑦ, ᖃᐃᖅᑲᒃᓴᐅᑏᑦ, ᐋᖓᔮᕈᑕᐅᓇᓱᒃᐸᒃᑐᑦ ᐊᓯᖏᓪᓗ ᐅᕕᓂᖕᒧᑦ ᐆᓐᓇᖅᑐᑦ, ᐊᓯᖏᓪᓗ.
- ᓄᓇᒥ – ᑮᔭᖃᑦᑎᕋᓱᒡᓗᓂ, ᕿᔪᖕᓂᒃ ᑭᓪᓗᖅᑐᐃᓗᓂ, ᐋᖅᑭᒋᐊᖅᓯᓃᑦ ᐃᒡᓗᕋᓛᕐᓄᑦ, ᐊᓯᖏᓪᓗ.
- ᑎᑎᕋᕐᕕᖕᒥᑦ – ᑭᔾᔭᐅᑏᑦ, ᐸᐃᑉᐹᒧᑦ ᑭᔾᔭᖅᑐᐃᔾᔪᑏᑦ, ᑲᑎᑦᑎᔾᔪᑎ, ᐊᓯᖏᓪᓗ.
- ᓂᐅᕕᕐᕕᖕᒥᑦ – ᕿᑐᑦᑐᒐᐅᔭᕐᓄᑦ ᒪᒃᐱᖅᓯᔾᔪᑏᑦ, ᑭᔾᔭᐅᑏᑦ, ᓴᓗᒻᒪᖅᓴᐅᑏᑦ, ᐊᒻᒪᓗ ᐱᑕᖃᑐᐃᓐᓇᕆᐊᓕᒃ ᐊᔾᔨᒌᙱᑦᑐᓂᒃ ᑕᐃᒪᐃᔾᔪᑕᐅᔪᓐᓇᖅᑐᓂᒃ ᒪᓕᒃᖢᒋᑦ ᑭᓱᓂᒃ ᓂᐅᕕᐊᒃᓴᖃᖅᐊᖕᒪᖔᑦ.
- ᐋᓐᓂᐊᕕᒃ – ᑲᐴᑏᑦ ᒥᖅᑯᑎᖏᑦ, ᑭᓕᕐᓃᑦ ᐊᓯᖏᓐᓂᑦ ᐋᓐᓂᐊᖅᑐᓕᕆᔾᔪᑎᓂᑦ ᓲᕐᓗ ᐱᓚᒃᓯᔾᔪᑎ ᑭᔾᔭᐅᑏᓪᓅᓐᓃᑦ.
ᓴᐳᑎᓯᒪᓂᖅ ᐊᒡᒐᒃᑯᑦ ᐋᓐᓂᕐᓂᕐᓂᒃ
ᐱᒻᒪᕆᐅᔪᖅ ᑐᑭᓯᐊᓗᓂ ᐅᓗᕆᐊᓇᕈᓐᓇᖅᑐᓗᒃᑖᑦ ᓇᓃᒻᒪᖔᑕ, ᓲᖃᐃᒻᒪ ᐸᕐᓇᐅᓯᐅᕈᓐᓇᕋᕕᑦ ᐃᖅᑲᓇᐃᔭᕐᕕᒃ ᐊᑦᑕᕐᓇᙱᓐᓂᖅᓴᐅᖁᓪᓗᒍ. ᐱᑕᖃᖅᐋ ᓂᕆᐅᓇᙱᑦᑐᒥ ᐅᓗᕆᐊᓇᕈᓐᓇᖅᑐᒥᒃ, ᓲᕐᓗ ᑭᓱᑐᐃᓐᓇᖅ ᓱᕋᒃᓯᒪᔪᖅ, ᑭᑭᐊᒃ ᓄᐃᓴᔪᖅ ᐊᑭᓐᓇᒥᑦ, ᐅᕝᕙᓘᓐᓃᑦ ᐃᐱᒃᑐᖅ ᓴᓇᕐᕈᑎ ᐃᓕᔭᐅᓯᒪᔪᑦ ᓴᖅᑭᔮᖅᑐᒥᑦ ᑕᐃᒪᐃᑦᑕᕆᐊᖃᙱᖢᑎᒃ, ᐲᕐᓗᒋᑦ ᐊᔪᕐᓇᙱᒃᑯᓂ. ᐲᖅᓯᑦᑎᐊᒻᒪᕆᖕᓂᖅ ᐱᐅᓛᖑᐃᓐᓇᐅᔭᖅᑐᑦ ᐅᓗᕆᐊᓇᕈᓐᓇᕈᑎ ᐊᑦᑕᕐᓇᙱᓐᓂᖅᓴᐅᖁᓪᓗᒍ.
ᐅᓗᕆᐊᓇᖅᑐᓕᒫᑦ ᐃᓚᒋᔭᐅᔭᕆᐊᖃᖅᑐᑦ ᐃᖅᑲᓇᐃᔭᕐᓇᒥ, ᓱᓕ ᐊᒥᓱᒐᓚᐅᔪᑦ ᑭᓱᑐᐃᓐᓇᐃᑦ ᐱᓕᕆᔪᓐᓇᖅᑕᑎᑦ ᐃᖅᑲᓇᐃᔭᕐᕕᒃ ᐊᑦᑕᕐᓇᙱᓐᓂᖅᓴᐅᖁᓪᓗᒍ.
- ᐃᒪᐃᓪᓚᑦᑖᖁᓪᓗᒋᑦ ᐊᑦᑕᕐᓇᙱᑦᑐᒥᒃ ᐃᖅᑲᓇᐃᔭᕐᓂᕐᒧᑦ ᐱᓕᕆᔾᔪᓰᑦ ᐊᑐᖅᑕᐅᔪᓐᓇᖅᑐᑦ ᐃᖅᑲᓇᔭᖅᑎᓗᒃᑖᓄᑦ. ᐊᑐᕐᓗᒋᑦ ᑕᒪᒃᑯᐊ ᐱᓕᕆᔾᔪᓰᑦ ᐊᒻᒪᓗ ᒪᓕᒃᑕᐅᔭᕆᐊᓖᑦ ᐃᑲᔪᕈᓐᓇᖅᑐᑦ ᐃᓕᓐᓂᐊᕈᑕᐅᓗᑎᒃ ᓄᑖᓄᑦ ᐃᖅᑲᓇᐃᔭᖅᑎᓄᑦ ᐊᒻᒪᓗ ᐊᑐᕐᓗᒋᑦ ᐃᖅᑲᐃᓯᒋᐊᕈᑕᐅᓗᑎᒃ ᐃᖅᑲᓇᐃᔭᖅᑎᓄᑦ ᐃᖅᑲᓇᐃᔭᖅᑎᓪᓗᒋᑦ ᖃᐅᑕᒫᖅᓯᐅᑎᖏᓐᓂᒃ ᐱᓕᕆᓗᑎᒃ.
- ᐊᒥᓱᑦ ᐊᔾᔨᒌᙱᑦᑐᑦ ᐅᐊᔭᒨᖅᑐᑦ ᐱᖁᑏᑦ ᐊᒻᒪᓗ ᐊᐅᓚᐅᑎᓖᑦ ᓴᐳᒻᒥᔾᔪᑎᖃᕆᐊᖃᖅᑐᑦ ᐊᒻᒪᓗ ᑮᒍᑎᖃᕐᓗᑎᒃ. ᑲᔪᓯᓂᖅᑕᖃᖅᑎᑦᑎᒐᔪᒡᓗᑎᑦ ᐱᖃᓯᐅᔾᔨᔪᓂᒃ ᐊᑦᑕᕐᓇᖅᑕᐃᓕᒪᓂᕐᒧᑦ ᖃᐅᔨᒋᐊᕈᑎᓂᒃ ᓇᓗᓇᐃᔭᑦᑎᐊᖁᓪᓗᒋᑦ ᑖᒃᑯᐊ ᓴᐳᒻᒥᔾᔪᑏᑦ ᐱᑕᖃᖁᓪᓗᒋᑦ ᐊᒻᒪᓗ ᐊᐅᓚᑦᑎᐊᕈᓐᓇᖁᓪᓗᒋᑦ. ᐊᑐᓂ ᐃᖅᑲᓇᐃᔭᖅᑎᓗᒃᑖᑦ ᐃᓕᓐᓂᐊᖅᓯᒪᓗᑎᒃ ᐊᒻᒪᓗ ᑐᑭᓯᐊᓗᑎᒃ ᖃᓄᖅ ᐊᑐᑦᑎᐊᕆᐊᖃᕐᒪᖔᑕ ᑕᒪᒃᑯᓂᖓ.
- ᐃᓱᒪᒋᖃᓯᐅᑎᓗᒋᑦ ᓇᖕᒥᓂᖅ ᐋᓐᓂᖅᑕᐃᓕᔾᔪᑏᑦ (PPE) ᐃᑲᔪᕐᓂᐊᖅᑐᑦ ᓴᐳᔾᔨᓯᒪᓗᑎᒃ ᐃᖅᑲᓇᐃᔭᖅᑎᓂᒃ, ᐅᕝᕙᓘᓐᓃᑦ ᐃᓚᓕᐅᑎᑐᐃᓐᓇᕆᐊᓖᑦ ᐅᓗᕆᐊᓇᒃᑲᓐᓂᖅᑐᓄᑦ.
ᑐᑭᓯᐅᒪᓗᒍ ᐱᓕᕆᐊᒃᓴᖅ ᐱᓕᕆᔭᐃᑦ, ᐊᒻᒪᓗ ᑭᓱᓂᒃ ᐊᒡᒐᒧᑦ ᓴᐳᒻᒥᔾᔪᑎᓂᒃ ᓈᒻᒪᒃᓴᕋᔭᕐᒪᖔᑦ. ᐃᒪᐃᒃᑲᓗᐊᖅᑎᓪᓗᒍ ᑖᒃᑯᐊ ᐃᓱᒪᒋᖃᓯᐅᑎᔭᐅᔪᐃᓐᓇᐃᑦ ᓇᖕᒥᓂᖅ ᐋᓐᓂᖅᑕᐃᓕᔾᔪᑏᑦ (PPE), ᐱᑕᖃᐅᖅᑐᑦ ᐊᒥᓱᓂᒃ ᐅᔾᔨᒌᙱᒃᑐᓂᒃ ᐊᒡᒑᖕᓂᑦ ᐊᒻᒪᓗ ᐱᖁᑎᓂᒃ ᓴᐳᒻᒥᓂᐊᖅᑐᓂᒃ ᐃᖅᑲᓇᐃᔭᖅᑎᓂᒃ ᐊᒥᓱᓂᑦ ᖃᓄᐃᓕᖓᓂᐅᔪᓂᑦ:
- ᓂᖅᖠᐅᕐᕕᖕᒥᑦ – ᑭᓕᕐᓇᙱᑦᑐᑦ ᐊᒑᑦ ᓲᕐᓗ ᐊᐅᒃᑕᔫᖑᔭᐃᑦ ᓈᒻᒪᑐᐃᓐᓇᕆᐊᓖᑦ ᐃᓚᖏᓐᓄᑦ ᐱᓕᕆᐊᒃᓴᓄᑦ ᐊᑐᖅᑐᓄᑦ ᐊᕕᒃᑐᐃᔾᔪᑎᓄᑦ, ᐅᕝᕙᓘᓐᓃᑦ ᐊᐅᒃᑕᔫᒃ ᐊᒑᑦ ᐅᐊᓴᐃᓗᑎᑦ ᓂᕐᕆᓯᓂᒃ ᐊᒻᒪᓗ ᓴᓗᒻᒪᖅᓴᐃᓗᑎᑦ.
- ᐃᒡᓗᓕᐅᕐᓂᕐᒥᑦ – ᑲᓇᑕᒥᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᑲᑐᔾᔨᖃᑎᒌᑦ (CSA) ᓇᐃᓴᐅᓯᖅᓯᓯᒪᔪᑦ ᐃᖅᑲᓇᐃᔭᕐᕕᖕᒥᑦ ᐊᒡᒑᖕᓂᒃ ᐊᑐᐃᓐᓇᐅᔪᓂᒃ ᐊᒥᓱᒐᓚᖕᓄᑦ ᐱᓕᕆᐊᒃᓴᓄᑦ ᑖᒃᑯᐊ ᐃᒡᓗᓕᐅᖅᐸᒃᑐᑦ ᐃᖅᑲᓴᐃᔭᖅᑏᑦ ᐊᑐᕈᓐᓇᖅᑕᖏᓐᓂᒃ.
- ᓄᓇᒥᑦ – ᓴᓇᕐᕈᑏᑦ (ᓴᕖᑦ) ᐃᐱᑦᑎᐊᕐᓗᑎᒃ, ᐊᒡᒑᑦ ᐊᒻᒪᓗ ᐱᖁᑏᑦ ᓈᒻᒪᒡᓗᑎᒃ ᐱᓕᕆᐊᒃᓴᒧᑦ, ᐊᒻᒪᓗ ᓇᒃᓴᑲᑦᑕᖅ ᐋᓐᓂᖅᑐᓕᕆᔾᔪᑎ.
- ᑎᑎᕋᕐᕕᖕᒥᑦ – ᐊᐅᒃᑕᔫᑦ ᐃᓄᒐᙳᐊᒧᑦ ᐊᑐᕆᐊᓖᑦ ᒪᒃᐱᖅᑎᕆᓂᐊᖅᑎᓪᓗᑎᑦ ᐸᐃᐹᓂᒃ.
- ᓂᐅᕕᕐᕕᖕᒥᑦ – ᐊᒡᒑᑐᐃᓐᓇᐃᑦ ᖁᓚᐃᑎᕆᓗᑎᑦ ᐊᒻᒪᓗ ᓴᖅᑭᑎᕆᓗᑎᑦ ᓂᐅᕕᐊᒃᓴᒃᓴᓂᒃ, ᐊᒻᒪ ᐊᐅᒃᑕᔫᓂᒃ ᐊᒡᒐᖕᓂᑦ ᓴᓗᒻᒪᖅᓴᐃᑎᓪᓗᑎᑦ.
- ᐋᓐᓂᐊᕐᕕᖕᒥᑦ – ᓇᒻᒪᒋᔭᐅᔪᑦ ᐋᓐᓂᐊᕐᕕᒃᓯᐅᑕᐅᓗᑎᒃ ᐊᒡᒑᑦ.
ᐱᒻᒪᕆᐅᔪᖅ ᐃᖅᑲᐅᒪᓗᑕ ᑖᒃᑯᐊ ᐊᒡᒐᖕᓄᑦ ᓴᐳᒻᒥᔾᔪᑏᑦ ᐊᒻᒪᓗ ᐊᒡᒑᑦ ᐃᓛᓐᓂᒃᑯᑦ ᐅᓗᕆᐊᓇᖅᑐᓕᐅᕈᓐᓇᖅᑐᑦ ᐃᓚᓕᐅᑎᓗᑎᒡᓗ ᐊᒡᒐᖕᓄᑦ ᐋᓐᓂᕐᓂᕐᓄᑦ? ᐊᒡᒑᑦ ᓈᒻᒪᙱᑉᐸᑕ, ᐅᕝᕙᓘᓐᓃᑦ ᓈᒻᒪᙱᑦᑐᑦ ᐱᓕᕆᐊᒃᓴᒧᑦ, ᐃᖅᑲᓇᐃᔭᖅᑎᓂᒃ ᖁᐊᖅᓵᕐᓇᒃᑲᓐᓂᖅᑐᒧᐊᖅᑎᑦᑎᑐᐃᓐᓇᕆᐊᓖᑦ. ᐱᓕᕆᐊᒃᓴᑦ ᓲᕐᓗ ᐱᓕᕆᔾᔪᑎᖃᕐᓂᖅ ᐅᐊᔭᒨᖅᑐᓂᒃ ᓴᓇᕐᕈᑎᓂᒃ, ᐅᕝᕙᓘᓐᓃᑦ ᐱᓕᕆᓂᖅ ᖃᐅᒻᒪᖅᑯᑎᓄᑦ ᐱᖁᑎᓄᑦ ᖄᒃᑲᓐᓂᐊᒍᑦ ᐃᓱᒪᒃᓴᖅᓯᐅᕐᓂᖃᒃᑲᓐᓂᕆᐊᓖᑦ ᐊᒻᒪᓗ ᐱᕙᒌᔭᐅᑕᐅᒃᑲᓐᓂᕐᓗᑎᒃ. ᐅᐊᔭᒨᖅᑐᑦ ᓴᓇᕐᕈᑏᑦ ᓇᒃᑎᑦᑎᑦᑎᑐᐃᓐᓇᕆᐊᓖᑦ ᐱᓕᕆᔾᔪᑎᓂᒃ ᐊᒡᒑᖕᓂᒃ, ᐊᒻᒪᓗ ᐊᒡᒑᑦ ᓴᕕᕋᔭᖃᖅᑐᑦ ᖁᐊᖅᓵᕐᓇᒃᑲᓐᓂᕐᓂᖅᓴᐅᓪᓗᑎᒃ ᓱᑲᓐᓂᕐᒧᑦ ᑭᓇᑐᐃᓐᓇᒧᑦ ᐱᓕᕆᔪᒧᑦ ᖃᓂᒋᔮᓂᓪᓘᓐᓃᑦ ᐅᐊᔭᖃᖅᑑᑉ. ᕿᒥᕐᕈᑦᑎᐊᕐᓗᒋᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᖃᐅᔨᒋᐊᕈᑎᑎᑦ ᓂᕈᐊᖅᑳᙱᓐᓂᕐᓂᑦ ᑕᒻᒪᖅᓯᒪᙱᑦᑎᐊᖅᑐᒥᒃ ᓴᐳᔾᔨᓯᒪᔾᔪᑎᒃᓴᕐᓂᒃ.
ᐃᓕᒃᑲᓐᓂᕈᒪᒍᕕᑦ…
ᐃᑲᔫᑎᒃᓴᓄᑦ ᑕᒪᒃᑯᓄᖓ ᐊᒡᒐᖕᒧᑦ ᐋᓐᓂᕐᓂᕐᒧᑦ ᐊᒻᒪᓗ ᖃᓄᖅ ᑕᐃᒪᐃᑦᑕᐃᓕᔪᓐᓇᕐᒪᖔᑦ, ᑐᑯᓗᒍ:
- ᐊᒡᒐᒃᑯᑦ ᐋᓐᓂᕐᓂᕐᓄᑦ ᐃᖅᑲᓇᐃᔭᕐᕕᖕᒥᑦ ᐅᖃᓪᓚᐅᔾᔭᐅᓃᑦ – ᑕᕐᕆᔮᒃᓴᖅ (ᐊᑐᐃᓐᓇᐅᔪᖅ ᑭᓯᐊᓂ ᖃᓪᓗᓈᑐᑦ)
- ᓂᕆᕝᕕᖕᒥᑦ ᐊᑦᑕᕐᓇᖅᑕᐃᓕᒪᓂᖅ: ᑭᓕᖅᑕᐃᓕᒪᓂᖅ ᓴᕕᖕᓄᑦ – ᑕᕐᕆᔮᒃᓴᖅ
- ᖃᖓᒃᑯᑦ ᐊᒡᒑᒃᓯᒪᔭᕆᐊᖃᕐᓂᖅ – ᑕᕐᕆᔮᒃᓴᖅ
- ᐊᒡᒐᖕᓂᒃ ᐊᒻᒪᓗ ᑕᓕᕐᓂᒃ ᓴᐳᔾᔨᓯᒪᓂᖅ – ᒪᓕᒋᐊᖃᖅᑐᖅ ᐱᓕᕆᔾᔪᓯᐅᔪᖅ ᑕᒪᒃᑯᓄᖓ ᓇᖕᒥᓂᖅ ᐋᓐᓂᖅᑕᐃᓕᔾᔪᑏᑦ (PPE) ᐊᒡᒐᖕᓄᑦ ᐊᒻᒪᓗ ᑕᓕᕐᓄᑦ ᐋᓐᓂᖅᑕᐃᓕᒪᓂᕐᒧᑦ.
- ᓴᕖᑦ ᐊᒻᒪᓗ ᐃᐱᒃᑐᑦ ᓴᓇᕐᕈᑏᑦ – ᒪᒃᑯᒃᑐᑦ ᐃᖅᑲᓇᐃᔭᖅᑏᑦ ᐃᖅᑲᓇᐃᔭᕐᕕᖕᒥᑦ ᐅᖃᓪᓚᐅᔾᔭᐅᓃᑦ – ᐃᓕᓴᐃᔨ ᐊᒻᒪᓗ ᐃᓕᓐᓂᐊᖅᑎᑦᑎᔨ
- ᓂᒡᓚᓱᒃᑐᒥ ᐃᓱᒫᓗᖕᓇᖅᑐᑦ – ᐃᖅᑲᓇᐃᔭᕐᕕᖕᒥᑦ ᐅᖃᓪᓚᐅᔾᔭᐅᓃᑦ ᕿᕿᑎᑦᑎᑦᑕᐃᓕᓂᕐᒧᑦ ᐊᒻᒪᓗ ᐋᓐᓂᖅᑎᑦᑎᑦᑕᐃᓕᒪᓂᕐᒧᑦ ᐊᒃᑐᐊᔪᓂᑦ ᓯᓚ ᓂᒡᓚᓱᓗᐊᕐᓂᖓᓄᑦ.
- ᐊᒡᒐᖕᓄᑦ ᓴᓇᕐᕈᑏᑦ ᐃᖅᑲᓇᐃᔭᖅᑐᖅᓯᐅᑏᑦ – ᒪᓕᒃᑕᐅᔪᓐᓇᖅᑐᑦ ᓴᓇᔭᐅᓯᒪᔪᖅ ᑖᒃᑯᓇᙵᑦ ᑲᓇᑕᒥ ᐱᓕᕆᕝᕕᒃ ᐃᖅᑲᓇᐃᔭᕐᕕᖕᒥᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ (CCOHS)
- ᑲᐴᑏᑦ ᒥᖅᑯᑎᖏᑦ – ᒪᓕᒃᑕᐅᔪᓐᓇᖅᑐᑦ ᓴᓇᔭᐅᓯᒪᔪᖅ ᑖᒃᓇᙵᑦ ᑲᓇᑕᒥ ᐱᓕᕆᕝᕕᒃ ᐃᖅᑲᓇᐃᔭᕐᕕᖕᒥᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ (CCOHS)
ᐃᖃᔪᖅᓯᖅᑕᐅᑕᒃᑲᓐᓂᕈᒪᒍᕕᑦ, ᐅᖃᖃᑎᒋᓗᒍ ᐊᑦᑕᕐᓇᖅᑕᐃᓕᒪᓂᕐᒧᑦ ᖃᐅᔨᓴᖅᑎᖁᑎᕗᑦ ᐅᓪᓗᒥ ᓄᓇᕘᒥᑦ ᐅᕝᕙᓘᓐᓃᑦ ᓄᓇᑦᓯᐊᒥᑦ.