ᐊᕐᕌᓂᐅᓚᐅᕐᑐᖅ ᑐᓄᒃᑯᑦ ᐋᓐᓂᖅᑐᑦ ᒫᓃᓚᐅᖅᑐᑦ ᖁᓕᓂ ᐋᓐᓂᖅᑐᓂᒃ ᐊᑕᐅᓯᖅ ᑐᓄᖓᒍᑦ ᐋᓐᓂᖅᖢᓂ ᓄᓇᑦᓯᐊᖅᒥᑦ ᐊᒻᒪ ᓄᓇᕗᒥᑦ. ᑐᓄ ᐊᒃᓱᐊᓘᙱᑦᑐᖅ ᐋᓐᓂᕋᓗᐊᖅᐸᑦ ᐅᕝᕙᓘᓐᓃᑦ ᓴᙱᔪᓐᓃᓗᐊᕐᓇᕐᓗᓂ ᐋᓐᓂᕈᑎᐅᔪᖅ, ᑐᓄᒃᑯᑦ ᓈᒻᒪᙱᓕᐅᕈᑎᐅᔪᑦ ᐊᒃᑐᐃᓂᖃᒻᒪᕆᒍᓐᓇᖅᒪᑕ ᐃᖅᑲᓇᐃᔭᖃᑦᑕᕐᓂᖅᒧᑦ, ᐃᓅᓯᖅᒧᑦ, ᐃᓱᒪᒧᑦ ᐊᒻᒪᓗ ᐃᓅᓯᖃᕐᓂᖅᒧᑦ.
ᐃᓚᖏᑦ ᐃᖅᑲᓇᐃᔮᒃᓴᐃᑦ ᑐᓄᒧᑦ ᐅᓗᕆᐊᓇᕐᓂᖅᓴᐅᔭᑦᑐᑦ ᖃᓄᐃᓕᐅᕆᐊᖃᕈᑎᐅᓂᕐᒧ ᖃᐅᑕᒫᑦ ᐱᓕᕆᓂᐅᔪᓄᑦ ᐊᒻᒪ ᖃᓄᐃᓕᐅᕈᑎᐅᕙᒃᑐᓄᑦ. ᖃᖓᑕᓲᒃᑰᑦ ᐱᖁᑎᓕᕆᔨᐅᔪᑦ, ᐅᔭᕋᒃᓯᐅᖅᕕᒃᒥ ᓴᓇᔩᑦ, ᐊᒻᒪ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐅᓗᕆᐊᓇᓛᖑᖃᑕᐅᔪᑦ ᐃᖅᑲᓇᐃᔮᖑᕙᒃᑐᓂᒃ. ᑭᓯᐊᓂᓕ, ᐱᒻᒪᕆᐊᓘᕗᖅ ᐃᖅᑲᐅᒪᓗᓂ ᑭᓇᑐᐃᓐᓇᖅ ᑐᓄᒃᑯᑦ ᐋᓐᓂᕈᑎᖃᕈᓐᓇᕐᒪ. ᑭᕕᒃᓯᔭᕆᐊᖃᖅᓯᒪᕖ? ᑎᑎᕋᖅᕕᒃᒥ ᐃᒃᓯᕚᕆᐊᖃᖅᓯᒪᕖ? ᐊᑯᓂᐊᓗᒃ ᓇᖏᖅᓯᒪᔭᕆᐊᖃᖅᓯᒪᕖ? ᓴᓇᕐᕈᑎᓂᒃ ᐱᓕᕆᔾᔪᑎᖃᕆᐊᖃᖅᓯᒪᕖᑦ ᐅᕝᕙᓘᓐᓃᑦ ᓴᓇᕐᕈᑎᓂᒃ ᐊᐅᓚᑲᑕᕈᓘᔭᖃᑦᑕᖅᑐᓃ? ᐅᑯᐊ ᐱᓕᕆᐊᖑᕙᒃᑐᑦ ᐅᓗᕆᐊᓇᕈᑎᖃᖅᑐᐃᓐᓇᐃᑦ ᑐᓄᒃᑯᑦ ᐋᓐᓂᕈᑎᐅᓇᔭᕆᐊᒃᓴᖏᓐᓂᒃ, ᐊᒻᒪᓗ ᐱᒻᒪᕆᐊᓘᓪᓗᓂ ᑭᓇᑐᐃᓐᓇᖅᒧᑦ.
ᓇᓂᓯᓂᖅ ᐅᓗᕆᐊᓇᑐᐃᓐᓇᕆᐊᓕᖕᓂᒃ
ᓯᕗᓪᓕᖅᐹᒥᒃ ᐅᓗᕆᐊᓇᙱᑦᑐᒥᑦ ᐱᓕᕆᕝᕕᖃᕋᓱᒡᓗᓂ ᖃᐅᔨᓇᓱᒋᐊᖃᕐᓇᖅᑐᖅ ᐅᓗᕆᐊᓇᑐᐃᓐᓇᕆᐊᖃᖅᑐᓂᒃ. ᑕᐃᒪᐃᓕᐅᕈᓐᓇᖅᑐᑎ ᐅᓗᕆᐊᓇᕋᔭᖅᑐᓂᒃ ᖃᐅᔨᓴᕈᕕᑦ. ᐅᓇ ᐅᓗᕆᐊᓇᙱᑦᑐᒥ ᕿᒥᕐᕈᐊᕈᑎᐅᔪᖅ ᐃᖅᑲᓇᐃᔮᖑᕙᒃᑐᓂᒃ ᐊᒻᒪᓗ ᐱᓕᕆᐊᒃᓴᕆᔭᐅᕙᒃᑐᓂᒃ ᓴᓇᔨᓄᑦ ᐊᒻᒪᓗ ᐱᓕᕆᕝᕕᒋᔭᕆᐊᖃᖃᑦᑕᖅᑕᖏᓐᓂᒃ. ᑲᒪᔨ ᐅᕝᕙᓘᓐᓃᑦ ᐃᖅᑲᓇᐃᔭᖅᑎᑦᑎᔨ ᐅᓗᕆᐊᓇᑐᐃᓐᓇᕆᐊᓕᖕᓂ ᕿᓂᖃᑦᑕᖅᑐᖅ ᓴᓇᕝᕕᐅᔪᓂᒃ, ᐊᒻᒪᓗ ᓴᓇᔨᐅᔪᖅ ᑕᐃᒪᓐᓇᑦᑕᐃᓐᓇ ᓴᓇᔭᖓᓂᒃ ᕿᓂᖃᑦᑕᕐᒥᓗᓂ ᐊᒻᒪ ᐱᓕᕆᕝᕕᒋᔭᖓᓂ. ᒪᑯᓄᖓᓕ ᑐᓄᒃᑯ ᐋᓐᓂᖅᑐᓄᑦ, ᐃᒪᐃᑦᑐᓂᒃ ᐃᓱᒪᔭᕆᐊᖃᕋᔭᖅᑐᑎᑦ: ᐅᕿᙱᑦᑐᓂᒃ ᑭᕕᒃᓯᔭᕆᐊᖃᕐᓂᖅ ᐅᕝᕙᓘᓐᓃᑦ ᐃᖢᐊᙱᑦᑐᒥ ᐊᐅᓚᔾᔭᒋᐊᖃᕐᓂᖅ (ᓲᕐᓗ ᓴᓂᒧᑦ ᐊᐅᓪᓚᔾᔭᒋᐊᖃᕐᓂᕐᒧ) ᑎᒍᒥᐊᕐᓗᑎᑦ; ᐊᑯᓂᕈᓗᒃ ᓇᖏᕆᐊᖃᕐᓇᕈᓂ ᐅᕝᕙᓘᓐᓃᑦ ᐊᑯᓂᕈᓗᒃ ᐃᒃᓯᕚᕆᐊᖃᕐᓇᖅᑐᒥ ᐅᕝᕙᓘᓐᓃᑦ ᐋᖅᑭᒃᓯᒪᔭᕆᐊᖃᕐᓗᓂ ᑎᒥᒧᑦ ᐃᖢᐊᓗᐊᙱᑦᑐᒥᓐ; ᐱᓕᕆᐊᖃᕐᓗᓂ ᐊᑐᕆᐊᓕᖕᒥ ᐊᔾᔨᒌᑦᑕᐃᓐᓇᕆᐊᓕᖕᒥᒃ; ᓴᓇᕐᕈᑎᓂᒃ ᐅᕝᕙᓘᓐᓃᑦ ᓴᓇᔾᔪᑎᓂᒃ ᐊᐅᓚᑲᑕᔭᓗᐊᖅᑐᓂᒃ, ᐊᓯᖏᓐᓂᒡᓗ.
ᓇᓗᓇᐃᖅᑕᐅᓚᐅᖅᑎᓪᓗᒋᑦ ᐅᓗᕆᐊᓇᕋᔭᖅᑐᐃ, ᑕᒪᕐᒥᒃ ᓴᓇᔩᑦ ᐊᔪᕈᓐᓃᖅᓴᖅᑎᑕᐅᔭᕆᐊᖃᖅᑐᑦ ᖃᐅᔨᒪᓕᕈᓐᓇᖅᓯᓗᑎᒃ ᑕᒪᒃᑯᓂᖓ, ᓇᓗᓇᐃᖅᓯᔪᓐᓇᖅᓯᓗᑎᒃ ᐃᓱᒫᓘᑎᐅᖕᒥᔪᓂᒃ ᑕᑯᔭᐅᙱᑦᑐᕕᓂᕐᓂᒃ ᓄᑖᓂᒡᓘᓐᓃᑦ ᓴᓇᓇᕝᕕᖕᒦᓕᖅᑐᓂᒃ, ᐊᒻᒪᓗ ᓴᓇᕈᑎᖃᖅᑎᑕᐅᓗᑎᒃ ᐊᒻᒪ ᑐᓴᐅᒪᑎᑕᐅᓗᑎᒃ ᑐᓄᒃᑯᑦ ᐋᓐᓂᖅᑕᐃᓕᒪᒍᑎᐅᔪᓐᓇᖅᑐᓂᒃ.
ᑐᓄᒃᑯᑦ ᒪᑯᓄᖓ ᐋᓐᓂᕈᑎᐅᓂᖅᓴᐅᔭᑦᑐᑦ:
- ᓄᑭᒃᑯᑦ ᓴᓐᓂᓕᕈᑕᐅᔪᑦ: ᐊᕐᕌᓂᐅᓚᐅᕐᑐᖅ ᐋᓐᓂᕈᑎᐅᔪᑦ ᐊᒃᑐᐊᔪᑦ ᐱᓕᕆᕐᔪᐊᓗᐊᕐᓂᕐᒧᑦ 40%-ᒥ ᑐᓄᒃᑯᑦ ᐋᓐᓂᕐᓂᕋᕈᑎᐅᓚᐅᖅᓯᒪᔪᖅ ᑮᓇᐅᔭᖅᑖᕋᓱᒃᑐᓂᒃ ᐅᑯᓇᙵᑦ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᐃᓪᓕᐅᒃᑯᒫᓂᒃ ᖃᐅᔨᓴᖅᑎᒃᑯᓐᓂᑦ (WSCC). ᐋᓐᓂᕈᑎᕕᓂᐅᔪᑦ ᒪᑯᓇᙶᖅᓯᒪᔪᖅ ᑭᕕᒃᓯᒋᐊᖅᓯᒪᓂᕐᒧᑦ, ᐊᔭᐅᕐᓂᖅᒧᑦ, ᐅᓂᐊᕐᓯᓂᖅᒧᑦ, ᐅᕝᕙᓘᓐᓃᑦ ᐅᕿᙱᑦᑐᓂᒃ ᐊᒡᔭᖅᑐᐃᑲᑕᖕᓂᖅᒧᑦ, ᐱᓗᐊᖅᖢᓂ ᑲᒪᑦᑎᐊᙱᓗᐊᕐᓂᒃᑯᑦ ᐅᑯᒋᐊᕐᓂᒃᑯᑦ, ᐅᕝᕙᓘᓐᓃᑦ ᐃᒡᓗᐊᓄᑦ ᓵᒋᐊᕐᓂᒃᑯᑦ. ᑕᒪᒃᑯᐊ ᑕᐃᒪᐃᙱᑎᑦᑎᔾᔪᑎᐅᔪᓐᓇᖅᑐᑦ ᑭᕕᒃᓯᔾᔪᑎᖃᕐᓗᓂ, ᓇᖕᒥᓂᖅ ᐋᓐᓂᖅᑕᐃᓕᔾᔪᑎᖃᕐᓗᓂ (PPE), ᐊᒻᒪᓗ ᓴᓇᖃᑕᐅᔪᓂᒃ ᐃᑲᔪᖅᑕᐅᕙᒡᓗᓂ.
- ᓈᒻᒪᙱᓗᐊᖅᑐᒃᑯᑦ ᐊᐅᓚᑲᑕᖕᓂᖅ ᐃᓚᖃᖅᖢᓂ ᐊᑕᐅᓯᑦᑕᐃᓐᓇᒃᑯᑦ ᐱᓕᕆᔾᔪᑎᖃᑲᑕᖕᓂᖅᒥᒃ: ᓴᓇᔨ ᐅᓗᕆᐊᓇᖅᑐᒦᑦᑐᖅ ᐋᓐᓂᑐᐃᓐᓇᕆᐊᖃᕐᓗᓂ ᑭᕕᒃᓯᑲᑕᐃᓐᓇᕐᓂᖅᒧᑦ, ᓅᑎᕆᑎᑦᑎᑲᑕᖕᓂᖅᒧᑦ, ᐱᓕᕆᔾᔪᑎᓂᒃ ᐊᑐᑲᑕᖕᓂᒃᑯᑦ ᐊᒻᒪᓗ ᓴᓇᕐᕈᑎᓂᒃ ᐊᐅᓚᑲᑕᓗᐊᖅᐸᒃᑐᓂᒃ, ᐅᕝᕙᓘᓐᓃᑦ ᓴᓇᓗᓂ ᐊᑕᐅᓯᑦᑕᐃᓐᓇᖅᒥᒃ ᐋᖅᑭᒃᓯᒪᔭᕆᐊᖃᐃᓐᓇᕐᓗᓂ ᓄᖅᑲᓚᐅᙲᓐᓇᕐᓗᓂ. ᐅᓗᕆᐊᓇᒃᑲᓐᓂᖃᑦᑕᖅᑐᖅ ᖃᓄᐃᓕᖓᖃᑦᑕᕐᓂᐅᔪᖅ ᐃᓱᒪᒋᔭᐅᓯᒪᙱᒃᑯᓂ. ᐅᓄᖅᑐᑦ ᐋᓐᓂᕈᑎᐅᔪᑦ ᐊᑕᐅᓯᑦᑕᐃᓐᓇᕐᒥᙶᖅᐸᒃᑐ ᓲᕐᓗ ᑕᖃᓗᐊᒧᑦ ᐋᓐᓂᕈᑎᐅᕙᒃᑐᑦ, ᑭᓯᐊᓂᓕ ᐊᑯᓂᕈᓗᒃ ᐱᓕᕆᐊᖃᐃᓐᓇᖅᓯᒪᓪᓗᓂ ᐋᓐᓂᕈᑎᐅᔭᖢᑎᒃ. ᖃᓄᐃᑦᑕᐃᓕᓂᖅᒧᑦ ᐱᓕᕆᔾᔪᑎᐅᔪᓐᓇᖅᑐᑦ ᐅᑯᓂᖓ ᐃᓚᖃᖅᑐᑦ: ᓄᖅᑲᖓᓚᐅᑲᒃᐸᒡᓗᑎᒃ, ᑕᓯᓯᑲᑕᓚᐅᑲᒃᐸᒡᓗᑎᒃ, ᑕᖃᐃᖅᓯᓚᐅᖅᐸᒡᓗᑎᒃ ᐊᑕᐅᓯᑦᑕᐃᓐᓇᕐᒥᒃ ᐱᓕᕆᐊᖃᕈᑎᒃ ᐊᐅᓚᑲᑕᖕᓇᓗᐊᖅᑐᒥᓪᓘᓐᓃᑦ, ᑎᒥ ᐋᖅᑭᒃᓯᒪᑎᑦᑎᐊᕋᓱᒃᐸᒡᓗᒍ ᐊᒻᒪᓗ ᐋᖅᑭᒃᓯᒪᕙᒡᓗᑎᒃ ᑕᖃᓇᓗᐊᕐᓇᙱᑦᑐᓂᒃ.
- ᑎᒥ ᐋᖅᑭᒃᓯᒪᙱᓗᐊᖃᑦᑕᕐᓂᖓ ᐃᓚᖃᖅᖢᓂ ᓄᖅᑲᖓᑲᑕᖕᓇᓗᐊᖅᑐᓂᒃ ᐋᖅᑭᒃᓯᒪᓂᕐᒥᒃ: ᑕᒪᒃᑯᐊ ᐋᓐᓂᕈᑎᐅᔭᑦᑐᑦ ᐊᒃᑐᐊᓗᐊᖅᑐᑦ ᒪᑯᓂᖓ ᑎᑎᕋᖅᕕᒃᒥᑦ ᐱᓕᕆᕙᒃᑐᓄᑦ. ᓴᓇᔨᐅᔪᖅ ᓄᖃᖓᓗᐊᕈᓂ ᐅᓪᓗᓕᒫᐸᓗᒃ ᐃᓚᖃᖅᓗᓂ ᐋᖅᑭᒃᓯᒪᑦᑎᐊᙱᓗᐊᓂᖓᓂ ᑎᒥᖓ ᐊᒻᒪᓗ ᑎᑎᕋᖅᕕᒃᒦᓐᓂᖅᒧᑦ, ᑕᐃᒪᓕ ᓴᓇᔨ ᑐᓄᐊᒍᑦ ᓈᒻᒪᙱᓕᐅᕈᑎᖃᔭᓐᓂᖅᓴᐅᓇᔭᖅᑐᖅ. ᑕᒪᒃᑯᐊ ᐋᓐᓂᕈᑎᐅᔭᑦᑐᑦ ᐊᑐᖅᑕᐅᙱᓐᓂᖅᓴᐅᔪᓐᓇᖅᑐᑦ ᑎᒥᒧᑦ ᐋᖅᑭᒃᓯᒪᓐᓇᖅᔫᒥᔪᓂᒃ ᐱᑕᖃᕈᓂ ᓴᓇᔨᒧᑦ ᓈᒻᒪᖕᓂᖅᓴᐅᔪᓂᒃ ᐊᒻᒪᓗ ᐱᓕᕆᐊᖓᓂ ᑕᓯᓯᓚᐅᖃᑦᑕᕈᓂ ᐊᒻᒪ ᓄᖅᑲᖓᓚᐅᑲᒃᐸᒡᓗᓂ. ᐃᖅᑲᓇᐃᔭᖅᑎᐅᔪᑦ ᓇᖏᕐᓯᓚᐅᖅᐸᒡᓗᑎᒃ ᐊᒻᒪ ᐱᓱᑲᑕᓚᐅᑲᒃᐸᒡᓗᑎᒃ ᐃᑲᕐᕋᖅ ᓇᓪᓕᕌᖓᑦ.
ᑕᒪᒃᑯᐊ ᖃᓄᐃᓕᒍᑎᐅᔭᑦᑐᑦ ᐊᑕᐅᑦᑎᒃᑰᕈᑎᒃ ᐅᓗᕆᐊᓇᒃᑲᓐᓂᕋᔭᕐᒪᑕ ᓴᓇᔨᓄᑦ, ᑕᐃᒪᓕ ᐅᓗᕆᐊᓇᖅᑐᓂᒃ ᖃᐅᔨᓴᖅᑎᓪᓗᑎ ᐱᒻᒪᕆᐅᕗᖅ ᐋᓐᓂᕈᑎᐅᔭᑦᑐᓂᒃ ᕿᒥᕐᕈᐊᕐᓗᑎᑦ ᓲᕐᓗ ᐊᑕᐅᓰᖅᑕᐅᒐᓗᐊᖅᐸᑦ ᐊᑐᖅᑕᐅᓗᓂ ᐊᒻᒪᓗ ᑕᒪᐃᓐᓂ ᕿᒥᕐᕈᐊᕐᓂᒃᑯᑦ ᐅᓗᕆᐊᓇᖅᑐᓕᕆᓂᕐᕐᒥᒃ. ᐊᑕᐅᓯᑐᐊᕐᒥ ᐋᖅᑭᒍᑎᒃᓴᖅᑕᖃᙱᒻᒪᑦ. ᐊᑐᓂ ᐃᖅᑲᓇᐃᔭᖅᑎᐅᔪᑦ, ᒪᓕᒃᖢᑎᒃ ᑎᒥᖏ ᐋᖅᑭᒃᓯᒪᕙᖕᓂᖏᓐᓂᒃ, ᐊᔾᔨᒌᙱᑦᑐᓂ ᐱᓕᕆᔾᔪᑎᖃᕆᐊᖃᕋᔭᖅᑐᒃᓴᐅᔪᑦ, ᐃᑲᔪᕈᑎᓂᒃ, ᐋᖅᑭᒋᐊᕈᑎᒃᓴᓂᒃ, ᐅᕝᕙᓘᓐᓃᑦ ᐱᓕᕆᔾᔪᑎᓂᒃ ᐊᑐᕆᐊᖃᖅᑕᖏᓐᓂᒃ ᓈᒻᒪᒃᑐᒃᑯᑦ ᐱᓕᕆᔾᔪᑎᒃᓴᓂᒃ. ᐅᓗᕆᐊᓇᖅᑐᓂᒃ ᖃᐅᔨᓴᓚᐅᖅᑎᓪᓗᑎ ᐱᒻᒪᕆᐊᓗᒃ ᖃᐅᔨᔭᑎᒃ ᖃᓄᖅ ᐊᑐᕈᓐᓇᕐᒪᖔᖅᐱᑦ ᖃᓄᐃᑦᑕᐃᓕᒪᑎᑦᑎᓂᖅᒥᒃ ᐃᖅᑲᓇᐃᔭᖅᕕᐅᔪᒥᓐ.
ᖁᑦᑎᖕᓂᖅᐹᑦ ᖃᓄᐃᓕᐅᕈᑎᐅᔪᓐᓇᖅᑐᑦ 6 ᑐᓄᒃᑯᑦ ᐋᓐᓂᖅᑕᐃᓕᒪᔾᔪᑎᐅᔪᓐᓇᖅᑐᓂᒃ
ᐅᖃᓪᓚᖃᑎᖃᖃᑦᑕᕐᓗᓂ ᐱᓕᕆᐊᖃᖅᑳᖅᐸᒃᑐᓂᒃ ᖃᐅᔨᕚᓪᓕᕐᓇᖅᑐᖅ ᖃᓄᖅ ᐋᓐᓂᖅᑕᐃᓕᒪᔪᓐᓇᕋᔭᕆᐊᒃᓴᒥᒃ. ᖃᐅᔨᒪᖃᑦᑕᕐᒪᑕ ᐅᓗᕆᐊᓇᖅᑐᑦ ᓇᓃᓐᓇᔭᕐᓂᖏᓐᓂᒃ, ᐊᒻᒪᓗ ᐅᓇ ᐱᒻᒪᕆᐊᓗᒃ ᖃᐅᔨᒪᓪᓗᑎᒃ ᖃᓄᑎᒋ ᐱᓕᕆᔪᓐᓇᕐᓂᖏᓐᓂᒃ ᐱᓕᕆᐊᖏᓐᓂᒃ ᐱᓕᕆᐊᖃᖅᑎᓪᓗᒋᑦ. ᐅᑯᐊ 6 ᖁᑦᑎᖕᓂᖅᐹᑦ ᐃᓱᒪᓕᐅᕈᑎᒋᔭᕗᑦ ᐱᐅᓯᕚᓪᓕᖅᑎᑦᑎᓇᓱᒃᑎᓪᓗᑎᒃ ᑐᓄᒃᑯᑦ ᐋᓐᓂᖅᑎᑦᑎᑦᑕᐃᓕᓂᖅᒧᑦ ᐸᕐᓇᐅᑎᓂᒃ ᓴᓇᔨᓄᑦ ᐃᑲᔪᖅᑕᐅᓂᒃᑯᑦ:
- ᓇᓗᓇᐃᕐᓗᒋᑦ ᐅᓗᕆᐊᓇᖅᑐᑦ – ᒪᓕᒡᓗᒍ ᑐᓴᒐᒃᓴᐅᔪᖅ ᖁᓕᑦᑎᐊᖓᓂ. ᓴᓇᕝᕕᒋᔭᕐᓂᒃ ᑕᒪᕐᒥᒃ ᓴᓇᖃᑦᑕᖅᑐᑦ ᖃᐅᔨᒪᑎᓪᓗᒋᑦ ᐊᒻᒪ ᑐᑭᓯᐅᒪᑎᓪᓗᒋᑦ ᐅᓗᕆᐊᓇᕈᑎᐅᔪᓂᒃ ᐱᓕᕆᐊᕆᕙᒃᑕᖏᓐᓂᒃ. ᖃᐅᔨᑎᓪᓗᒋᑦ ᖃᐅᔨᒪᓕᕈᓐᓇᕐᓂᖅᒥᒃ ᐅᓗᕆᐊᓇᖅᑐᓂᒃ ᓴᓇᕝᕕᒃᒥᑦ, ᐊᒻᒪᓗ ᐅᓗᕆᐊᓇᙱᑦᑐᒦᓐᓂᖅᒥᒃ ᐃᓱᒪᒋᔭᖃᖅᑎᑉᐸᒡᓗᒋᑦ ᐊᒻᒪ ᓈᒻᒪᙱᑦᑐᓂᒃ ᑐᓴᐅᒪᑎᑦᑎᕙᒡᓗᑎᒃ ᑲᒪᔨᒋᔭᖏᓐᓂᒃ.
- ᐊᑐᐊᒐᐃᑦ ᐊᒻᒪ ᐊᑐᖅᑕᐅᔭᕆᐊᖃᖅᑐᑦ – ᑐᑭᓯᓇᑦᑎᐊᖅᑐᓂᒃ ᐅᓗᕆᐊᓇᙱᑦᑐᒦᓐᓂᖅᒧᑦ ᐊᑐᐊᒐᖃᕐᓗᑎᒃ ᐊᒻᒪ ᐊᑐᖅᑕᐅᔭᕆᐊᖃᖅᑐᓂᒃ ᓴᓇᔨᓄᑦ ᕿᒥᕐᕈᐊᖅᑕᐅᓂᐊᖅᑐᓂᒃ ᐊᒻᒪ ᑐᑭᓯᔭᐅᓯᒪᔭᔭᕆᐊᖃᖅᑐᓂᒃ. ᑐᓴᐅᒪᔭᐅᔭᕆᐊᓖᑦ ᒪᑯᐊ ᐅᕿᙱᑦᑐᓕᕆᓗᑎᒃ ᐅᕿᙱᓛᓂ ᑭᕕᒃᓯᒪᕆᐊᖃᕐᓂᖏᓐᓂᒃ ᐊᒻᒪ ᐊᑐᖅᑕᐅᔭᕆᐊᖃᖅᑐᓂᒃ ᐊᒻᒪ ᑐᓴᐅᒪᔭᐅᔭᕆᐊᓕᖕᓂ ᐅᓗᕆᐊᓇᖅᑐᒥᑦ ᖃᓄᐃᙱᓪᓗᓂ ᐱᓕᕆᐊᖃᕈᓐᓇᕐᓂᕐᒥᒃ.
- ᑐᓴᐅᒪᑎᑦᑎᓂᖅ ᐊᒻᒪ ᐃᓕᓐᓂᐊᖅᑎᑦᑎᓂᖅ – ᐊᔪᕈᓐᓃᖅᓴᖅᑎᑦᑎᕙᒡᓗᑎᒃ ᐊᒻᒪ ᐃᓕᓐᓂᐊᖅᑎᑦᑎᕙᒡᓗᑎᒃ ᐃᖅᑲᓇᐃᔭᖅᑎᓂᒃ ᐸᕐᓇᒃᓯᒪᑎᑦᑎᔪᓐᓇᕐᓂᖅᒥᒃ, ᑕᑯᓗᒍ ᐊᑖᓂ ᐃᓕᓐᓂᐊᕈᑎᓄᑦ ᐃᑲᔪᕈᑎᒃᓴᐃᑦ.
- ᐊᑐᐃᓐᓇᐃᑦ ᐅᓗᕆᐊᓇᙱᑦᑐᒦᒍᑎᑦ ᐱᖁᑎᑦ – ᑭᕕᒃᓯᑲᑕᖕᓂᖅᒧᑦ ᐃᑲᔪᕈᑎᒃᓴᑦ, ᓇᖕᒥᓂᖅ ᐋᓐᓂᖅᑕᐃᓕᔾᔪᑏᑦ, ᐊᒻᒪ ᐃᑲᔪᕈᑎᒃᓴᑦ ᐊᑐᐃᓐᓇᐅᔪᑦ ᐊᒻᒪ ᐊᑐᖅᑕᐅᔪᓐᓇᖅᖢᑎᒃ ᐃᖅᑲᓇᐃᔭᖅᑎᓄᑦ.
- ᐱᓕᕆᑎᖃᒌᖕᓂᖅ ᐊᒻᒪᓗ ᖃᓄᐃᑦᑕᐃᓕᓂᖅᒧᑦ ᖃᓄᐃᓕᐅᕈᑎᖃᕐᓂᖅ – ᐋᖅᑭᒃᓱᐃᓂᖅ ᐃᖅᑲᓇᐃᔭᖅᕕᒃᒥᑦ ᐃᖅᑲᓇᐃᔭᖅᑎᐅᔪᑦ ᖃᐅᔨᒪᑎᓪᓗᒋᑦ ᐃᑲᔪᖅᑕᐅᔭᕆᐊᖃᕈᑎᒃ ᐊᐱᕆᔪᓐᓇᑦᑎᐊᕐᓂᖏᓐᓂᒃ ᐱᓕᕆᐊᖏᓐᓂᒃ ᐱᐊᓂᒃᓯᓇᓱᒃᑎᓐᓗᒋᑦ. ᐊᔪᙱᑦᑐᐊᓘᓂᕋᖅᑕᐅᔪᖅ ᑭᓇᑐᐃᓐᓇ ᓴᓇᖃᑎᖓᓂᒃ ᐃᑲᔪᕈᓐᓇᖅᑐᑦ ᐱᓕᕆᐊᖏᓐᓂᒃ ᐅᓗᕆᐊᓇᙱᓐᓂᖅᓴᒃᑯᑦ ᐱᓕᕆᐊᖃᕈᓐᓇᕐᓂᕐᒥᒃ, ᒪᑯᐊᖑᙱᑦᑐᑦ ᐃᒻᒥᓂᑐᐊᖅ ᐱᓕᕆᐊᖃᕋᓱᐃᓐᓇᖃᑦᑕᖅᑐᑦ.
- ᐅᓂᒃᑳᓕᐅᖅᓵᓕᕙᖕᓂᖅ – ᓴᓇᔨᐅᔪᑦ ᖃᐅᔨᒪᑎᓪᓗᒋ ᐅᓂᒃᑲᐅᓯᖃᖃᑦᑕᕆᐊᖃᕐᓂᖏᓐᓂᒃ ᐋᓐᓂᖅᑐᖃᖅᑐᕕᓂᐅᒃᐸᑦ ᑲᒪᔨᒋᔭᒥᖕᓄᑦ. ᖃᐅᔨᓵᓕᓗᓂ ᐊᒻᒪ ᐱᓕᕆᐊᖑᓵᓕᓗᓂ ᐱᐅᓂᕐᓴᐅᓇᔭᕐᒪᑦ ᐊᓯᐊᓂ ᐋᓐᓂᑐᖃᙱᓐᓂᖅᓴᐅᔪᓐᓇᕐᓗᓂ ᐊᒻᒪ/ᐅᕝᕙᓘᓐᓃᑦ ᒪᒥᑉᐸᓪᓕᐊᓵᓕᓂᕐᓴᐅᓇᖅᖢᓂ.
ᐅᑯᐊ ᐃᑲᔪᕈᑎ ᐅᓗᕆᐊᓇᙱᑦᑐᒦᓐᓂᕐᒥᒃ ᐱᓕᕆᐊᖃᕐᓇᕐᓂᖅᓴᐅᓐᓇᖅᑐᖅ ᓴᓇᕝᕕᒋᔭᕐᓂᒃ. ᐅᖃᓕᒫᒃᑲᓐᓂᕈᒪᒍᕕᑦ ᐱᓕᕆᐊᕆᔭᕆᐊᖃᖅᑕᕐᓂᒃ ᐃᖅᑲᓇᐃᔭᖅᑎᑦᑎᔨᐅᓗᑎᒃ ᐅᕘᓇ ᓄᓇᑦᓯᐊᒃᑯ ᐊᒻᒪ ᓄᓇᕗᑦᑯᑦ ᒪᓕᒐᓕᕆᓂᒃᑯᑦ, ᑕᑯᒋᐊᕐᓗᑎᒃ ᐃᓚᖓ 85 ᐅᕙᓂ ᐃᖅᑲᓇᐃᔭᕐᕕᖕᒥᑦ ᐋᓐᓂᐊᖃᖅᑕᐃᓕᒪᓂᖅᒥᒃ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᖅᒧᑦ ᒪᓕᒐᑦ ᐅᑯᓄᖓ ᓄᓇᕗᑦ ᐊᒻᒪᓗ ᐅᕗᖓ ᓄᓇᑦᓯᐊᖅᒧᑦ.
ᖃᐅᔨᒪᔪᓐᓇᕐᓂᖅ ᖃᓄᐃᓕᖓᓂᐅᔪᑦ ᐊᒻᒪ ᖃᓄᐃᓕᐅᕐᓇᐅᔪᑦ
ᐋᓐᓂᖅᑕᐃᓕᓂᖅ ᐱᐅᓂᖅᐹᖑᕙᒃᑎᓪᓗᒍ ᐊᑐᖅᖢᒍ, ᐱᒻᒪᕆᐊᓘᖕᒥᔪᖅ ᓴᓇᔨᐅᔪᑦ ᖃᐅᔨᒪᔪᓐᓇᖅᓗᑎᒃ ᐊᒻᒪ ᖃᓄᐃᓕᐅᕐᓇᐅᔪᓂᒃ ᐋᓐᓂᖅᑐᕕᓂᖅᒧᑦ. ᐋᓐᓂᖅᑐᖃᕐᓂᖅᐸᑦ, ᐅᕝᕙᓘᓐᓃᑦ ᐋᓐᓂᖅᑐᖃᑲᑕᐃᓐᓇᓕᖅᐸᑦ, ᐱᒻᒪᕆᐊᓗᒃ ᓴᓇᔨ ᓇᓗᓇᐃᖅᓯᔪᓐᓇᕐᓗᓂ ᓈᒻᒪᙱᓕᐅᕈᑎᒥᒃ ᐊᒻᒪᓗ ᐋᖅᑭᒋᐊᕈᑎᒋᔪᓐᓇᖅᑕᖓᓂᒃ ᕿᓚᒥᐅᓛᒃᑯᑦ. ᐋᓐᓂᖅᑐᕕᓂᐅᑉ ᖃᓄᐃᓕᖓᔾᔪᑎᒋᑐᐃᓐᓇᕆᐊᖃᖅᑕᖏᑦ:
- ᐋᓐᓂᑲᑕᒡᓗᓂ, ᐆᑦᑐᐊᓘᖂᔨᓗᓂ, ᐅᕝᕙᓘᓐᓃᑦ ᐋᓐᓂᑳᓪᓚᑲᑕᒡᓗᓂ
- ᑲᑭᓚᓈᖅᓯᑲᑕᖕᓂᖅ
- ᓴᙲᑦᑐᑯᓘᓕᕐᓂᖅ
- ᐊᐅᓚᔾᔭᒍᓐᓇᐃᓪᓕᓂᖅ
- ᐳᕕᓕᕐᓂᖅ ᐅᕝᕙᓘᓐᓃᑦ ᐊᒃᑐᖅᖢᓂ ᐋᓐᓂᔭᓐᓂᖅ
- ᐃᒃᐱᖕᓇᑦᑎᐊᖅᑰᔨᙱᓪᓗᓂ
- ᑕᖃᓯᒪᓂᖅ
ᓴᓇᔨᐅᔪᑦ ᐃᖕᒥᖕᓂᒃ ᖃᐅᔨᓇᓱᖃᑦᑕᖁᓗᒋᑦ ᐊᒻᒪᓗ ᑲᒪᔨᖏᓐᓄᑦ ᐋᓐᓂᑐᐊᖅᐸᑕ ᖃᐅᔨᑎᑦᑎᑲᐅᑎᒋᕙᒡᓗᑎᒃ. ᖃᐅᔨᑎᑦᑎᕙᒡᓗᑎᒃ ᐋᓐᓂᕈᑎᐅᑐᐃᓐᓇᕆᐊᓕᖕᓂᒃ ᖃᐅᔨᑐᐊᕌᖓᑕ. ᑕᒪᒃᑯᐊ ᖃᓄᐃᓕᒍᑎᐅᔭᑦᑐᑦ ᐊᑐᕐᓗᒋᑦ ᐅᓗᕆᐊᓇᙱᓐᓇᖅᑐᒥᒃ ᐸᕐᓇᐅᑎᓕᐅᕐᓗᑎᒃ ᐋᓐᓂᖅᑕᐃᓕᒪᑎᑦᑎᓂᖅᒧᑦ.
ᐃᑲᔫᑎᒃᓴᑦ
ᒪᑯᓇᙵᑦ ᑕᑯᔭᐅᖃᑦᑕᕈᓐᓇᖅᑐᓂᒃ ᐊᑭᓐᓇᕐᒥᐅᑕᓂᒃ ᒪᐅᖓ ᐃᓕᓐᓂᐊᕈᑎᒃᓴᓕᕆᓂᕐᒧᑦ, ᐅᑯᐊ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᐃᓪᓕᐅᒃᑯᒫᓂᒃ ᖃᐅᔨᓴᖅᑏᑦ (WSCC) ᐃᑲᔪᕈᑎᒃᓴᖃᖅᑐᑦ ᐃᖅᑲᓇᐃᔭᖅᑎᐅᔪᑦ ᖃᐅᔨᒪᑦᑎᐊᕈᓐᓇᕐᓗᑎᒃ ᑐᓄᒃᑯᑦ ᐋᓐᓂᖅᑕᐃᓕᒪᔾᔪᑎᓂᒃ. ᐃᖅᑲᓇᐃᔭᖅᑎᒋᔭᑎᑦ ᐅᖃᓪᓚᖃᑎᒋᕙᒡᓗᒋᑦ, ᐊᒻᒪᓗ ᐃᖅᑲᓇᐃᔭᖅᑎᐅᔪᑦ ᑕᕐᕆᔭᒐᕐᓂ ᑕᐅᑐᖁᓗᒋᑦ ᐊᒻᒪ ᐊᑐᖃᑦᑕᖁᓗᒋᑦ ᐃᑲᔪᕈᑎᒃᓴᕆᔭᕗᑦ ᑐᑭᒧᐊᕈᑎᓕᐅᕋᓱᒃᑎᓪᓗᑎᒃ ᖃᓄᐃᑦᑕᐃᓕᒪᓂᕐᒧᑦ:
- ᑕᕐᕆᔭᓕᐊᖅ: ᑭᕕᒃᓴᓇᓱᒡᓗᓂ ᐅᓗᕆᐊᓇᙱᑦᑐᒃᑯᑦ – ᑐᓄᒃᑯᑦ ᐋᓐᓂᖅᑕᐃᓕᓂᖅ
- ᑲᓇᑕᒥ ᐱᓕᕆᕝᕕᒃ ᐃᖅᑲᓇᐃᔭᕐᕕᖕᒥᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ (CCOHS) ᐃᑲᔪᕈᑎᒃᓴᐃᑦ:
- ᐃᒃᓯᕚᕐᓂᖅ ᐃᖅᑲᓇᐃᔭᕐᕕᖕᒥᑦ – ᐊᔾᔨᙳᐊᖃᖅᑐᑦ
- ᖃᓄᐃᓕᐅᖓᔾᔪᓯᐅᔪᑦ – ᖃᓄᐃᓕᐅᕈᑎᒃᓴᑦ ᐅᓗᕆᐊᓇᙱᑦᑐᒥ ᖃᓄᐃᑦᑕᐃᓕᑎᑦᑎᓂᕐᒧᓪᓗ ᐱᓕᕆᔾᔪᑎᓂᒃ
- ᑐᓄᒃᑐᑦ ᐋᓐᓂᖅᑕᐃᓕᒪᓂᖅ – ᑐᓴᒐᒃᓴᐃᑦ ᑐᓄᒃᑯ ᐋᓐᓂᖅᑕᐃᓕᒪᓂᖅᒧᑦ ᐱᓕᕆᓗᐊᓕᕐᓂᖅᒨᖓᔪᓄᑦ.
- ᑎᑎᕋᖅᕕᒃᒥᑦ ᑕᓯᓯᕈᑎᒃᓴᓅᖓᔪᑦ – ᑐᓴᒐᒃᓴᐃᑦ ᖃᓄᐃᒻᒪ ᑎᑎᕋᖅᕕᒃᒥᑦ ᑕᓯᓯᕆᐊᖃᕐᓂᖅᒥᒃ ᐊᒻᒪᓗ ᖃᓄᖅ ᑕᓯᓯᑲᑕᒍᑎᒃᓴᐃᑦ.
- ᐊᑦᑕᓇᔾᔭᐃᖅᓯᒪᓂᕐᒧᑦ ᐅᖃᓕᒫᒐᖅ: ᐃᓱᐃᓪᓕᓯᔪᑦ ᐊᒻᒪᓗ ᓄᓱᖕᓂᐅᔪᑦ
- ᐅᓗᕆᐊᓇᖅᑐᖃᕐᒪᖔᑦ ᐅᔾᔨᖅᓲᑎ: ᒪᓂᖃᒥᑦ ᑎᒍᓯᓇᓱᒡᓗᓂ ᑎᒍᓯᑦᑎᐊᙱᓐᓂᕐᒧᑦ ᐋᓐᓂᕈᑏᑦ
- ᐅᓗᕆᐊᓇᖅᑐᓂᒃ ᖃᐅᔨᓴᕐᓂᖅᒧᑦ ᑎᑎᕋᖅᕕᒃᓴᖅ ᐊᒻᒪ ᐅᓇ ᐅᓗᕆᐊᓇᖅᑐᓂᒃ ᖃᐅᔨᓴᕐᓂᖅᒧᑦ ᒪᓕᒋᐊᖃᖅᑐᖅ ᐱᓕᕆᔾᔪᓯᐅᔪᖅ
- ᐃᓐᓇᓵᑦ ᐃᖅᑲᓇᐃᔭᖅᑏᑦ ᓴᓇᕐᕈᑎᒃᑯᕕᖕᒥᑦ ᐅᖃᖃᑎᒌᓐᓂᖅ: ᐱᓕᕆᐊᖃᕐᓂᖅ ᐊᒻᒪ ᑭᕕᒃᓯᑲᑕᖕᓂᖅ ᐃᓕᓴᐃᔨᒧᑦ ᑐᑭᒧᐊᕈᑎ ᐊᒻᒪ ᐃᓕᓐᓂᐊᖅᑎᓄᑦ ᑎᑎᕋᖅᕕᒃ
ᐃᑲᔪᕈᒪᒍᕕᑦ ᐱᐅᓯᕚᓪᓕᖅᑎᑦᑎᓂᕐᒥᒃ ᑭᕕᒃᓯᖃᑦᑕᕈᓯᕆᔭᖕᓂᒃ ᓴᓇᕝᕕᒃᒥ, ᐅᕝᕙᓘᓐᓃᑦ ᐊᐱᖅᑯᑎᒃᓴᖃᕈᕕᑦ ᑐᓄᒃᑯᑦ ᐋᓐᓂᖅᑕᐃᓕᒪᔾᔪᑎᒃᓴᓂᒃ ᐅᑯᓄᖓ ᖃᐅᔨᒋᐊᕐᓗᑎᒃ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᐃᓪᓕᐅᒃᑯᒫᓂᒃ ᖃᐅᔨᓴᖅᑏᑦ (WSCC) ᐅᓪᓗᒥ.