ᐊᖁᓐᓂᖅ ᐅᑭᐅᒃᑯᑦ ᓯᓚᖓᓂ – ᐊᐳᑎ, ᓂᓚᒃ, ᖃᐅᓯᖅ, ᐊᒻᒪ ᓂᓪᓕᓇᖅᑐᖅ – ᐊᔅᓱᕈᕈᑎᖃᖅᑎᑦᑎᔪᑦ ᑕᒪᒃᑭᓐᓄᑦ ᓄᓇᓯᐅᑎᓄᑦ ᐊᒻᒪ ᐊᖁᑎᖏᓐᓄᑦ. ᖃᓂᒋᔭᖏᓐᓃᑦᑐᑦ 30% ᓄᓇᓯᐅᑏᑦ ᐱᓂᕐᓗᑦᑐᑦ ᑲᓇᑕᒥ ᐱᓂᕐᓗᖃᑦᑕᖅᑐᑦ ᐊᐳᑎᕈᔫᑎᓪᓗᒍ ᐊᒻᒪ ᓂᓚᕈᔫᑎᓪᓗᒍ ᐊᑕᕆᐊᖏᑦ. ᒪᓕᑦᑐᒋᑦ ᐃᖏᕋᖃᑦᑕᖅᑐᓄᖅ ᐱᓂᕐᓗᑦᑐᓄᑦ ᑐᑭᓯᒋᐊᕈᑎᓄᑦ ᐊᑐᖅᑕᐅᔪᑦ (TAIS) ᐅᓂᒃᑳᑦ, 5% ᐱᓂᕐᓗᑦᑐᑦ ᐱᓂᕐᓗᖃᑦᑕᖅᑐᑦ ᖃᓐᓂᑎᓪᓗᒍ. ᐱᐅᖏᑦᑐᒥᑦ ᐱᓪᓚᕆᐅᔪᖅ – ᐅᖓᑖᓃᑦᑐᑦ 50,000 ᐱᓂᕐᓗᖃᑦᑕᖅᑐᑦ ᐊᕐᕌᒍᒥ ᐅᑭᐅᒃᑯᑦ ᖃᓐᓂᑎᓪᓗᒍ. ᖃᓂᒋᔭᖏᓐᓃᑦᑐᑦ 40% ᐊᑕᖏᖅᑐᑎ ᐃᖅᑲᓇᐃᔭᓂᕐᒧᑦ ᐊᑦᑐᐊᓂᓖᑦ ᐊᐳᖃᑦᑕᖅᑐᑦ ᓴᖅᑭᑎᑦᑎᓪᓗᑎ ᐋᓐᓂᖅᑐᓂᑦ ᐊᒻᒪ ᐃᖅᑲᓇᐃᔭᕈᓐᓇᖏᓐᓂᕐᒧᑦ ᓴᖅᑭᖃᑦᑕᖅᑐᑦ ᐊᑯᓐᓂᖏᓐᓂ ᓅᕕᐱᕆ ᐊᒻᒪ ᕕᕝᕗᐊᕆ.
ᐅᑭᐅᒃᑯᑦ ᐊᖁᓐᓂᖅ ᐊᔅᓱᕈᓐᓇᕈᓐᓇᖅᑐᖅ ᐃᖅᑲᓇᐃᔭᖅᑎᓄᑦ, ᑕᒃᑭᒃᑎᒍᑦ ᑎᒥᖏᓐᓄᑦ ᖃᓄᐃᖏᑎᐊᕐᓂᖏᓐᓄᑦ ᐊᒻᒪ ᐃᖅᑲᓇᐃᔮᒧᑦ ᐊᑦᑐᐊᓂᓕᓐᓄᑦ ᑲᒪᒋᔭᕆᐊᓕᖏᓐᓂ. ᐅᕝᕙᐅᑯᐊ ᐃᓚᖏᑦ ᐆᑦᑐᕋᐅᑎᐅᔪᑦ ᖃᓄᖅ ᐅᑭᐅᒃᑯᑦ ᐊᑯᓐᓂᒃᑯᑦ ᐊᑦᑐᐃᓂᖃᕈᓐᓇᕐᓂᖏᑦ ᐃᖅᑲᓇᐃᔭᖅᑎᓂᑦ:
- ᐊᒃᑕᓇᕈᑎᑕᖃᒃᑲᓂᖅᑐᑦ ᐱᓂᓗᓐᓂᐅᔪᓄᑦ: ᐅᖃᖅᑕᐅᖅᑲᐅᔪᖅ, ᐊᑦᑕᓇᕈᑎᐅᔪᓐᓇᖅᑐᑦ ᐱᓂᕐᓗᓂᕐᒧᑦ ᐊᖏᔪᒥᑦ ᖁᕝᕙᕆᐊᓪᓗᐊᑲᓪᓚᑦᑐᑦ ᐅᑭᐅᒃᑯᑦ ᐊᖁᑦᑐᓂ. ᖁᐊᓴᐃᑦ ᐊᑐᕆᐊᑦ, ᐊᔅᓴᓗᐊᖏᓐᓂ ᑐᓐᖓᑎᐊᖅᑎᑎᖏᑦᑐᑦ, ᑕᑯᕕᔅᓴᐅᑎᐊᖏᓂᖅᓴᐅᓪᓗᓂ ᖁᑦᑎᓂᖅᓴᐅᔪᓐᓇᖅᑐᑦ ᐊᐳᖃᑦᑕᖅᑐᑦ.
- ᖁᕝᕙᕆᐊᖅᑐᑦ ᑕᖃᓯᒪᓂᕐᒧᑦ ᐊᒻᒪ ᐃᓱᒫᓗᓐᓂᕐᒧᑦ: ᖁᐊᓴᐃᑦ ᐊᑐᕆᐊᑦ, ᑕᑯᕕᔅᓴᐅᑎᐊᖏᓂᖅᓴᐅᔪᑦ, ᐊᒻᒪ ᐱᓂᕐᓗᑦᑐᖃᕈᓐᓇᕐᓂᖓ ᖃᐅᔨᒪᓇᓱᑦᑎᐊᕆᐊᖃᓂᖅᓴᖅ ᐊᒻᒪ ᐊᔭᐅᕆᓪᓗᑎ ᐊᖁᑎᓂᑦ. ᐊᑯᓂᐅᔪᒧᑦ, ᑖᓐᓇ ᐊᑦᑐᐃᓂᖃᕈᓐᓇᖅᑐᖅ ᐃᖅᑲᓇᐃᔭᖅᑎᒧᑦ ᐃᓱᒪᒃᑯᑦ ᖃᓄᐃᖏᑎᐊᓂᕐᒧᑦ. ᐃᖅᑲᓇᐃᔭᕐᕕᒻᒦᓕᖅᑐᓂ, ᑕᖃᓯᒪᓂᐅᔪᖅ ᐱᓕᕆᑎᑦᑎᖏᓐᓂᖅᓴᐅᔪᓐᓇᖅᑐᖅ ᐃᖅᑲᓇᐃᔭᕐᕕᒻᒥ.
- ᐱᑕᖃᕈᓐᓇᕐᓂᖏᑦ ᑭᖑᕙᖅᑐᑦ, ᐸᕕᓴᑦᑕᐅᔪᑦ ᐃᖅᑲᓇᐃᔭᓂᕐᒧᑦ ᐃᓅᓯᕐᒧᑦ ᓇᓕᒧᑦᑎᓐᓂᖏᓐᓄᑦ: ᐊᐳᑎ, ᓂᓚ, ᐊᒻᒪ ᐊᑐᕆᐊᑦ ᐱᐅᖏᑦᑐᑦ ᖃᓄᐃᓐᓂᕆᔭᖏᑦ ᓱᒃᑲᐃᓪᓕᑎᑦᑎᔪᓐᓇᖅᑐᑦ ᐃᖏᕋᖃᑦᑕᖅᑐᓂᑦ ᐊᒻᒪ ᐃᖏᕋᓂᐅᔪᒥᑦ ᐊᑯᓂᐅᓂᖅᓴᐅᑎᑦᑎᓪᓗᓂ. ᑕᒪᓐᓇ ᑐᑭᖃᕈᓐᓇᕐᒥᔪᖅ ᐃᖅᑲᓇᐃᔭᖅᑎ ᐊᓂᓴᕋᐃᒋᐊᖃᖅᑐᖅ ᐊᖏᕋᒥᓂ ᐃᖅᑲᓇᐃᔭᕐᕕᖓᓅᕐᓗᓂ ᑭᖑᕙᖏᓪᓗᓂ, ᐅᕝᕙᓘᓐᓃᑦ ᐊᖏᕋᕐᓇᓵᓂᖅᓴᐅᓗᓂ ᓂᕆᐅᒋᖅᑲᐅᔭᖓᓂ, ᐃᓚᓯᑎᑦᑎᔪᑦ ᐃᖅᑲᓇᐃᔭᓂᕐᒧᑦ ᐃᓅᓯᕐᒧᑦ ᓇᓕᒧᑦᑎᓐᓂᖏᓐᓄᑦ ᐊᔅᓱᕈᕈᑕᐅᔪᓂᑦ.
ᐅᑭᐅᒃᑯᑦ ᐊᖁᓪᓗᓂ ᖃᓄᐃᓕᓂᖃᖅᑎᑎᑦᑕᐃᓕᓂᕐᒧᑦ
ᐃᖅᑲᓇᐃᔭᖅᑎᖁᑎᓕᐅᑉ ᐱᔭᒃᓴᕆᔭᖏᑦ
ᐃᖅᑲᓇᐃᔭᖅᑎᑦᑎᔪᑦ ᑲᒪᒋᔭᖃᖅᑐᑦ ᐃᖅᑲᓇᐃᔭᖅᑏᑦ ᐊᑦᑕᓇᐃᖅᓯᒪᑎᓪᓗᒋᑦ – ᑖᓐᓇ ᐱᖃᓯᐅᔾᔨᔪᖅ ᖃᖓᑐᐃᓐᓇᒃᑯᑦ ᐊᖁᑦᑎᓪᓗᒋᑦ ᓄᓇᓯᐅᒻᒥᑦ ᐃᓚᒋᓪᓗᓂᐅᒃ ᐃᖅᑲᓇᐃᔮᕆᒋᐊᓕᖏᓐᓄᑦ.
ᓄᓇᓯᐅᑦ ᒪᑭᒪᑎᑕᐅᓂᖓ
ᓄᓇᓯᐅᑏᑦ ᓴᓇᔭᐅᖃᑦᑕᕋᔪᑦᑐᑦ ᐊᑦᑎᓪᓕᒋᐊᖅᑎᑦᑎᔪᑦ ᐊᑦᑕᓇᕈᑎᐅᔪᓐᓇᖅᑐᓂᑦ ᖃᓄᐃᓕᑳᓪᓚᓂᕐᒧᑦ ᐅᕝᕙᓘᓐᓃᑦ ᐱᓂᕐᓗᓂᕐᒧᑦ ᐊᖁᑦᑎᓪᓗᒋᑦ – ᐱᓗᐊᖅᑐᒥ ᐅᑭᐅᒃᑯᑦ ᓯᓚᖓᓂ. ᖃᓄᐃᑦᑐᑐᐃᓐᓇᐃᑦ ᐃᖅᑲᓇᐃᔮᒧᑦ ᐅᕝᕙᓘᓐᓃᑦ ᐃᖅᑲᓇᐃᔭᕐᕕᒻᒧᑦ ᓄᓇᓯᐅᑎᖏᑦ ᐊᐅᓚᓂᖃᑦᑎᐊᕐᓗᑎ, ᐊᒻᒪ ᐅᑭᐅᓚᐅᖅᑎᓐᓇᒍ ᖃᐅᔨᓴᖅᑕᐅᓂᖃᕐᓗᑎ. ᑖᓐᓇ ᐱᖃᓯᐅᔾᔨᔪᓐᓇᖅᑐᑦ ᐊᓯᔾᔨᕐᓗᒋᑦ ᐃᒐᓛᖏᓐᓄᑦ ᐊᓪᓚᓯᔾᔪᑎᖏᑦ, ᐅᑭᐅᖅᓯᐅᑎᓂᑦ ᐊᔅᓴᓗᐊᓕᕐᓗᒋᑦ, ᐊᒻᒪ ᖃᐅᔨᒋᐊᕐᓗᒍ ᓄᓇᓯᐅᑎᒧᑦ ᐹᑕᓖᖏᑦ ᐃᓱᓕᔅᓯᒪᖏᒃᑲᓗᐊᕐᒪᖔᑕ.
ᐃᖅᑲᓇᐃᔭᕐᕕᕕᑦ ᓄᓇᓯᐅᑎᖏᑦ ᐱᖃᓯᐅᔾᔨᓯᒪᕚᑦ ᑐᐊᕕᕐᓇᑐᖅᓯᐅᑎᓂᑦ? ᐅᓇ ᓇᕿᓪᓗᒍ ᑎᑎᕋᖅᓯᒪᔪᓄᑦ ᐃᕝᕕᑦ ᓄᓇᓯᐅᑎᖓᓄ ᑭᓱᓂᑦ ᐱᖃᓯᐅᔾᔨᒋᐊᖃᕐᓂᖏᓐᓄᑦ ᑐᐊᕕᕐᓇᑐᖅᓯᐅᑎᓂᑦ.
ᐊᑦᑕᓇᕈᑎᐅᔪᓐᓇᖅᑐᓂᑦ ᖃᐅᔨᓴᕈᑎ
ᐅᑭᐅᒃᑯᑦ ᐊᖁᓐᓂᕐᒧᑦ ᐊᑦᑕᓇᕈᑎᐅᔪᓐᓇᖅᑐᑦ ᐃᑉᐱᒋᔭᐅᔭᕆᐊᓖᑦ ᐊᓯᖏᑎᑐᑦ ᐃᖅᑲᓇᐃᔭᕐᕕᒻᒥ ᐊᑦᑕᓇᐃᖅᓯᒪᓂᕐᒧᑦ ᐊᑦᑕᓇᕈᑎᐅᔪᓐᓇᖅᑐᑦ. ᐱᔭᕇᖅᓯᓗᓂ ᐅᑭᐅᒃᑯᑦ ᐊᖁᓂᕐᒧᑦ ᐊᑦᑕᓇᕈᑎᐅᔪᓐᓇᖅᑐᓂᑦ ᖃᐅᔨᓴᓂᕐᒥᑦ, ᓇᓗᓇᐃᖅᓯᒍᓐᓇᓂᐊᖅᑐᑎᑦ, ᖃᐅᔨᓴᕐᓗᑎ, ᐊᒻᒪ ᐲᕐᓗᒋᑦ ᐅᕝᕙᓘᓐᓃᑦ ᐊᐅᓚᓗᒋᑦ ᐅᑭᐅᒃᑯᑦ ᐊᖁᓐᓂᕐᒧᑦ ᐊᑦᑐᐊᓂᓕᓐᓂᑦ ᐊᑦᑕᓇᕈᑎᐅᔪᓐᓇᖅᑐᓂᑦ ᐃᖅᑲᓇᐃᔭᖅᑎᓄᑦ ᓵᓐᖓᒍᓐᓇᖅᑕᖏᓐᓂ. ᓇᓂᓗᒋᑦ ᑭᓱᓕᕆᔾᔪᑏᑦ ᖃᓄᖅ ᐱᔭᕇᖅᑕᐅᓗᑎ ᐊᑦᑕᓇᕈᑎᐅᔪᓐᓇᖅᑐᓂᑦ ᖃᐅᔨᓴᓂᕐᒧᑦ (ᐊᒻᒪ ᐊᒥᓱᒃᑲᓐᓃᑦ) ᐅᕙᓂ.
ᓴᖅᑭᑎᑦᑎᓗᑎ ᐅᑭᐅᒃᑯᑦ ᐊᖁᓐᓂᕐᒧᑦ ᐊᑐᐊᒐᕐᓂᑦ ᐊᒻᒪ ᐊᑐᖅᑕᐅᔭᕆᐊᓕᓐᓂᑦ
ᑐᑭᓯᑐᐊᕈᕕᒋ ᐊᑦᑕᓇᖅᑐᑦ ᐊᒻᒪ ᐊᑦᑕᓇᕈᑎᐅᔪᓐᓇᖅᑐᑦ ᐊᑦᑐᐊᓂᓖᑦ ᖃᓄᐃᑦᑑᓂᖓᓄᑦ ᐊᖁᓂᕐᒧᑦ ᐱᓕᕆᐊᖑᒋᐊᓖᑦ ᐃᕝᕕᑦ ᐃᖅᑲᓇᐃᔭᕐᕕᖓᓂ, ᐋᖅᑭᔅᓯᓗᑎᑦ ᐊᑦᑕᓇᐃᖅᓯᒪᓂᕐᒧᑦ ᐊᑐᐊᒐᖏᓐᓂ ᐱᓕᕆᐊᕆᔭᐅᓗᑎ. ᕿᒥᕐᕈᖃᑦᑕᕐᓗᒋᑦ ᐅᑭᐅᒃᑯᑦ ᐊᖁᓐᓂᕐᒧᑦ ᐊᑐᐊᒐᖏᑦ ᐃᖅᑲᓇᐃᔭᖅᑎᓄᑦ ᐊᕐᕌᒍᑕᒫᑦ ᐅᑭᐅᖅ ᐱᒋᐊᓕᖅᑎᓪᓗᒍ ᐊᒻᒪ ᖃᓄᐃᓕᔪᖃᕐᓂᕈᓂ ᐊᑦᑐᐊᓂᓕᓐᓄᑦ ᐅᑭᐅᒃᑯᑦ ᐊᖁᓐᓂᕐᒧᑦ.
ᑐᐊᕕᕐᓇᖅᑐᓕᕆᔨᓄᑦ ᐱᓕᕆᐊᖑᔪᑦ
ᐃᖅᑲᓇᐃᔭᖅᑏᑦ ᑐᑭᓯᑦᑎᐊᓂᐊᖅᑯᑦ ᖃᓄᐃᓘᕆᐊᖃᕐᓂᖏᓐᓄᑦ ᐃᓚᒋᔭᐅᓐᓂᕈᑎ ᓄᓇᓯᐅᑎᒧᑦ ᐱᓂᕐᓗᑦᑐᓄᑦ, ᐅᕝᕙᓘᓐᓃᑦ ᓄᓇᓯᐅᑏᑦ ᐊᑐᖅᑕᖏᑦ ᐃᖏᕋᔪᓐᓇᐃᓕᓐᓂᕈᑎ.
ᐃᓕᓐᓂᐊᑎᑦᑎᓂᖅ ᐊᒻᒪ ᐃᓕᓐᓂᐊᕐᓂᓕᕆᓂᕐᒧᑦ
ᖃᐅᔨᓴᕐᓗᒋᑦ ᐃᖅᑲᓇᐃᔭᖅᑏᑦ ᐅᑭᐅᒃᑯᑦ ᐊᖁᒍᓐᓇᕐᓂᖏᓐᓄᑦ ᐊᑐᐃᓐᓇᐅᓂᐊᕐᒪᖓ ᐊᑦᑕᓇᖏᑦᑐᒥᑦ ᐊᖁᓪᓗᑎ ᓄᓇᓯᐅᒻᒥᑦ ᐅᑭᐅᒃᑯᑦ ᖃᓄᐃᓐᓂᕆᔭᖏᓐᓂ. ᐊᖁᑎᐅᓂᕐᒧᑦ ᐃᓕᓐᓂᐊᑲᓐᓂᕆᐊᖃᕈᑎ, ᐃᓕᓐᓂᐊᖅᑎᑕᐅᓗᑎ ᐊᖁᓚᐅᖅᑎᓐᓇᒋᑦ ᐃᖅᑲᓇᐃᔭᕐᕕᒻᒧᑦ. ᐊᔪᕆᖅᓱᐃᑎᓗᒋᑦ ᐃᖅᑲᓇᐃᔭᖅᑏᑦ ᖃᓄᖅ ᑲᐃᕙᓪᓗᒍ ᖃᐅᔨᓴᓂᕐᒥᑦ, ᐃᖏᕋᓯᓚᐅᖅᑎᓐᓇᒋᑦ ᖃᐅᔨᓴᓂᕐᒥᑦ – ᑖᓐᓇ ᐱᖃᓯᐅᔾᔨᔪᖅ ᐊᐳᑏᔭᐃᓪᓗᓂ ᐅᕝᕙᓘᓐᓃᑦ ᓂᓚᐃᔭᐃᓪᓗᓂ ᐃᒐᓛᖏᓐᓂ.
ᓴᓇᔨᐅᑉ ᐱᔭᒃᓴᕆᔭᖏᑦ
ᐃᖅᑲᓇᐃᔭᖅᑏᑦ ᒪᓕᒋᐊᖃᖅᑐᑦ ᖃᓄᐃᑦᑐᑐᐃᓐᓇᕐᓂ ᐅᑭᐅᒃᑯᑦ ᐊᖁᓐᓂᕐᒧᑦ ᐊᑐᐊᒐᕐᓂᑦ ᐊᒻᒪ ᐊᑐᖅᑕᐅᔭᕆᐊᓕᓐᓂᑦ ᐃᖅᑲᓇᐃᔭᕐᕕᒦᑦᑐᓂᑦ. ᐊᑦᑕᓇᖏᒃᑯᓂ ᐊᖁᓪᓗᒍ, ᖃᐅᔨᒪᑦᑎᐊᕐᓗᒋᑦ ᐱᒋᐊᕐᓂᖃᕐᓗᑎ ᓄᓇᓯᐅᑎᒥᑦ ᖃᐅᔨᓴᓂᕐᒥᑦ ᐊᒻᒪ ᑲᐃᕙᓪᓗᒍ ᖃᐅᔨᓴᕐᓗᒍ ᐃᖏᕋᓯᓚᐅᖅᑎᓐᓇᒋᑦ. ᓄᓇᓯᐅᑎᒥᑦ ᐊᖁᓕᑐᐊᕈᑎ, ᐃᖅᑲᓇᐃᔭᖅᑏᑦ ᑲᒪᒋᔭᖃᖅᑐᑦ ᐅᑯᓄᖓ:
ᐊᖁᑦᑐᓂ ᓱᑲᓐᓂᖓ ᐊᒻᒪ ᐅᖓᓯᓐᓂᖓ: ᓱᒃᑲᐃᓪᓕᒋᐊᕐᓗᓂ ᐊᒻᒪ ᐅᖓᓯᓪᓕᒋᐊᕐᕕᒋᓗᒍ ᐅᖓᓯᓐᓂᖓ. ᐊᑯᓂᐅᓂᖅᓴᖅ ᓄᖅᑲᕋᓱᐊᓲᑦ ᓂᓚᕈᔪᒃᑯᑦ ᐊᑐᕆᐊᒃᑯᑦ. ᐃᖏᕋᔮᓕᑲᓪᓚᑦᑕᐃᓕᓗᑎᑦ, ᓱᒃᑲᐃᓪᓕᑳᓪᓚᑦᑕᐃᓕᓗᑎ, ᐊᒻᒪ ᓴᖑᑳᓪᓚᑦᑕᐃᓕᓗᑎ.
ᓄᖅᑲᑳᓪᓚᐅᑎᖓᓄ ᐊᑐᖅᑕᐅᔪᓐᓇᖅᑐᑦ: ᓇᕿᕋᔮᕐᓗᒍ ᐊᒻᒪ ᓇᕿᑉᐸᓪᓕᐊᓗᒍ ᓄᖅᑲᑳᓪᓚᐅᑎᖓ ᑎᓱᑎᑦᑕᐃᓕᓗᒍ.
ᐃᖏᕋᔮᕐᓂᖓᓄᑦ ᐊᐅᓚᔾᔪᑎᖓ ᐊᑐᖅᑕᐅᖏᑦᑐᖅ: ᐊᑐᖅᑕᐅᓕᓗᒍ ᐃᖏᕋᔮᕐᓂᖓᓄᑦ ᐊᐅᓚᔾᔪᑎᖓ ᓂᓚᕈᔪᒃᑯᑦ ᐅᕝᕙᓘᓐᓃᑦ ᐊᐳᑎᕈᔪᒃᑯᑦ ᐊᑐᕆᐊᒃᑯᑦ. ᓇᒻᒥᓂᖅ ᐊᑕᖏᕐᓗᒍ ᐊᐅᓚᓗᒍ ᓄᓇᓯᐅᑏᑦ.
ᖃᓄᐃᓕᓯᒋᐊᕐᓂᐅᔪᑦ ᐱᓂᕐᓗᑦᑐᓄᑦ ᐅᕝᕙᓘᓐᓃᑦ ᐃᖏᕋᔪᓐᓇᐃᓪᓕᔪᓄᑦ: ᐱᓂᕐᓗᑦᑐᖃᕈᓂ, ᐃᖅᑲᓇᐃᔭᖅᑏᑦ ᒪᓕᒋᐊᖃᖅᑐᑦ ᑐᐊᕕᕐᓇᖅᑐᓄᑦ ᐊᑐᖅᑕᐅᔭᕆᐊᓕᓐᓂᑦ.
ᐊᑐᖅᑕᐅᔭᕆᐊᓕᐅᖅᑐᓂ ᐊᒻᒪ ᒪᓕᑦᑐᒋᑦ ᐅᑭᐅᒃᑯᑦ ᐊᖁᓐᓂᕐᒧᑦ ᐊᑦᑕᓇᖏᑦᑐᒥ ᐊᑐᖅᑕᐅᔭᕆᐊᓕᓐᓂᑦ, ᐊᖏᔪᒥᑦ ᐊᑦᑎᓪᓕᒋᐊᖅᑎᑦᑎᔪᓐᓇᖅᑐᑎ ᐊᑦᑕᓇᕈᑎᐅᔪᓐᓇᖅᑐᓂᑦ ᐊᑦᑐᐊᓂᓕᓐᓄᑦ ᐅᑭᐅᒃᑯᑦ ᓯᓚᖓᓂ ᐊᖁᓐᓂᕐᒧᑦ ᖃᓄᐃᓐᓂᕆᔭᖏᓐᓂ. ᐃᖅᑲᐅᒪᓂᐊᖅᑯᑎᑦ, ᐊᑦᑕᓇᐃᖅᓯᒪᓂᖅ ᓯᕗᓪᓕᐅᔾᔭᐅᖏᓐᓇᕆᐊᓕᒃ. ᑐᓴᐅᒪᖃᑎᒋᖃᑦᑕᕐᓗᒋᑦ ᐃᖅᑲᓇᐃᔭᖃᑎᑎᑦ, ᐊᒻᒪ ᐸᕐᓇᓯᒪᓗᑎᑦ ᓄᖅᑲᑎᓪᓗᒍ ᐃᖅᑲᓇᐃᔮᒧᑦ ᐊᑦᑐᐊᓂᓕᓐᓄᑦ ᐃᖏᕋᓂᐅᔪᓄᑦ ᖃᓄᐃᓐᓂᕆᔭᖏᑦ ᐊᑦᑕᓇᕈᑎ. ᖃᐅᔨᒪᓇᓱᑦᑎᐊᖏᓐᓇᕐᓗᑎᑦ, ᐸᕐᓇᓯᒪᓗᑎᑦ, ᐊᒻᒪ ᐊᑦᑕᓇᐃᖅᓯᒪᐃᓐᓇᕐᓗᑎᑦ ᐊᑐᕆᐊᓂᑦ ᑕᒪᑐᒪᓂ ᐅᑭᐅᒥ.
ᐃᑲᔪᕈᑎᒃᓴᐃᑦ
ᑲᓇᑕᒥ ᐱᓕᕆᕝᕕᒃ ᐃᖅᑲᓇᐃᔭᕐᕕᖕᒥᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ ᖃᕋᓴᐅᔭᑯᑦ ᑐᑭᓯᒋᐊᕐᕕᖃᖅᑐᑦ ᑐᑭᓯᒋᐊᕈᑎᐅᒐᔪᑦᑐᓄᑦ ᐅᑯᓄᖓ ᐊᖁᓐᓂᖅ ᐅᑭᐅᒃᑯᑦ. ᐱᖃᓯᐅᔾᔨᔪᑦ ᑐᑭᓯᒋᐊᕈᑎᓂᑦ ᐸᕐᓇᓂᕐᒧᑦ ᐊᖁᓪᓕᓂ ᐅᑭᐅᒃᑯᑦ ᖃᓄᐃᓐᓂᕆᔭᖏᓐᓂ.
ᐊᖁᓐᓂᕐᒧᑦ ᐸᕐᓇᓯᒪᓂᕐᒧᑦ ᐃᑲᔫᑎᒃᑲᓂᕐᓂᑦ, ᑕᑯᓗᒋᑦ ᐅᓇ ᖃᕋᓴᐅᔭᒃᑯᑦ ᑐᑭᓯᒋᐊᕐᕕᖓ ᑲᓇᑕᐅᑉ ᒐᕙᒪᒃᑯᖏᓐᓂ.