ᑐᓂᓯᓯᒪᓕᕈᕕᑦ ᖁᕝᕙᓯᒃᑐᒥᒃ ᐅᓗᕆᐊᓇᕈᓐᓇᖅᑐᓂᒃ ᐱᓕᕆᓂᕐᒧᑦ ᖃᐅᔨᒃᑲᐃᔾᔪᑎᒥᒃ ᐊᑐᕐᓗᒍ WSCC Connect, ᖃᐅᔨᒃᑲᐃᔾᔪᑎᒥᒃ ᖃᕆᓴᐅᔭᒃᑯᑦ ᐃᕐᖐᓐᓈᖅᑕᐅᑎᒃᑯᑦ ᑎᑎᕋᕐᕕᐅᓂᐊᖅᑐᑎᑦ, ᐱᖃᓯᐅᔾᔨᓯᒪᓂᐊᖅᑐᑦ ᖁᕝᕙᓯᒃᑐᒥᒃ ᐅᓗᕆᐊᓇᕈᓐᓇᖅᑐᓂᒃ ᐱᓕᕆᓂᕐᒧᑦ ᖃᐅᔨᒃᑲᐃᔾᔪᑎᒧᑦ ᓈᓴᐅᑎᒥᒃ. ᐱᓕᕆᐊᑦ ᐱᒋᐊᕐᕕᒃᓴᖓ ᑎᑭᒃᑯᓂ, ᐅᓄᖅᑐᓕᐅᕐᓗᒍ ᑖᓐᓇ ᖃᐅᔨᒃᑲᐃᔾᔪᑎ ᐊᒻᒪᓗ ᓴᖅᑭᔮᖅᑎᓪᓗᒋᑦ ᐃᖅᑲᓇᕐᔭᕐᕕᒃᐱᑦ ᑐᓴᒐᒃᓴᖃᕐᕕᖓᓂ. ᐃᒪᓐᓈᖅᑐᐃᖕᒥᔪᒍᑦ ᑐᓂᓗᒍ ᐊᔾᔨᖓ ᖃᕆᓴᐅᔭᒃᑯᑦ ᐅᕝᕙᓘᓐᓃᑦ ᐅᓄᖅᑐᓕᐅᖅᓯᒪᔪᑎᒍᑦ ᐊᔾᔨᖓ.
ᖃᓄᑐᐃᓐᓇᖅ ᓄᑖᙳᕆᐊᕆᔭᕆᐊᖃᕈᕕᑦ ᖃᐅᔨᒃᑲᐃᔾᔪᑎᖕᓄᑦ (ᓲᕐᓗ ᐊᓯᔾᔨᕐᓗᒍ ᐱᓕᕆᐊᑉ ᐃᓱᓕᕝᕕᒃᓴᖓ), ᐃᓯᕐᓗᑎᑦ ᑕᐃᑯᖓ WSCC Connect ᐊᒻᒪ ᐅᒃᑯᐃᕐᓗᒍ ᖁᕝᕙᓯᒃᑐᒥᒃ ᐅᓗᕆᐊᓇᕈᓐᓇᖅᑐᓂᒃ ᐱᓕᕆᓂᕐᒧᑦ ᖃᐅᔨᒃᑲᐃᔾᔪᑎᓄᑦ ᐱᓕᕆᔾᔪᑎ. ᑕᐃᑲᓂ, ᓇᓂᓯᓂᐊᖅᑐᑎᑦ ᑎᑎᕋᖅᓯᒪᔪᓂᒃ ᑭᖑᓂᖔᑦᑎᓐᓂ ᐊᒻᒪ ᒫᓐᓇ ᖃᐅᔨᒃᑲᐃᔾᔪᑎᓂᒃ ᓇᖕᒥᓂᖁᑎᖕᓄᑦ. ᐅᒃᑯᐃᕐᓗᒍ ᖃᐅᔨᒃᑲᐃᔾᔪᑎ ᐋᖅᑭᒋᐊᕈᒪᔭᑦ, ᐊᓯᔾᔨᕆᐊᓖᑦ ᐊᓯᔾᔨᕐᓗᒋᑦ, ᐊᒻᒪ ᓇᖁᓪᓗᒍ “save” (ᐃᓕᓯᒪᐃᓐᓇᓕᕐᓕ). ᑐᓂᔭᐅᓂᐊᖅᑐᑎᑦ ᖃᐃᔨᒃᑲᐃᔾᔪᑎᒥᒃ ᖃᕆᓴᐅᔭᒃᑯᑦ ᐃᕐᖐᓐᓈᖅᑕᐅᑎᒃᑯᑦ ᓄᑖᙳᕆᐊᖅᑕᕐᓄᑦ. ᐅᓄᖅᑐᓕᐅᕐᓗᒋᑦ ᖃᓄᑐᐃᓐᓇᖅ ᓄᑖᙳᕆᐊᖅᑕᑎᑦ ᓴᖅᑭᓪᓗᒋᓪᓗ ᖃᕆᓴᐅᔭᒃᑯᑦ ᖃᐅᔨᒃᑲᐃᔾᔪᑎ ᐱᖃᓯᐅᑎᓗᒍ ᖃᐅᔨᒃᑲᐃᔾᔪᑎᐅᕐᖓᓚᐅᖅᑐᖅ.
ᐱᓕᕆᐊᑉ ᐃᓱᓕᕝᕕᐊ
ᑐᓂᔭᐅᓂᐊᖅᑐᑎᑦ ᖃᕆᓴᐅᔭᒃᑯᑦ ᐃᕐᖐᓐᓈᖅᑕᐅᑎᒃᑯᑦ ᖃᐅᔨᒃᑲᐃᔾᔪᑎᒥᒃ ᑕᓪᓕᒪᑦ ᐃᖅᑲᓇᐃᔭᕐᓇᑦ ᐅᓪᓗᐃᑦ ᐃᓱᓕᖅᑳᖅᑎᓐᓇᒍ ᐱᓕᕆᐊᑦ. ᐱᓕᕆᐊᖅ ᓱᓕ ᐱᓕᕆᐊᖑᒍᓂ, ᐱᒻᒪᕆᐅᔪᖅ ᐃᓯᕐᓗᑎᑦ WSCC Connect ᐊᒻᒪ ᓄᑖᙳᕆᐊᕐᓗᒍ ᕿᓚᒻᒥᐅᓛᒃᑯᑦ, ᐋᖅᑭᒋᐊᒃᑲᓐᓂᕈᓐᓇᐃᓪᓕᓂᐊᕋᖕᓂ ᐅᖃᖅᑕᐃᓯᒪᔪᖅ ᐃᓱᓕᕝᕕᒃ ᐅᓪᓗᖅ ᑎᑭᓯᒪᓕᕈᓂ.
ᑭᖑᓪᓕᖅᐹᖅ ᖃᐅᔨᒃᑲᐃᔾᔪᑎ ᖃᕆᓴᐅᔭᒃᑯᑦ ᐃᕐᖐᓐᓈᖅᑕᐅᑎᒃᑯᑦ ᐱᓕᕆᐊᑦ ᐃᓱᓕᒃᑯᓂ ᐅᓪᓗᐊ ᖄᖏᖅᓯᒪᓕᕈᓂ. ᑕᐃᒪᓕ ᐱᓕᕆᐊᑦ ᑲᔪᓯᕙᓪᓕᐊᖑᒍᓂ ᓱᓕ, ᑐᓂᓯᔭᕆᐊᖃᕐᓂᐊᖅᑐᑎᑦ ᓄᑖᒥᒃ ᖁᕝᕙᓯᒃᑐᒥᒃ ᐅᓗᕆᐊᓇᕈᓐᓇᖅᑐᓂᒃ ᐱᓕᕆᓂᕐᒧᑦ ᖃᐅᔨᒃᑲᐃᔾᔪᑎ, ᓴᖅᑮᓂᐊᖅᑐᑦ ᐱᓕᕆᐊᒧᑦ ᑭᖑᕙᕆᐊᕈᑎᓂᒃ.