ᑎᒥᒧᑦ ᐃᓗᐊᖅᓯᔾᔪᑏᑦ ᐱᕐᕈᓗᐊᕿᑦᑕᐃᓕᓂᕐᒧᑦ ᐅᖃᐅᓯᐅᕙᒃᑐᖅ ᐊᒃᑐᐃᓯᒪᓂᖓᓄᑦ ᐃᖅᑲᓇᐃᔭᖅᑎᓕᒫᓂᒃ, ᖃᓄᐃᑦᑑᒐᓗᐊᖅᐸᑦ ᐃᖅᑲᓇᐃᔮᕆᔭᐅᔪᖅ ᐃᖅᑲᓇᐃᔭᕐᕕᐅᔪᕐᓘᓐᓃᑦ. ᐃᒥᒧᑦ ᐃᓗᐊᖅᓯᔾᔪᑎᓂ ᐊᑐᖃᑦᑕᕐᓗᓂ ᐃᖅᑲᓇᐃᔮᒧᑦ ᓈᒻᒪᒃᑐᓂ ᐊᒻᒪ ᐱᓕᕆᐊᕆᔭᔪᑦ ᑕᐃᒪᓕ ᐱᕐᕈᓗᐊᕿᓐᓇᙱᓐᓂᕐᓴᐅᕙᒃᑐᖅ. ᑎᒥᒧᑦ ᐃᓗᐊᖅᓯᔾᔪᑎᓂ ᐊᑐᖃᑦᑕᕐᓂᖅ ᐱᒻᒪᕆᐊᓗᒃ ᐃᖅᑲᓇᐃᔭᖅᑐᒧᑦ ᐅᖁᒪᐃᑦᑐᓂᒃ ᓴᓇᔾᔪᑎᓂᒃ ᐊᑐᖃᑦᑕᖅᑐᓂᒃ ᒪᑯᓄᖓᓗᑦ ᑎᑎᕋᖅᕕᒃᒥᑦ ᐃᖅᑲᓇᐃᔭᖅᑎᓄᑦ ᐃᒃᓯᕚᖃᑦᑕᕆᐊᓕᖕᓄᑦ ᐃᑲᕐᕋᒐᓴᖕᓄᑦ.
ᖁᑦᑎᓛᖑᔪᑦ ᐱᖓᓱᑦ ᐃᖅᑲᓇᐃᔭᕐᕕᒃᒥ ᑎᒥᒃᑯᑦ ᐋᓐᓂᕈᑎᐅᕙᒃᑐᑦ ᓄᓇᑦᓯᐊᕐᒥ ᐊᒻᒪ ᓄᓇᕗᒥᑦ ᐅᑯᐊᖑᔪᑦ:
- ᒐᕙᒪᒃᑯᓐᓄᑦ ᑲᑐᔾᔨᖃᑎᒌᒃᑐᑦ
- ᓂᐅᕕᕐᕕᓕᕆᓂᕐᒧᑦ ᐃᖅᑲᓇᐃᔭᖅᕕᐅᔪᑦ ᐊᒻᒪᓗ ᐃᓄᖕᓂ ᑲᒪᒋᔭᖃᖅᑎᐅᕙᒃᑐᑦ
- ᐃᒡᓗᓕᐅᕐᓂᖅ ᐊᒻᒪ ᐃᖅᑲᓇᐃᔮᓂ
ᑎᒥᒧᑦ ᐋᓐᓂᕈᑎᐅᔭᑦᑐᑦ ᒪᑯᐊᖑᕙᒃᑐᑦ ᐅᕐᕈᐊᖅᓯᓂᒃᑯᑦ, ᑕᓯᒍᔾᔨᓂᒃᑯᑦ ᓄᑭᖕᓂ, ᑭᓕᕐᓂᖅ ᐊᒻᒪ ᓄᑭᒃᑯᑦ ᐱᐅᔪᓐᓃᕐᓂᖅ. ᐅᑯᐊ ᐋᓐᓂᕈᑎᐅᔭᑦᑐᑦ ᐋᓐᓂᐊᑲᑕᖕᓇᖅᖢᑎᒃ, ᐳᕕᓕᕈᑎᐅᔭᖢᑎᒃ, ᐃᒃᐱᒍᓱᑦᑎᐊᕈᓐᓃᕐᓇᖅᖢᑎᒃ, ᑲᑭᓚᓈᕐᓯᑲᑕᖕᓇᖅᖢᓂ, ᑕᐅᑐᖕᓂᕐᓗ ᐱᓕᕆᓇᓱᖕᓂᕐᓗ ᓈᒪᒍᓐᓃᖅᖢᑎᒃ, ᐊᒻᒪᓗ ᓴᙲᓕᕐᓇᖅᖢᓂ ᑐᓄᒃᑯᑦ, ᐊᒡᒐᒃᑯᑦ ᐊᒻᒪ ᑕᓕᒃᑯᑦ ᑐᐃᒃᑯᓪᓗ ᐊᒻᒪ ᖁᖓᓯᒃᑯᑦ.
ᐱᔭᒃᓴᕆᔭᖏᑦ
ᐅᓄᕈᓐᓃᖅᑎᑕᐅᓇᓱᒡᓗᑎᒃ ᐊᒻᒪᓗ ᐃᖅᑲᓇᐃᔮᕆᔭᐅᔪᑦ ᓈᒻᒪᒃᑲᓗᐊᕐᒪᖔᑕ ᐃᖅᑲᓇᐃᔭᖅᑎᓄᑦ. ᐃᖅᑲᓇᐃᔭᖅᑎᑦᑎᔪᐃᓪᓗ ᐊᒻᒪ ᐃᖅᑲᓇᐃᔭᖅᑎᐅᔪᑦ ᑲᒪᒋᔭᒃᓴᖏᑦ ᐅᕘᓇᑦ ᓄᓇᑦᓯᐊᕐᒥ ᐊᒻᒪ ᓄᓇᕗᒥᑦ ᐃᖅᑲᓇᐃᔭᕐᕕᖕᒥᑦ ᐋᓐᓂᐊᖃᖅᑕᐃᓕᒪᓂᕐᒥᑦ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ ᐱᖁᔭᖏᑦ ᑎᑎᕋᖅᑕᐅᓯᒪᔪᑦ ᐊᑖᒍᑦ.
ᐃᖅᑲᓇᐃᔭᖅᑎᑦᑎᔨᐅᔪᑦ ᐃᒪᐃᑦᑕᕆᐊᖃᖅᑐᑦ:
- ᕿᒥᕐᕈᐊᖅᐸᒡᓗᒍ ᐃᖅᑲᓇᐃᔭᖅᕕᒃᒥ ᖃᓄᐃᓕᐅᕐᓂᐅᔪᑦ ᐃᖅᑲᓇᐃᔭᖅᕕᒋᔭᕐᓂ ᐃᖅᑲᓇᐃᔭᖅᑎᓄᑦ ᖁᐊᕐᓵᕐᓇᕋᔭᖅᑐᓂᒃ ᑎᒥᒧᑦ ᐃᖅᑲᓇᐃᔭᖅᑎᓄᑦ. ᖃᐅᔨᒪᑎᖃᑦᑕᕐᓗᒋ ᐃᖅᑲᓇᐃᔭᕐᕕᖕᒥᑦ ᐋᓐᓂᐊᖃᖅᑕᐃᓕᒪᓂᕐᒥᑦ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ ᑲᑎᒪᔨᕋᓛᑦ, ᐃᖅᑲᓇᐃᔭᕐᕕᖕᒥᑦ ᐋᓐᓂᐊᖃᖅᑕᐃᓕᒪᓂᕐᒥᑦ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ ᑭᒡᒐᖅᑐᐃᔨ ᐊᒻᒪᓗ ᐃᖅᑲᓇᐃᔭᖅᑐᑦ ᖃᐅᔨᓴᕐᓂᕐᒧᑦ ᐃᓚᐅᑎᑉᐸᒡᓗᒋᑦ.
- ᑐᓴᐅᒪᑎᑦᑎᓗᑎ, ᖃᓄᐃᓕᐅᕈᑎᒃᓴᓂᒡᓗ ᐊᒻᒪ ᐊᔪᕈᓐᓃᖅᓴᖅᑎᑦᑎᕙᒡᓗᒋᑦ ᐃᖅᑲᓇᐃᔭᖅᑎᐅᔪᑦ ᑎᒥᒧᑦ ᐋᓐᓂᐊᕈᑎᐅᓕᕈᓐᓇᖅᑐᓂᒃ ᐊᒻᒪ ᐅᓗᕆᐊᓇᙱᔾᔪᑎᐅᔪᓐᓇᖅᑐᓂᒃ ᐃᖅᑲᓇᐃᔭᖅᕕᒋᔭᐅᔪᓂᒃ.
- ᐱᓕᕆᔾᔪᑎᖃᖅᑎᑦᑎᓗᑎ ᐋᖅᑭᒃᓯᒪᔪᓂᒃ, ᓴᓇᓯᒪᔪᓂ, ᐃᓂᓕᐅᕐᓯᒪᔪᓂᒃ ᐊᒻᒪᓗ ᑲᒪᒋᔭᐅᔪᓐᓇᕐᓗᓂ ᐃᖅᑲᓇᐃᔭᖅᑎᐅᔪᑦ ᑎᒥᒧᑦ ᐋᓐᓂᐊᓕᕈᑎᐅᔭᑦᑐᓂ ᐱᑕᖃᙱᓐᓂᕐᓴᐅᑎᓐᓇᓱᒡᓗᒍ.
- ᐊᑐᓕᖅᑎᑦᑎᓂᖅ ᐃᖅᑲᓇᐃᔭᖅᕕᒃᒥ ᐊᑐᖅᑕᐅᕙᒃᑐᓂᒃ ᐊᒻᒪ ᒪᓕᒋᐊᖃᖅᑐᓂᒃ ᐃᖅᑲᓇᐃᔭᖅᑎᐅᔪᑦ ᑎᒥᒧᑦ ᐋᓐᓂᐊᓕᕈᑎᐅᔭᑦᑐᓂᒃ ᐱᑕᖃᙱᓐᓂᕐᓴᐅᑎᓐᓇᓱᒡᓗᒍ.
- ᐃᓚᐅᑎᓪᓗᒍ ᑕᖃᐃᕐᓯᕐᕕᐅᔪᓐᓇᖅᑐᑦ ᐊᒻᒪ ᓴᓇᓂᕐᒧᑦ ᐅᑎᕈᓐᓇᕈᑎᒃᓴᓂ ᐃᖅᑲᓇᐃᔭᖅᕕᒃᓴᓄᑦ ᐋᖅᑭᒃᓱᖅᑕᐅᓯᒪᔪᒃᑯᑦ, ᐃᖅᑲᓇᐃᔭᕐᓂ ᐊᔾᔨᒌᙱᑉᐸᒃᖢᓂ ᓂᑭᑦᑖᖃᑦᑕᖅᑐᓄᑦ ᐃᖅᑲᓇᐃᔭᖅᑏᑦ ᑎᒥᒧᑦ ᐋᓐᓂᐊᕈᑎᐅᔭᒃᑐᓂ ᐊᑐᖅᑕᐃᓕᑎᓐᓂᕐᒧᑦ.
ᐃᖅᑲᓇᐃᔭᖅᑎᐅᔪᑦ ᐃᒪᐃᑦᑕᕆᐊᓖᑦ:
- ᓴᐳᑎᓯᒪᔾᔪᑎᓂ ᐊᑐᕐᐸᒡᓗᓯ, ᐱᕐᕈᓗᐊᕿᑦᑕᐃᓕᔾᔪᑎᓂ ᓴᓇᔾᔪᑎᓂᒃ, ᐊᒻᒪᓗ ᓇᖕᒥᓂᖅ ᐋᓐᓂᖅᑕᐃᓕᔾᔪᑎᓂᒃ ᐃᖅᑲᓇᐃᔭᖅᑎᐅᔪᓄᑦ ᐱᓯᒪᖁᔭᐅᕙᒃᑐᑦ ᐃᖅᑲᓇᐃᔭᖅᕕᒃᒥᑦ.
- ᒪᓕᒡᓗᓯ ᐃᖅᑲᓇᐃᔮᒥ ᐱᓕᕆᐊᖃᕈᑎᓂᒃ ᐊᒻᒪ ᒪᓕᒋᐊᖃᖅᑐᓂᒃ ᐃᖅᑲᓇᐃᔭᖅᕕᒃᒥᑦ.
- ᐃᓚᐅᖃᑦᑕᕐᓗᑎ ᐃᖅᑲᓇᐃᔭᖅᕕᖕᒥᑦ ᐋᓐᓂᐊᖃᖅᑕᐃᓕᒪᓂᕐᒧᑦ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ.
ᐋᓐᓂᖅᑕᐃᓕᑎᑦᑎᓂᖅ
ᓇᓗᓇᐃᕐᓗᒋ ᐊᒻᒪ ᐅᖃᐅᓯᕆᕙᒡᓗᒋᑦ ᑎᒥᒧᑦ ᐅᓗᕆᐊᓇᔭᑦᑐᑦ ᐃᖅᑲᓇᐃᔭᖅᕕᖕᓂ ᓯᕗᓪᓕᖅᐹᖑᔪᖅ ᐋᓐᓂᖅᑕᐃᓕᑎᑦᑎᓂᕐᒧᑦ. ᐅᑯᐊ ᐃᓚᖏᑦ ᑎᒥᒧᑦ ᐅᓗᕆᐊᓇᔭᑦᑐᑦ ᖃᐅᔨᓇᓱᒍᓐᓇᑕᔅᓯ ᐃᖅᑲᓇᐃᔭᖅᕕᒋᔭᔅᓯᓐᓂ:
- ᑲᔪᓰᓐᓇᖅᑐᒃᑯᑦ ᓅᑦᑕᕐᕖᑦ: ᐊᑕᐅᓯᑦᑕᐃᓐᓇᕐᒥ ᓄᑭᖕᓂ ᐊᑐᖃᑦᑕᐃᓐᓇᕐᓗᓂ ᐊᑕᐅᓯᑦᑕᐃᓐᓇᒃᑯᑦ.
- ᐃᖅᑲᓇᐃᔭᑦᑎᐊᖃᑦᑕᙱᓐᓂᖅ: ᐃᖅᑲᓇᐃᔮᒧᑦ ᐱᓕᕆᐊᖃᕆᐊᖃᖅᐸᑦ ᑭᕕᒃᓯᑲᑕᒋᐊᖃᕐᓗᓂ, ᐊᒡᔭᖅᓯᑲᑕᒋᐊᖃᕐᓗᓂ, ᑎᒥᓗ ᓴᓂᒨᖅᑎᑦᑕᕆᐊᖃᖅᐸᒡᓗᓂ, ᐅᕝᕙᓘᓐᓃᑦ ᐊᑕᐅᓯᑦᑕᐃᓐᓇᒥ ᐊᐅᓚᖃᑦᑕᕆᐊᖃᕐᓗᓂ.
- ᓄᖅᑲᖓᒋᐊᖃᕐᓂᖅ ᐅᕝᕙᓘᓐᓃᑦ ᑎᒥᒧ ᐊᑲᐅᙱᑦᑐᒥᒃ ᐋᖅᑭᒃᓯᒪᓂᖅ: ᐃᖅᑲᓇᐃᔭᕐᓗᓂ ᐅᑯᖓᔭᕆᐊᖃᕐᓇᖅᑐᒥᒃ, ᓴᖑᑲᑕᒋᐊᖃᕐᓗᓂ, ᐅᖓᓯᒃᓴᑲᑕᖕᓇᕐᓗᓂ ᐅᕝᕙᓘᓐᓃᑦ ᓱᑲᖓᔭᕆᐊᖃᕐᓇᕐᓗᓂ ᐱᓕᕆᐊᕆᔭᖅ ᐱᐊᓂᒐᓱᒡᓗᒍ.
- ᐃᖅᑲᓇᐃᔭᕈᑏᑦ ᐋᖅᑭᒃᑕᐅᓯᒪᓂᖏᑦ ᓈᒻᒪᙱᓗᐊᕐᓗᑎᒃ: ᓴᓇᕐᕈᑎᑦ ᐅᕝᕙᓘᓐᓃᑦ ᓴᓇᔭᕆᐊᓕᖕᓄᑦ ᐊᑐᖅᑕᐅᕙᒃᑐᑦ ᐃᖅᑲᓇᐃᔭᖅᑐᓂᒃ ᑎᒥᖏᓄᑦ ᓈᒻᒪᙱᓗᐊᖅᓗᑎᒃ.
- ᐅᖁᒪᐃᑦᑐᓂᒃ ᑭᕕᒃᓯᑲᑕᖕᓂᖅ, ᐊᒡᔭᖅᓯᑲᑕᖕᓂᖅ, ᐊᔭᐅᑲᑕᖕᓂᖅ, ᐅᓂᐊᖅᓯᑲᑕᖕᓂᖅ ᐊᒻᒪᓗ ᑎᒍᒥᐊᕐᔪᐊᕆᐊᓖᑦ: ᐃᖅᑲᓇᐃᔭᖅᑎᓂᒃ ᐊᒃᓱᕈᕆᐊᖃᕐᓇᖅᑐᑦ.
- ᓇᔭᒃᓴᓪᓚᑲᑕᖕᓂᖅ: ᓴᓇᕐᕈᑎᑦ ᐅᕝᕙᓘᓐᓃᑦ ᓴᓇᔭᕆᐊᓕᖕᓄᑦ ᐊᑐᖅᑕᐅᓪᓗᑎᒃ ᓇᔭᒃᓴᓪᓚᑲᑕᐃᓐᓇᔭᑦᑐᑦ.
ᐃᖅᑲᓇᐃᔭᖅᑐᑦ ᐊᒻᒪ ᑲᒪᔨᐅᔪᑦ ᓇᓗᓇᐃᖅᓯᐊᓂᒃᐸᑕ ᐅᓗᕆᐊᓇᖅᑐᓂᒃ, ᐱᓕᕆᖃᑎᒌᓗᑎᒃ ᑲᒪᒋᔭᖃᕐᓗᑎᒃ ᐊᒻᒪ ᐊᐅᓚᑕᐅᓗᓂ ᐅᓗᕆᐊᓇᖅᑐᖅ ᐃᖅᑲᓇᐃᔭᖅᑎᐅᔪᑦ ᐋᓐᓂᖅᑕᐃᓕᑎᓯᒪᓇᓱᒡᓗᒋᑦ. ᐊᑐᕐᓗᒍ ᐊᐅᓚᑦᑎᓃᑦ ᖁᕝᕙᐸᓪᓕᐊᓂᖏᑦ ᖃᐅᔨᓇᓱᒡᓗᓂ ᐱᐅᓂᖅᐹᒥᒃ ᖁᐊᕐᓵᖅᓇᖅᑐᓂ ᑲᒪᒋᔭᖃᕈᓐᓇᕐᓂᕐᒥᒃ:
- ᐱᑕᖃᕈᓐᓃᖅᑎᑦᑐᓐᓇᖅᐱᐅᒃ ᐅᕝᕙᓘᓐᓃᑦ ᐊᓯᐊᒎᖅᑎᑦᑎᖔᕐᓗᑎᒃ ᐱᓕᕆᐊᒃᓴᒥ ᐱᓕᕆᖁᔭᐅᔪᒥᒃ ᐊᒻᒪᓗ ᐃᖅᑲᓇᐃᔭᖅᕕᐅᔫᑉ ᖃᓄᐃᓕᖓᓂᖓᓃ?
- ᐊᔪᕐᓇᙱᓚᖅ ᐊᓯᐊᓂᖔᖅ ᓴᓇᖅᕈᑎᒥ ᐊᑐᓕᕐᓗᓂ, ᐱᓕᕆᐊᒥᒃ, ᐅᕝᕙᓘᓐᓃᑦ ᐊᓯᐊᒍᖔᖅ ᐱᓕᕆᐊᕆᖔᓕᕐᓗᒍ ᐅᓗᕆᐊᓇᙱᓐᓂᖅᓴᒃᑯᑦ?
- ᐊᔪᙱᑉᐱᑦ ᐊᐅᓚᑦᑎᔾᔪᑎᓂ ᐊᐅᓚᑦᑎᔭᕆᐊᒃᓴᖅ ᐅᓗᕆᐊᓇᖅᑐᓂᒃ ᐱᑕᖃᕈᓐᓃᖅᑎᑦᑎᔪᓐᓇᖅᑐᓂᒃ, ᓲᕐᓗ ᒪᑯᑎᑐᓇᖅ:
- ᐋᖅᑭᒋᐊᒃᑲᓐᓂᕐᓗᒋ ᖃᓄᐃᓕᖓᓂᖏᑦ ᓴᓇᕝᕕᐅᔪᑦ/ᓴᓇᕝᕕᒋᔭᐅᔪᑦ ᐅᖓᓯᒃᓴᑲᑕᙱᓐᓂᕐᓴᐅᓐᓇᓕᕐᓗᑎᒃ, ᐅᑯᔭᕆᐊᖃᓗᐊᕈᓐᓃᕐᓇᕐᓗᑎᒃ, ᐊᓯᖏᓐᓂᓪᓗ.
- ᐊᑐᖃᑦᑕᕐᓗᓯ ᑭᐳᓂ ᐃᒃᓯᕙᐅᑕᕐᓂᓪᓗ ᖁᕝᕙᖅᑎᕝᕕᖃᖅᑐᓂ ᑎᒥᒧᑦ ᓈᒻᒪᒍᓐᓇᖅᑐᓂᒃ.
- ᐊᑐᖃᑦᑕᕐᓗᓯ ᐃᑲᔪᕈᑎᒃᓴᓂᒃ ᒪᑯᓂᖓ ᐊᔭᐅᖃᑦᑖᓂᒃ, ᐱᖁᑎᓂᒃ ᐅᓂᐊᕈᑎᓂᒃ, ᑭᕕᒃᓯᔾᔪᑎᓕᖕᓂᒃ ᐅᕝᕙᓘᓐᓃᑦ ᑭᕕᒃᓯᑎᑦᑎᙱᓐᓂᕐᓴᐅᓗᓯ, ᐊᔾᔭᖅᑐᐃᙱᓐᓂᕐᓴᐅᓗᑎᒃ ᐊᒻᒪ ᑎᒍᒥᐊᓗᐊᕆᐊᖃᙱᓐᓂᕐᓴᐅᓗᑎᒃ.
- ᐊᔪᕐᓇᙱᑉᐳᖃᐃᑦ ᐊᑐᓕᖅᑎᑦᑎᓂᕐᒥᒃ ᐊᐅᓚᑦᑎᓂᕐᒧᑦ ᐊᐅᓚᑦᑎᔭᕆᐊᒃᓴᖅ, ᒪᑯᓂᖓ:
- ᐋᖅᑭᒃᓯᓗᓂ ᐅᓗᕆᐊᓇᙱᑦᑐᓂ ᐃᖅᑲᓇᐃᔭᕈᑎᓂᒃ ᑕᒪᐃᓐᓄᑦ ᒪᓕᒃᑕᐅᔪᓐᓇᖅᑐᓂᒃ.
- ᐋᖅᑭᒋᐊᕐᓗᒋᑦ ᐃᖅᑲᓇᐃᔭᖅᕕᐅᖃᑦᑕᕋᔭᖅᑐᑦ ᐊᒻᒪ ᑐᐊᕕᐊᓄᓐᓇᙱᓪᓗᑎᒃ, ᐃᓚᖃᕐᓗᒍ ᓄᑭᖕᓂ ᑕᖃᐃᕐᓯᓚᐅᑲᖃᑦᑕᕐᓂᕐᒥᒃ ᐅᓪᓘ ᐃᓚᖓᒍᑦ ᐃᖅᑲᓇᐃᔭᖅᑎᓪᓗᒋᑦ.
- ᐱᓕᕆᔾᔪᑎᐅᔪᑦ ᖃᐅᔨᓴᖅᑕᐅᕙᒡᓗᑎᒃ ᓴᓇᔭᕆᐊᖃᕐᒪᖔᑕ.
- ᐱᔭᕆᐊᖃᖅᐱᑦ ᓇᖕᒥᓂᖅ ᐋᓐᓂᖅᑕᐃᓕᔾᔪᑎᒃᓴᓃ ᒪᑯᑎᑐᓇᖅ ᓰᖅᑯᖅᓯᐅᑎᓂᒃ, ᐃᑯᓯᒃᓯᐅᑎᓂᒃ ᐅᕝᕙᓘᓐᓃᑦ ᑐᐃᖕᓄᑦ ᐋᓐᓂᔾᔭᐃᒃᑯᑎᓂᒃ, ᐊᖕᒑᖕᓂᒃ ᓴᓇᕐᕈᑎᓂ ᐊᑐᖅᑎᓪᓗᑎ ᐊᑐᒐᒃᓴᓂᒃ, ᑲᒥᖕᓂ ᐃᑲᔪᕈᑎᖃᑦᑎᐊᖅᑐᓂᒃ, ᐊᓯᖏᓐᓂᓪᓘ?
ᐃᑲᔪᕈᑎᒃᓴᐃᑦ
- ᓴᓇᕐᕈᑎᒃᑯᕕᖕᒥᑦ ᐅᖃᖃᑎᒌᓐᓂᖅ: ᐱᓕᕆᓪᓗᓂ ᐅᓗᕆᐊᓇᖅᑐᑦ
- ᐃᖅᑲᓇᐃᔭᕐᕕᖕᒥᑦ ᐋᓐᓂᐊᖃᖅᑕᐃᓕᒪᓂᕐᒥᑦ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ ᒪᓕᒃᑕᐅᖁᔭᐅᔪᑦ: ᐃᓚᖓᑦ 12, 13 ᐊᒻᒪ 85
- ᑲᓇᑕᒥ ᐱᓕᕆᕝᕕᒃ ᐃᖅᑲᓇᐃᔭᕐᕕᖕᒥᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ (CCOHS) ᐃᑲᔪᕈᑎᒃᓴᐃᑦ:
- ᑎᒥᒧᑦ ᐃᓗᐊᖅᓯᔾᔪᑏᑦ – ᖃᓄᐃᓕᐅᕈᑎᒃᓴᑦ ᐅᓗᕆᐊᓇᙱᑦᑐᒥ ᖃᓄᐃᑦᑕᐃᓕᑎᑦᑎᓂᕐᒧᓪᓗ ᐱᓕᕆᔾᔪᑎᓂᒃ
- ᑐᓄᒃᑐᑦ ᐋᓐᓂᖅᑕᐃᓕᒪᓂᖅ – ᑐᓴᒐᒃᓴᐃᑦ ᑐᓄᒃᑯ ᐋᓐᓂᖅᑕᐃᓕᒪᓂᖅᒧᑦ ᐱᓕᕆᓗᐊᓕᕐᓂᖅᒨᖓᔪᓄᑦ
- ᑎᑎᕋᖅᕕᒃᒥᑦ ᑕᓯᓯᕈᑎᒃᓴᓅᖓᔪᑦ – ᑐᓴᒐᒃᓴᐃᑦ ᖃᓄᐃᒻᒪ ᑎᑎᕋᖅᕕᒃᒥᑦ ᑕᓯᓯᕆᐊᖃᕐᓂᖅᒥᒃ ᐊᒻᒪᓗ ᖃᓄᖅ ᑕᓯᓯᑲᑕᒍᑎᒃᓴᐃᑦ
- ᐱᓕᕆᐊᖃᕐᓂᒃᑯᑦ ᐊᒡᒐᒧᑦ ᑲᒪᒋᔭᖃᕐᓂᕐᒥᒃ – ᐊᑭᕐᓇᕐᒥᐅᑕᖅ ᖃᓄᐃᓕᐅᕆᐊᖃᕐᓂᖅ ᐅᓗᕆᐊᓇᙱᑦᑐᒥᒃ ᑭᕕᒃᓯᓇᓱᒡᓗᓂ ᐃᖅᑲᓇᐃᔭᖅᕕᒃᒥᑦ
- ᓴᐅᓂᓐᓅᖓᔪᑦ ᓈᒻᒪᒍᓐᓃᕈᑕᐅᔪᑦ – ᑐᓴᒐᒃᓴᑦ
- ᐃᒃᓯᕚᕐᓂᖅ ᐃᖅᑲᓇᐃᔭᕐᕕᖕᒥᑦ – ᐊᔾᔨᙳᐊᖃᖅᑐᑦ