ᔭᓗᓇᐃ, ᓄᓇᑦᓯᐊᖅ (ᓯᑎᐱᕆ 6, 2016) – ᐅᓪᓗᒥ, ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᒃ ᓇᓪᓕᐅᒃᑯᒫᓂᒡᓗ ᖃᐅᔨᓴᖅᑏᑦ (WSCC−ᑯᑦ) ᓄᓇᑦᓯᐊᒥ ᐊᒻᒪ ᓄᓇᕗᒻᒥ ᓴᖅᑭᑦᑎᖅᑲᐅᕗᑦ ᐃᖅᑲᓇᐃᔭᕐᕕᖕᒥ ᖃᓄᐃᙱᑦᑎᐊᕐᓂᕐᒧᑦ ᐊᑦᑕᕐᓇᖅᑕᐃᓕᒪᓂᕐᒧᓪᓗ ᐱᓕᕆᐊᖏᓐᓄᑦ ᑐᑭᒧᐊᒍᑎᒃᓴᓂᒃ ᓇᖕᒥᓂᓕᖕᓄᑦ ᐊᖏᓗᐊᙱᑦᑐᓂᒃ ᑐᕌᖓᔪᓂᒃ, ᓄᑖᖅ ᐱᒋᐊᖅᑎᑕᐅᔪᖅ ᐃᑲᔫᑕᐅᓇᓱᒃᖢᓂ ᓇᖕᒥᓂᓕᖕᓄᑦ ᐊᖏᓗᐊᙱᑦᑐᓂᒃ ᓇᖕᒥᓂᖅ ᐃᖅᑲᓇᐃᔭᕐᕕᖕᒥᓂ ᖃᓄᐃᙱᑦᑎᐊᕐᓂᕐᒧᑦ ᐊᑦᑕᕐᓇᖅᑕᐃᓕᒪᓂᕐᒧᓪᓗ ᐱᓕᕆᐊᒃᓴᖓᓂᒃ ᐋᖅᑭᒃᓱᐃᓂᐊᖅᑎᓪᓗᒋᑦ.
ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᒃ ᓇᓪᓕᐅᒃᑯᒫᓂᒡᓗ ᖃᐅᔨᓴᖅᑏᑦ ᓇᓗᓇᐃᖅᓯᕗᑦ ᐊᖏᓗᐊᙱᑦᑐᒥᒃ ᓇᖕᒥᓂᓖᑦ ᐊᐅᓚᓂᖃᓲᖑᓂᖏᓐᓂᒃ ᐊᕙᑎᑦ ᑐᖔᓂ ᐃᖅᑲᓇᐃᔭᖅᑎᖃᖅᖢᑎᒃ. ᐊᖏᓗᐊᙱᑦᑐᒥᒃ ᓇᖕᒥᓂᓖᑦ ᓄᓇᑦᓯᐊᒥ ᐊᒻᒪ ᓄᓇᕗᒻᒥ ᐋᖅᑭᒃᓱᐃᔭᕆᐊᖃᕋᔪᙱᑉᐳᑦ ᐃᖅᑲᓇᐃᔭᕐᕕᖕᒥᓂ ᖃᓄᐃᙱᑦᑎᐊᕐᓂᕐᒧᑦ ᐊᑦᑕᕐᓇᖅᑕᐃᓕᒪᓂᕐᒧᓪᓗ ᐱᓕᕆᐊᒃᓴᓪᓚᑦᑖᒥᒃ, ᐱᓕᕆᐊᒃᓴᖃᕐᓗᓂ ᐱᓕᕆᔾᔪᑕᐅᑦᑎᐊᕈᓐᓇᖅᐳᖅ.
ᐊᑦᑕᕐᓇᖅᑕᐃᓕᒪᓂᕐᒧᑦ ᐱᖁᔭᖅ ᐊᒻᒪ ᐃᖅᑲᓇᐃᔭᕐᕕᖕᒥ ᖃᓄᐃᙱᑦᑎᐊᕐᓂᕐᒧᑦ ᐊᑦᑕᕐᓇᖅᑕᐃᓕᒪᓂᕐᒧᓪᓗ ᒪᓕᒐᖏᑦ ᒪᓕᒃᖢᒋᑦ, ᓇᖕᒥᓂᖃᖅᑐᓕᒫᑦ ᐋᖅᑭᒃᓱᐃᔭᕆᐊᖃᖅᐳᑦ ᐊᑐᓕᖅᑎᑦᑎᓗᑎᒡᓗ ᐊᑦᑕᕐᓇᙱᑦᑐᒥᒃ ᐃᖅᑲᓇᐃᔭᕐᕕᖕᒥ ᑲᒪᔾᔪᑎᒃᓴᖏᓐᓂᒃ ᐃᖅᑲᓇᐃᔭᖅᑎᓂᒡᓗ ᐃᓕᓐᓂᐊᖅᑎᑦᑎᕙᒡᓗᑎᒃ ᐊᑦᑕᕐᓇᙱᑦᑐᒥᒃ ᐃᖅᑲᓇᐃᔭᕐᕕᖃᐃᓐᓇᖁᓪᓗᒋᑦ. ᐃᖅᑲᓇᐃᔭᕐᕕᖕᒥ ᖃᓄᐃᙱᑦᑎᐊᕐᓂᕐᒧᑦ ᐊᑦᑕᕐᓇᖅᑕᐃᓕᒪᓂᕐᒧᓪᓗ ᐱᓕᕆᐊᒃᓴᓄᑦ ᒪᓕᒋᐊᓖᑦ ᐊᖏᓗᐊᙱᑦᑐᓂᒃ ᓇᖕᒥᓂᓕᖕᓄᑦ ᑐᕌᖓᔪᑦ ᓇᓗᓇᐃᖅᓯᕗᑦ ᖃᓄᖅ ᓇᖕᒥᓂᖃᖅᑐᑦ ᓇᖕᒥᓂᖅ ᐃᖅᑲᓇᐃᔭᕐᕕᖕᒥᓂ ᖃᓄᐃᙱᑦᑎᐊᕐᓂᕐᒧᑦ ᐊᑦᑕᕐᓇᖅᑕᐃᓕᒪᓂᕐᒧᓪᓗ ᐱᓕᕆᐊᒃᓴᒥᒃ ᐋᖅᑭᒃᓱᐃᔪᓐᓇᕐᒪᖔᑦ ᖃᐅᔨᓴᕈᑎᒃᓴᓂᒡᓗ ᑎᑎᕋᖅᓯᒪᔪᓂᒡᓗ ᐃᓚᓕᐅᔾᔨᓗᑎᒃ ᐋᖅᑭᒃᓱᒃᑲᓐᓂᕈᓐᓇᖅᑕᒥᓂᒃ ᐊᑐᕐᓂᐊᓕᕈᓂᐅᒃ.
ᒪᓕᒋᐊᓕᖏᑦ ᐃᓗᐃᑦᑐᙳᖁᓪᓗᒋᑦ, ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᒃ ᓇᓪᓕᐅᒃᑯᒫᓂᒡᓗ ᖃᐅᔨᓴᖅᑏᑦ ᓄᑖᒥᒃ ᐱᓕᕆᐊᒃᓴᒥᒃ ᓴᖅᑭᑦᑎᓚᐅᖅᐳᑦ, ᐃᖅᑲᓇᐃᔭᕐᕕᖕᒥ ᖃᓄᐃᙱᑦᑎᐊᖅᑐᓕᕆᔨᒥᒃ ᓇᖕᒥᓂᖃᖅᑐᓂᒃ ᐃᑲᔪᕈᓐᓇᖅᑐᒥᒃ ᐃᖅᑲᓇᐃᔭᕐᕕᖕᒥ ᖃᓄᐃᙱᑦᑎᐊᕐᓂᕐᒧᑦ ᐊᑦᑕᕐᓇᖅᑕᐃᓕᒪᓂᕐᒧᓪᓗ ᐱᓕᕆᐊᒃᓴᒥᒃ ᐋᖅᑭᒃᓱᐃᑎᓪᓗᒋᑦ ᑲᑐᔾᔨᖃᑎᒋᔭᒥᓄᑦ. ᐃᖅᑲᓇᐃᔭᕐᕕᖕᒥ ᖃᓄᐃᙱᑦᑎᐊᖅᑐᓕᕆᔨᑦ ᓇᖕᒥᓂᖃᖅᑐᓂᒃ ᐱᓕᕆᖃᑎᖃᖃᑦᑕᕐᓂᐊᖅᐳᑦ ᐃᑲᔪᖅᑐᕐᓗᓂᒋᑦ ᐋᖅᑭᒃᓱᐃᑎᓪᓗᒋᑦ ᓄᑖᒥᒃ ᐃᖅᑲᓇᐃᔭᕐᕕᖕᒥ ᖃᓄᐃᙱᑦᑎᐊᕐᓂᕐᒧᑦ ᐊᑦᑕᕐᓇᖅᑕᐃᓕᒪᓂᕐᒧᓪᓗ ᐱᓕᕆᐊᒃᓴᒥᒃ, ᐅᕝᕙᓘᓐᓃᑦ ᓇᓗᓇᐃᖅᓯᓇᓱᒃᑎᓪᓗᒋᑦ ᐱᑕᖃᙱᓐᓂᐅᔪᓂᒃ ᐋᖅᑭᒋᐊᖅᑎᑦᑎᓂᐊᖅᑎᓪᓗᒋᓪᓗ ᐃᖅᑲᓇᐃᔭᕐᕕᖕᒥ ᖃᓄᐃᙱᑦᑎᐊᕐᓂᕐᒧᑦ ᐊᑦᑕᕐᓇᖅᑕᐃᓕᒪᓂᕐᒧᓪᓗ ᐱᓕᕆᐊᒃᓴᖏᓐᓂᒃ. ᐃᓄᖕᒥᒃ ᐱᖃᑎᖃᕐᓗᓂ ᐃᑲᔪᖃᑦᑕᕐᓗᓂ ᐊᒻᒪᓗᑦᑕᐅᖅ ᐃᖅᑲᓇᐃᔭᕐᕕᖕᒥ ᖃᓄᐃᙱᑦᑎᐊᖅᑐᓕᕆᔨ ᐊᑐᐃᓐᓇᐅᖃᑦᑕᕐᓂᐊᕆᕗᖅ ᐊᔪᕈᓐᓃᖅᓴᖅᑎᑦᑎᔭᕆᐊᖃᕌᖓᑦ. ᓇᖕᒥᓂᖃᖅᑏᑦ ᑎᓕᐅᖅᑕᐅᕗᑦ ᐃᖅᑲᓇᐃᔭᕐᕕᖕᒥ ᖃᓄᐃᙱᑦᑎᐊᖅᑐᓕᕆᔨᒧᑦ ᖃᐅᔨᒋᐊᖃᑦᑕᖁᔭᐅᓪᓗᑎᒃ ᐊᐅᓚᓂᖃᑦᑎᐊᖅᑐᒥᒃ ᐃᖅᑲᓇᐃᔭᕐᕕᖕᒥ ᖃᓄᐃᙱᑦᑎᐊᕐᓂᕐᒧᑦ ᐊᑦᑕᕐᓇᖅᑕᐃᓕᒪᓂᕐᒧᓪᓗ ᐸᕐᓇᐅᑎᖃᕐᒪᖔᑦ ᖃᐅᔨᓇᓱᒡᓗᑎᒃ.
"ᖁᕕᐊᓱᒃᐳᒍᑦ ᑖᔅᓱᒥᖓ ᑐᑭᒧᐊᒍᑎᒃᓴᒥᒃ ᓴᖅᑭᑦᑎᔪᓐᓇᕋᑦᑕ ᓄᑖᓂᒡᓗ ᐊᑐᖅᑕᐅᖃᑦᑕᕐᓂᐊᖅᑐᓂᒃ ᐊᖏᓗᐊᙱᑦᑐᓂᒃ ᓇᖕᒥᓂᓕᖕᓄᑦ ᑐᕌᖓᔪᓂᒃ", ᑕᐃᕝ ᒍᕋᓐᑎ ᐅᖃᖅᑐᖅ, ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᒃ ᓇᓪᓕᐅᒃᑯᒫᓂᒡᓗ ᖃᐅᔨᓴᖅᑏᑦ ᐊᖓᔪᖅᑳᖓ ᐊᒻᒪ ᓄᓇᓕᖕᓂ ᐱᕙᓪᓕᐊᔪᓕᕆᔨ. "ᓇᖕᒥᓂᓕᖕᒥᒃ ᒥᑭᓗᐊᖅᑐᖃᙱᓚᖅ ᐊᑦᑕᕐᓇᖅᑕᐃᓕᒪᑎᑦᑎᔭᕆᐊᒃᓴᖅ. ᑖᒃᑯᐊ ᒪᓕᒐᒃᓴᐃᑦ ᐃᖅᑲᓇᐃᔭᕐᕕᖕᒥ ᖃᓄᐃᙱᑦᑎᐊᕐᓂᕐᒧᑦ ᐊᑦᑕᕐᓇᖅᑕᐃᓕᒪᓂᕐᒧᓪᓗ ᐱᓕᕆᐊᒃᓴᓂᒃ ᐋᖅᑭᒃᓱᐃᔪᓄᑦ ᖃᐅᔨᒪᔾᔪᑕᐅᖃᑦᑕᖅᐳᑦ ᐱᓕᕆᐊᒃᓴᖓ ᐊᐅᓚᑕᐅᔪᓐᓇᑦᑎᐊᕐᒪᖔᑦ. ᐊᑦᑕᕐᓇᖅᑕᐃᓕᒪᓂᕐᒧᑦ ᐱᓕᕆᐊᒃᓴᖃᕈᕕᑦ ᓇᖕᒥᓂᖁᑎᖕᓂᒃ ᑲᒪᑦᑎᐊᕐᓂᐊᖅᐳᑎᑦ."
ᐃᖅᑲᓇᐃᔭᕐᕕᖕᒥ ᖃᓄᐃᙱᑦᑎᐊᕐᓂᕐᒧᑦ ᐊᑦᑕᕐᓇᖅᑕᐃᓕᒪᓂᕐᒧᓪᓗ ᐱᓕᕆᐊᒃᓴᓄᑦ ᑐᑭᒧᐊᒍᑎᑦ ᐊᖏᓗᐊᙱᑦᑐᓂᒃ ᓇᖕᒥᓂᓕᖕᓄᑦ ᑐᕌᖓᔪᑦ ᖃᕆᓴᐅᔭᒃᑯᑦ ᐱᔭᒃᓴᐅᕗᖅ ᐅᕙᓂ wscc.nt.ca ᐅᕝᕙᓘᓐᓃᑦ wscc.nu.ca. ᐃᖅᑲᓇᐃᔭᕐᕕᖕᒥ ᖃᓄᐃᙱᑦᑎᐊᖅᑐᓕᕆᔨᒧᑦ ᑎᑎᕋᕈᓐᓇᖅᐳᑎᑦ, ᐃᕐᙲᓐᓈᖅᑕᐅᒃᑯᑦ ᐅᕗᖓ ohsregs@wscc.nt.ca ᐅᖃᓗᒡᓗᑎᓪᓘᓐᓃᑦ ᐅᕗᖓ 1-800-661-0792.
-30-
ᑐᑭᓯᒋᐊᒃᑲᓐᓂᕈᒪᒍᕕᑦ ᖃᐅᔨᒋᐊᕐᕕᒋᓗᒍ:
ᑭᒻ ᐅᐊᓪᑯ
ᑐᓴᒐᒃᓴᓕᕆᓂᕐᒧᑦ ᐊᐅᓚᑦᑎᔨ
ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᒃ ᓇᓪᓕᐅᒃᑯᒫᓂᒡᓗ ᖃᐅᔨᓴᖅᑏᑦ
ᓄᓇᑦᓯᐊᒥ ᓄᓇᕗᒻᒥᓗ
ᐅᖃᓘᑖ: (867) 920-3846